سويت مقابله مع ارامكو وبإنتظار الرد ؟

السلام عليكم ورحمه الله وبركاته

انا سويت مقابله في ثلاث ادارات مع ارامكو قبل اسبوعين بالضبط وللحين ماجاني الرد مع انهم قالو لي نرد لك بعد اسبوعين الى ثلاث ؟؟
وغير كذا حتى ما ارسلو لي الاسايمنت تست على الايميل مع اني مسجل في موقعهم
هل هذا يعني اني مرفوض ومستبعد ؟
انا سمعت متأخر بيوم الهندسي الي بجامعه الملك عبدالعزيز .. رحت احجز تذكره ومن باتسر الصبح الساعه 8 سويت المقابله .. وزين امداني اكتب الـ c.v

سويت مقابله كانو فيها ادارتين وحده ببقيق ووحده بمنطقه نائيه بس انا ماكنت عارف بالبدايه وش اداراتهم
سألوني اسأله اغلبها عن التوربينات البخاريه والغازيه ومحطات توليد الطاقه وطول في هالمجال حللوني
نص الأسأله جاوبتها واكثر شي يشفع لي التطبيق
لكن انا كاتب في السي في ان ماعندي مشكله اشتغل بمطقه نائيه وعلق عليها واكدت له اني احب المناطق النائيه
لان فيها تطوير اكبر لكن المصيبه سألني سؤال قال لو جاك عرض من زميلي الي من اداره البايب لاين الي في بقيق وشغله روتيني
او جاك عرض مني وانا في منطقه نائيه في مهد الذهب تداوم خمس ايام بدون ماتشوف اهلك
مع ان الي في مهد الذهب هو الي كان ياخذ ويعطي معي واغلب الاسأله منه
انا صراحه احترت ولا عرفت ارد احسه سؤال ملغوم
قلت مادري لازم استخير ومنا منا وبالنهايه وضحت له اني ابي الي في بقيق
خلصت المقابله وطلعت رجعو دقو علي بعدها بثلث ساعه قالو وينك بعيد ولا قريب وارجع لنا
رجعت لهم وخذاني على جنب واحد من الي كانو موجودين اثناء المقابله طلعت معه لحالنا قال انت متأكد تبي منطقه نائيه ولا لا بيني وبينك خلنا نكون صريحين انا استغربت من كلامه
قلت تبي الصراحه ابي الي في بقيق فيها استقرار .. قام خذاني لهم مره ثانيه وقالو من الاخر
ايهن تبي لو جاك عرض وظيفي من هالادارتين وش تختار .. مع العلم انهم قامو يشرحون لي مميزات وعيوب اقسامهم
وحتى الرواتب قالي الي في مهد الذهب لك 60% بدل من الراتب الاساسي
انا قلت له نتوكل على الله ونختار بقيق

السؤال هو طريقتهم الي سووها معي هل هي دايم تصير اذا صارت فيه ادارتين اثناء مقابله وحده !
علشان يرشحونك للي تبي ويستبعدونك من الثانيه
او انه الي كان في المنطقه النائيه ماصدق الله احد يمدح المناطق النائيه وينتظرني اقول ابي ادارتك
وعقبه يطلع العقد من تحت الطاوله ويخليني اوقعه
وش الجواب المثالي لمثل هالسؤال اذا خيروك بين عرضين ؟

 

Web Developer

انا ما وقعت شي الي سويته معهم مجرد مقابله .. لكن انا مستغرب من اصراره باني اجاوب على سؤاله اي
الوظيفتين اختار لو عرضت لي ورجعني مره ثانيه بعد ماطلعت علشان يثبت الاجابه !! استغربت منه وقلت له
ليه كل هالاهتمام ؟ قال بس علشان نعرف اولوياتك ونرشحك للإداره الي تبي

الي خايف منه انه خلاص يتم استبعادي من الاداره الاولى والعب الحين على الاداره الثانيه بس يا اما انهم يقبلوني او يرفضون


VIP Master
ايه انا استغربت لانه ماجاني شي وخفت انهم ما ارسلو لي الاسايمنت تيست بعد المقابله معناها اني مرفوض
لكن انا اعرف واحد سوا مقابله مع ارامكو في يوم التوظيف الي فات قبل خمس شهور يمكن
وولحين ماجاه اي رد من ارامكو ولا رساله ولا شي حتى الاسايمنت تيست مع انه يدخل الموقع ويحدث
هل هذا يعني انه مرفوض ؟

 

كيف تتواصل معهم وتتصل على مين ؟

 

Majdi90
ههههههههه يارجل حسستني مهم

Web Developer
اخوي انا ماكنت عارف من البدايه ان الرجال ادارته بمنطقه نائيه .. وانا ذكرت له اني احب المناطق النائيه لان فيها
تطوير اكبر .. قلت لعل وعسى احسسه اني رجال احب الكرف والصراحه انا ماعندي مانع لو ماجاني الا هالعرض من ارامكو
ماراح ارفضه وغير كذا وضحت له اني مهتم في أي مجال يكون فيه محطات توليد طاقه وتوربينات
المصيبه طلعت اداره الرجال نفس كل اهتماماتي الي ذكرتها لهم .. حتى يوم خذو يتكلمون عن طبيعه عمل اداراتهم ومقر العمل
هو نفسه قال انت من البدايه ذكرت انك تحب المناطق النائيه وتحب التوربينات طيب انا عملي بمنطقه نائيه وفيها
توربينات بالمقابل زميلي عمله انابيب وشغل روتيني اي الوظيفتين تفضل لو جاك عرض منهم
انا هنا قلت لازم اثبت على وضعي لو قلت ابي الوظيفه الي ببقيق الحين يحس ان كل كلامي الي قبل مجرد مظهر ونصاب ههههههههه
علشان كذا توترت ولا عرفت ارد بس قلت له اكيد لو ماجاني الا عرض منك ماراح ارفضه اما لو جاني عرضين
راح افضل بقيق

saud89
الله يبارك فيك بس ما اضنها تبي تحصل الوظيفه ههههههه
والله بيني وبينك المقابله كانت سيئه بنظري .. اول مقابله لي سويتها وانا مازلت ادرس خريج هالترم
ماعندي خبره عمل ولا شي .. يمكن الشي الوحيد الي يشفع لي هو ان معدلي عالي ولله الحمد
لكن من جامعه ناشئه مو من البترول
وانا طبقت في ارامكو في قسم صيانه ورش ميكانيكيه وكان الي فيه صيانه توربينات بخاريه
يعني يوم كنت اتكلم عن تطبيقي وذكرت لهم التوربينات اخذ يسترسل معي بهالموضوع لين تعمق
وقام يسألني بالتفصيل عن صيانه التوربينات والفرق بين البخاريه والغازيه ووش الفايده من التوربينات
وطلب مني اشرح ماده الثيرمال بور بلانت بشكل عام ووش استفدت منه
حتى اعطاني ورقه وقلم وقال ارسم التوربينه الغازيه وحدد لي اجزائها واسأله كثيره بهالمجال
اغلب الاساله بالمقابله كانت عن التخصص وسألوني اسأله عن البمبات تعريفها وانواعها ومتى نستخدم البمب
وهل نستخدم البمب مع الغازات ؟ ووش الفرق بين البمب والكومبريسور
وقالو لي اشرح الفايبريشن .. متى يحدث اسبابه وكيف تحل مشكلته
وقال خلنا نتناقش بالبروجيكتات الي سويتها بالجامعه
وحتى سألني كم نسبتك بالثانوي هههههه

طبعا نص الاجوبه جاوبتها ونصها يضحك على اجاباتي اذا شافني قمت اتفلسف, الله يهديه خلاني اتوتر زياده ههههههههههه