السلام عليكم ورحمة الله وبركاته من يوم ما دخلت جامعتنا الحبيبة وانا فاقد أهم عنصر ترويقة في حياتي اليومية تعرفون وشو ؟؟؟! القهوة العربية السعودية << حسيت اني معطيها أكبر من حجمها هههههـ بس والله جد، ما كان يصفا راسي بعد صلاة المغرب الا بالقهوة والتمر وذاك الحلا اللي يحبه قلبك لذلك، قمت بالبحث عن أفض الطرق لصنع القهوة، بشرط أن لا نحتاج لصنعها الا إلى الغلاية الكهربائية (اللي موفرينها لنا الجامعة). عشان ما ننقفط (يُقْبَضُ عَلَيْنَا) بتهمة استخدام ممنوعات في الجامعة، وليعيش الجميع بأمن وسلام ~~~~~~~~~~~ لقيت في الإنترنت طريقة يقول اللي حطها انها مضمونة وانه خبير فيها، وانا قلت خلني أشاركها مع الشباب قبل لا أسويها؛ لأن هذا الموضوع سيحدث نقلة تاريخية عظيمة في حياتنا ههههـ المهم هذي هي الطريقة في الأسفل، اللي ودّه يتهور ويجربها، ويرد لنا تجربته، نكون شاكرين. واللي عنده طريقة أفضل، لا يبخل علينا بالمشاركة ~~~~~~~~~~~ الطريقة: 1- أحضر ترمس (أو براد كما يقول البعض) وضع فيه الكمية المرغوبة من القهوة والهيل والزعفران. 2- ضع الماء بقدر الحاجة في الغلاية الكهربائية ودعه يغلي حتى يتوقف. 3- ضع القليل من الماء المغلي في الترمس وأغلقه بإحكام ثم قم بهز الترمس حتى تشعر بأن المحتويات قد اختلطت مع الماء بشكل جيد. 4- قم بغلي نفس الماء مرة أخرى حتى يتوقف تلقائياً ثم املأ به الجزء المتبقي من الترمس. 5- قم بهزّ الترمس بشكل خفيف حتى يندمج الخليط جيداً ثم دعه لمدة 10 دقائق قبل التمتع بطعم القهوة الفريد والممتاز. ملاحظة هامة: لا تقم بوضع أي شيء في الغلاية غير الماء فقط. ~~~~~~~~~~~ وسلامتكم ... السؤال اللي يطرح نفسه هنا: وش الكمية المناسبة من القهوة والهيل والزعفران اللي احتاجها لترمس صغير على قدي. إذا عندك ترمس، منت خسران اذا جربت الطريقة ورديت لنا خبر، عشان ما نشتري وننّكب.
ههه والله انا موب راعي قهوة بس في الصيف الماضي مسكت معي قهوة في رمضان فقلت لازم اتعلم وش لون اسويها.. المهم من ضمن الخطوات انك تخلي القهوة في الدلة (الي فيها القهوة) فوق الضو لمدة ربع ساعة خخخخخ طبعا ما نفذتها لأني ما شريت الفرن الكهربائي..
^^^^^^^^^^ يعطيك العافية على المشاركة ... بس انا اتكلم هنا عن الغلاية اللي موفرتها الجامعة، مو الفرن الكهربائي (الممنوع)
أنا صادروا منّي العين الكهربائية.. المهم صلحت لي مرة بالغلاية.. وعارف هالطريقة اللي تقول بس ما اقتنعت بها.. بتجي خفيفة.. والقهوة لازم "تقلب" كم مرة.. فـ وش سويت ؟ حطيتها في الغلاية وخليتها تطبخ..وكل ما جت بتطيش صكيت الغلاية.. وعلى هالحال حول 7 دقايق : ) وبعدها زلّها في الترمس صورة توضيحية https://yfrog.com/gystwpkj:tw1
^^^^^^^^^ بس المشكلة هنا .... انك بتحتاج الغلاية عشان تسوي بها أشياء ثانية، مثل الشاهي ماني رايح اشتري غلاية ثانية خصوصي عشان القهوة ونسيت تقول لنا وش المقادير اللي تستخدمها وحجم الترمس مشكور على المشاركة الفعالة وننتظر آراء باقي الأعضاء
بالنسبة لي اذا مسكت قهوة...اخذ الترمس وانزل الثقبة في محل بعد كبري الثقبة وانت راجع الجامعة...يفلل لك الترمس ب 9 ريال...واستمتع انت وزملائك بالقهوة المضبوطة بدون ان تتعب عمرك
والله شف القهوه بالغلايه ماتنفع هذي ثالث سنه لي في الجامعه ولله الحمد ماقد طبو علي الامن الا في الحلم.. وعندي عين كهرب وشوايه((حماصه)) يعني اشترلك عين كهربائيه واحرص انها تكون من النوع الزين وزبط قهوتك وبالهنا والعافيه
ياا شيخ ما اتووقع تنفع هذه الطرريقة .. لازم تخلي القهووة تطبخ في الدلة لين تقطع .. anyway .. اشتري لك دافور صغير و دلة صغيرة .. زي ما انا مسوي .. و من يووم كنت في الفريشمين ما طبوو علي الا مرة و كنت ملغم الغرفة بس ما شافوو شي المهم اشتري لك كمية قهوة مطحوونة من الدوحة مع شوية زعفران و هيل و زنجبيل مطحون ( حوار) .. و اشتري لك ملعقة طعام وحدة و ملعقة صغيرة .. steps : ١) املا الدلة بالموية و بعدها صبها في الهيتر .. و خلها لين تغلي ٢) حط الدلة عالدافور و خذ ملعقة قهوة وحدة ما تكون كبيرة مرة الكمية يعني وسط .. يعني تل صغير ٣) حط ملعقة صغيرة من الزنجبيل المطحون .. يعني قد راس الملعقة الصغيرة يعني شوية مرة عشان ما تكون حارة زيادة القهوة ( الزنجبيل يعطيها طعم و حرارة خفيفة تنفع ف البرد ) ٤) خل القهوة تطبخ ربع ساعة عشرين دقيقة لين تقطع و خذلك تيست في فنجان اذا حسيتها صارت خفيفة اوكي و اذا حسيتها ثقيلة زود شووية موية ٥) جهز الترمس الصغير و حط ملعقة صغيرة هيل و بعدها زل القهوة فوق الهيل و خط شعرتين و الا ثلاث من الزعفران عشان يعطيها ريحة حلوة و طعم .. و سلامتك و احلى قهوة جنووبية في هذه الاجواء الباردة
أنا أشوف من مسؤولي المنتدى الموقرين فتح قسم للطبخ والتغذية نصير نحط فيه كل أرقام المطاعم وطرق تحضير القهوة والبيض في الغرفة عن طريق الغلاية وطرق ذكية لحل بعض مشاكل التغذية وأساليب النظافة وكيفية طبخ الأكلات كالمشويات والكبسة في حال الخروج مع الأصحاب على البحر أو تخييم أيام الإجازات أظنها فكرة جدا رائعة تحياتي لكم
اشكرك من القلب عالموضوع بالرغم من اني قبلي الا ان التمدن لم يعطيني حافزاً لتعلم اعداد القهوة > افــــــــــــــا
شباب انا اسويلكم قهوة بغرفتي واحلى كلام بس اللي عليكم تجيبون دلتكم وقهوتكم وهيلكم والباقي علي اول مرة ببلاش وثاني مرة بريال وثالث مرة بريالين ورابع مرة بثلاثه وكذا يعني بعد شهر تصير ب29 وش تبون احلى من كذا
^ ي حليلك تستدرجنا مثلا اجل اول مرة ببلاش حلو ممتاز مممم بتحط شي يجذبنا لشربها ي ي ي المجرم اجل ثانية مرة ريالين احـــــلا هههههههههههه