عامل في الصحراء ليس اكثر؟!!

اسعد الله أوقاتكم بالخير والمسرات

من الحين أقولكم اللي ماله خلق يقرأ خذ لك كوب قهوة يصحصحك مااضمن نفسي متى راح اوقف الموضوع فيه ٧٠ مليون علمتك هههههههه

بعد انهاء مرحلة الثانوية بدأت ابحث عن عمل هنا وهناك وحتى وظيفه حكومية عرضة لهم اني مستعد اعمل مدة ٦ شهور بدون راتب نهائياً وبعد هالمدة توافقوا علي أو ترفضوني لكن رفضوا ووظيفة آخرى قبلوني شركة ووقعت العقد براتب ٣٥٠٠ وبديت اداوم وماتتصورون حجم فرحتي اهلي واقربائي خصوصاً بعد سنوات طويله وأنا عاطل ولما بقاء واشرف الشهر على نهايته وعلى الراتب ايام قليله قالوا وقع استقالتك وقالوا أنت مفصول اصلاً من الأيام الأولى انصدمت طول الشهر المدراء يمرون من امامي بالأستقبال ويسلمون وهم اللي فصلوني طيب علموني اقش عفشي ليش كل الوقت ساكتين نزلت وودعت زميلي بالاستقبال كان من ذوي الاحتياجات الخاصه وانسان خلوق ربي يوفقه وشلت عفشي طبعاً عفشي اللي هي كتبي احب اقرأ واطلع مثقف حتى في أصعب الظروف ههههه، بعد خروجي من الشركة وأنا راجع للبيت مقهور وافكر شنو اقول لأهلي واقاربي وفرحتهم ماكتملت وافكر ومو منتبه للطرق ولولا لطف الله كان وقع الحادث وسياره اخرى تسببت عليها بالخروج من الطريق واعتذرت منه لكن من روعت الموقف وشددته امطرني بوابل كلمات لها أول مالها تالي ومقززه هههههه المهم قررت اختار التزام الصمت ومااعلمهم لجل مااضايق اهلي مانمت هذيك الليله وكنت كل لحظه افتح ورقة الاستقاله انظر فيها وانظر لتوقيعي الهزيل المحطم كانت ليلة قاسيه بكل المقاييس، اهلي لأحظوا مااروح للدوام كانوا يسألوني فكنت اقول مافيه شئ بالعمل ومن هالكلام وبعدها بعدة شهور شفت اعلان بأحد المنتديات شخص يدعي أنه يشغل الفلوس بتجارة التصدير وكان صراحه اعلان مغري وعوائد ماليه عاليه فقررت الدخول معه منها اصارح اهلي اني مفصول وبنفس الوقت افرحهم اني دخلت عالم البزنس وانسف خبر فصلي السيئ عشان اللي بتنزل دمعته حزن علي بنفس اللحظه تتحول دمعته فرح ارشاد في انفاق الدموع ههههه، لكن مااملك السيوله للدخول معه فقلت ليش مااخذ دين وادخل معه ومن العوائد اسدد الدين وبالنهايه وبعد السداد تكون الارباح صافيه
لي وهنا اكبر غلطة اتخذتها ياليت كان مبلغ بسيط فأخذت دين اقساط من اشخاص اعرفهم وسافرت من الرياض إلى جدة واكون معكم صريح من اول ماقابلة الرجل قلبي قرصني وماارتحت له نهائي عكس كلامه المعسول بالمنتدى لكن اخذت الدين وماكان عندي خيارات آخرى ووقعت العقود وكان يحول لي الارباح حسب اتفاق العقود وكل مبلغ يوصلني كنت مباشره اسدد الديون واللي حولي كانوا يقولوا تزوج دام الله فتحها عليك واقولهم ماارتاح حتى اتخلص من الدين بعدها التفت لحياتي رغم عمري مو صغير الآن ٣٣ ومااخفيكم فيه أنسانه بحياتي تنتظرني واعتقد مازالت تنتظرني عسى ربي يجمعنا بخير ويجمع كل غالين لبعض، وبعد كم شهر قال انه تعرض لخساره ومن هالكلام وماكان كلامه ثابت اكثر من كلام صبرت عليه وعلى وعوده شهور بدون فائده بالاخير تقدمة ورفعت عليه قضيه واكتشفت اني رقم ٥٠ من بين عدد الضحايا امثالي بأجمالي مبالغ تتجاوز ٧٠ مليون تقريباً ومبلغي أنا تقريباً نص مليون وبعد خمس سنوات وإلى يومنا هذا مانعلم وين ارضه لكن اللي اعلمه ومتأكد منه أن اصحاب الدين يعرفوني زين ههههه وهم للأمانه صابرين ومقدرين ظرفي جزاهم الله خير، وبعد فترة قلت لازم اشوف حل فنصحني أحد الأصدقاء بالبورصة الأسهم فقلت مااعرف لها فقال انا بعد مااعرف لها لكن اعرف شئ واحد وواثق فيه أن شخصك الكريم إذا اصر على شئ ويبي يتعلمه راح يبدع فيه شدني كلامه وقررت ادخل هالعالم عالم المال والأعمال وبديت اسأل هنا وهناك وكنت اسأل اهل الخبره بهذا المجال اسئله كانوا يضحكون ويقولون أنت مطفي النور شف شغله غيرها عاد هنا التحدي يضرب أقصى مراحله عندي وبدأ مشواري وكنت كل يوم استراتيجيه وكل يوم معادله ومن خساره في خساره طبعاً كان يجيني دعم من اهلي شئ بسيط لجل أتعلم ومافيه بمشواري إلى الخساره بدون فائده فقررت ماعاد اسمع للمحليين وفلسفتهم قلت أنا بسوي لنفسي فلسفه خاصه فيني ههههه المهم قلت براقب كل يوم الأسهم اللي ترتفع أعلى نسبة واشوف ليش ولماذا وعلل سبب الارتفاع حلوه علل هههه وبعد مرور سنتين من التخبط وصلت للي ابيه ولله الحمد وكان الربح الشهري تقريباً ٢٠% ويوصل احيان ٣٥% فتواصلة مع شركة استثمار بالبحرين قلت كم الارباح اللي متوقع تحققونه لي قالوا تقريباً 15% بالسنه؟! انصدمت تواصلت مع محلل ومستشار مالي له وزنه ومكانته بهذا المجال وصارحته بعملي واللي ممكن احققه ٢٠% بالشهر قال إذا أنت صادق ابرز نفسك اعلامين نزل شارتات بتويتر والشركات بتشوفك وتسحبك عاد أخوكم مايحب الظهور لكن جبرت نفسي وبديت انزل صور فقط شارتات لكن طريقة رسمي مختلفه تماماً عن اللي موجود بالساحه فكانت الردود محطمه ويقولون مستحيل أنه تحقق الربح اللي تقوله وغلط الرسم مو كذا يرسم وكأنه المؤشرات والرسم والخلق اللي يتداولون يمشون على خط واحد نفس قواعد التحليل؟! وهذا غلط من وجهة نظري كل شخص له رأي وقرار يتخذه كيفما يشاء ومع كل الردود المحطمه كانت شارتاتي تحقق اللي اذكره وهنا كان صادق صديقي لما قال أني راح ابدع الحمد لله جميل أنك تتقن صنعه أثرياء العالم أغلبهم في هذا المجال سواء بدايت مشوارهم أو يستثمرون أموالهم فيه، وبسبب ماعندي راس مال ادخل هالمجال قررت اشتغل وبما أني مااملك إلا الثانويه و١٠ شهادات دورات عن بعد معتمدة في مجال الأدارة مافيه شئ يناسب إلا عامل في ارامكو أو أحد الشركات النفطيه بشرط أن تكون بمناطق نائيه لسببين الأولى أنا من الرياض وبما أن الوظيفه بتكون خارج الرياض ماتفرق معي بأي مكان السبب الثاني ماادفع شئ مقابل السكن وغيره والسبب الثالث اللياقة حفر ودفن طبيعي قوة جسمانيه


السؤال هنا قل ياظالم توك تسأل بعد الصحيفه اللي سويته هههههه وين اماكن التقديم لمثل هذي الوظائف افيدوني مشكورين،
عرفت كل شئ بالحياة إلا فرحة نزول الراتب اجهل شعورها واحساسها.

 

هلا أخوي حياك بالعكس يالغالي سبب ذكري هالشئ لجل غيري يكون حذر وواعي وتجربه يستفاد منها بأن أستمثاراتك تكون تحت يدك.. شكراً لك لاهنت