السلام عليكم ورحمة الله وبركاته الله يحيي الجميع , وبارك الله فيكم وفي دعائكم لي والله يخليكم لعين ترجيكم . . . قبل لاأبدء في سرد احداث الجزء الثالث , حبيت اوضح نقطة نسيت ذكرها في الجزء الثاني وكانت النقطة هذي مهمة جدا جدا وذكرني فيها احد الشباب , والنقطة كانت كم عدد الساعات اليومية اللي كنت تذاكرها في ترم (052) , وهذي معلومة مهمة جدا حتى يكون الموضوع واضح للجميع . . . في ترم (052) كانت عدد الساعات على ماأعتقد انها 13 ساعه فقط , والسبب كان في قله عدد الساعات هو المنع من الجامعه بتنزيل اكثر من 13 ساعه بسبب حصولي على انذار في السنة التحضيرية لأني انهيتها في 3 اترام (سنة ونصف ) وكان معدلي وقتها اقل من 2 من 4 . . .. كنت منزل في هالترم المواد التالية : phys 101 , Math101 , Engl101 , Ias 111 بالنسبة للمذاكرة اليومية , راح اكون صريح جدا جدا معكم في هالنقطة لنها مهمة جدا , مثل ماتعرفون مواد الفيزياء والرياضيات والانجليزي تُدرس كل سبت واثنين واربعاء ويوم الاحد يكون فية كلاسين رستيشن ( واحد للفيزياء وواحد للرياضيات ) يعني جدولي كان بالكثير 4 ساعات يوميا فقط , يعني كنت اداوم من الساعه 7 الصباح واخلص على الساعه 11 الصباح , يعني عندي وقتها في ذاك الترم وقت طويل جدا من الفراغ , يعني انا اطلع تقريبا الساعه 11 الصباح والليل ماأنام الا الساعه 11 الليل , يعني عندي تقريبا 12 ساعه يوميا فاضي فيها . . . حتى اكون صريح , للأمانه التامة كنت اذاكر الفيزياء ساعتين او ثلاث بالكثير كل 3 ايام , يعني مثلا اليوم السبت اخذنا درس , انتظر الى يوم الاثنين عشان ناخذ الدرس الثاني واذاكرهم جميع مع بعض , والحال هذا ايضا ينطبق على الرياضيات , والانجليزي كان ياخذ مني تقريبا 3 ساعات اسبوعيا بالكثير والاسلامي ماألمسة الا وقت الاختبارات فقط يعني لو حسبناها حسبة بسيطة , انا عندي 12 ساعه يوميا فاضي فيها , والرياضيات والفيزياء ماأذاكرها الا ساعتين كل 3 ايام , يعني في الاسبوع 4 ساعات تقريبا او 5 بالحسبة كاملة احتاج في الاسبوع 13 ساعه للمذاكرة من اصل 60 ساعه ( هذا بدون مانحسب عطلة نهاية الاسبوع اللي هي الخميس والجمعه ) اعتقد انها عدد ساعات قليلة للناس اللي تبي تجيب معدل قوي , وفي نفس الوقت كان معدلي لابأس فية كبداية .... هذا عدد الساعات للي سأل عنه , وفي ردي التالي راح اكمل الجزء الثالث
السلام عليكم ورحمة الله وبركاته حياكم الله من جديد , واسف كل الاسف على التأخير في تنزيل الجزء الثالث من قصتنا الجامعية , وهذا والله بسبب ظروف العمل وضيق الوقت نوعا ما , لكن مو مشكلة الحين ( وقت كتابتي للموضوع ) فاضي ومصحصح على الاخر . . . بعد ماتكلمنا في جزءنا الثاني اللي هو كان ترم (052) عن تفاصيل الاحداث بيني وبين زميلي يوسف ونقدة الحاد على احد الدكاترة في مادة الفيزياء بسبب وجهه نظر صاحبها , ووجهه نظرة ممكن انها كانت مبنية على الدرجة النهائية لة وهذا اثر بشكل كبير على حكمة على الدكتور وقييمة للدكتور ووصفة بالضعيف وقت مكالمتي لة وعرفنا التفاصيل كاملة. . . مثل ماذكرت لكم انتهى الترم (052) وكان معدلي وقتها 2.69 من 4 ومثل ماوصفت لكم شعور الكبير بحصولي على هذا المعدل وكل هذا بسبب اني قارنت معدلي بمعدل زميلي يوسف اللي وقتها كان معدلة تقريبا مقارب للـ 2 من 4 . . . بعد ترم (052) كان الصيف , وكانت ايامها وقت تسجيل ثاني للمواد لترم (061) , وللمعلومية وقتها ماأخذت ترم صيفي , المهم جلست مع نفسي اناقش الجدول واشوف الاوقات اللي تناسب واشوف كم عدد الساعات المقترحة اني انزلها في هالترم وبعد جلسة طويلة شوي قررت تنزيل 14 ساعه وكانت لها اسباب اهمها : 1) ان في هذا الترم كنت عاقد كل العزم على جعله نقطة تحول في حياتي الجامعية ونقطة تحول في معدلي . . . 2) ماكنت ناوي اخاطر وانزل 17 ساعه مثلا وانا ماأعرف هل انا قادر على تحقيق الهدف بـ 17 ساعه مثلا !!! وبعدها قررت تنزيل 14 ياعه فقط . بدأت اقرء اسماء الدكاترة , وماأعرف منهماالا القليل المعروفين بشهرتهم في الجامعه , رفعت الجوال بتصل على يوسف الصديق الصدوق المتشائم , قلت في نفسي لا هذا ماينفع لي ابد لأني جربتة الترم الماضي وقال وجهه نظر غير وجهه نظري . . . جلست افكر وافكر وتوكلت على الله ونزلت الجدول ولاأخذت رأي زميلنا يوسفل ونزلت المواد التالية : Math 102 كانت مع الدكتور الافضل من وجهه نظري في الجامعه او من الافضل وهو البرفسور علي الدفاع Phys 102 : نزلتها على عماها Ics 103 : على عماها ايضا IAS 112 : على عماها ايضا PE 101 : على عماها بدء الترم وانا عاااااااقد كل العزم على تحقيق درجات عالية ومثالية تساعد معدلي في الصعود الى مافوق حاجز الـ 3 ان شاء الله . . . في هالترم رح اذكر قصة عن مادة ISC 103 وهالمادة للي مايعرفها هي مادة عن احد لغات البرمجة وهي C++ المهم في اولى اسابيع هالترم وانا جالس في حالي في احد الكفتريات في احد مباني الجامعه الا يجيني زميلي في السنة التحضرية عبدالعزيز , وجلس يسلم ويسأل عن الاخبار , وكالعادة من اهم الاسئلة الشائعه بين شباب الجامعه في بداية اي ترم هو سؤالين : 1) كم نزلت ساعه 2) ومن اخذت المواد معه سألني زميلي عبدالعزيز وماشاء الله علية كان متفوق في السنة التحضيرية وكان مجتهد جدا , وخلص السنة التحضيرية في وقتها ( سنة فقط ) , وكان سابقني في المواد الاساسية مثل الرياضيات والفيزياء وغيرها لأني انا خلصت السنة التحضيرية في سنة ونصف , سألني الاسئلة المتوقعه : عبدالعزيز : كم اخذت ساعه ماشاء الله انا : 14 ساعه عبدالعزيز : ايه احسن لك لأن المعدل في بداية اولى الاترام سهل ترفعه واحسن لك خذ ساعات قليلة عشان ترفع المعدل وتحاول تثبتة انا : ايه ان شاء الله والله يكتب اللي فية الخير عبدالعزيز : وش نزلت انا : وقلت له المواد عبدالعزيز : نزلت ICS 103 !!? انا :ايه عبدالعزيز : والله ماأقدر الا اقول لك الله يعنيك , قسم بالله ماشفت في حياتي مادة زي كذا , واول مرة في حياتي احس اني ابي النجاح فقط فيها ودعيت الله اني افتك منها وطلعت بـ D+ انا : لا ان شاء الله انها تساهيل عبدالعزيز : بتشوف وبتذكر كلامي انتهى النقاش معه هنا , لكن هالمرة غير , ماتأثرت ابدا ابدا في اللي قالة , لأن عندي تجربة سابقة مع صديقنا يوسف وكانت تحذيرات وهمية ليس الا . . . وبعد نهاية داوم ذاك اليوم وانا راجع لشقتي العزيزة , اخذت ورقة A3 وكتبت فيها الجدول اليومي الدراسي لي بتنظيم جميل ومرتب . . وورقة ترتيب الوقت لازلت احتفظ فيها من ضمن اوراقي الجامعية وهي ( نقطة التحول الكبيرة لي ) في هذا الترم رتبت اوقات المراجعه اليومية للمواد , واوقات الاسترخاء , واوقات الفله والطلعه كان جدول مميز جدا , بحيث انه يجمع المراجعه ومتابعه المواد اولا بأول وفي نفس الوقت فية متنفس كبير من الوقت اقدر اطلع فية واجتمع مع الشباب . . . وفي الاسبوع التالي وبعد بعض المراجعات للمواد , اكتشفت ان فية بعض المسائل او بعض الافكار اللي تحتاج الى تدوين او بالاحرى تحتاج الى تركيز اكبر , وخطر في بالي فكرة وهي : * اكتب في ورقة خارجية (A4) اي فكرة غريبة او فكرة احس اني ممكن انساها في اوقات مراجعه المادة للأختبار ,كنت في اي مذاكرة اكتب الافكار الغريبة مجرد كتابة وطريقه حلها على سبيل المثال حتى تتضح الصورة ( مثال لاأكثر ) وليس واقعا في الترم : مشتقة الجذر : عبارة عن مشتقة مابداخل الجذر تقسيم 2 مضروب في الجذر نفسة هذا عبارة عن مثال عن الافكار اللي كنت اكتبها في اوقات المراجعه اليومية في ورقتي (A4) , المهم وبعد انقضاء الاسبايع الاولى جاء وقت الاختبارات الشهرية وكنت عل اتم الاستعداد لها , وكنت اتذكر وقتها اني اراجع مادة ICS 103 وخلصتها ولله الحمد لكن بدون الرجوع الى اوراقي اليومية صاحبة الافكار الغريبة (A4) , المهم انا قلت في نفسي ماراح احصل شي في الاوراق انا مادرستة , او بالاحرى مستحيل لأني قفلت على المادة تماما . قام اخوكم في الله يفتح الدرج اللي في الاوراق وكان عددها في حدود الـ 5 اوراق تقريبا , بدأت اقرءها وتفااااااااااااااااااااااااااااااااااااااااااااااااااااااجئت بوجود افكار كانت خارج نطاق مراجعتي للمادة , ماتتصورون ياجماعه الخير والله يشهد على كلامي ان اكثر من صفحتين ونصف كانت افكار مو في بالي اطلاقا , وراجعتها وراجعت طريقة الحل وحليت بعض الامثلة , وجاء وقت الاختبار : كان عدد الاسئلة 5 اسئلة تقريبا , السؤال الاول والثالث كانت من افكار ورقتي العجيبة اللي كانت خارج افكار دراستي وقت المراجعه , اما باقي الاسئلة الثلاثة كانت واضحه للمذاكر انتهى الاختبار وحصلت ولله الحمد على درجة عالية , وقتها تذكرت كلام عبدالعزيز زميلي وتخويفة بصعوبة المادة وكنت وقتها غير مبالي بوجهه نظرة بصعوبة المادة , وقلت ان كلام الطلاب هي مجرد وجهه نظر شخصية ليس الا وانا بعد هالاختبار زاد حبي وتعلقي في اوراق افكاري اليومية اللي كانت لها بعد الله الفضل الكبير في هالترم . . . مرت الايام وجاءت اختبارات الشهر الثاني وبعدها الاختبارات النهائية وانا لازلت على نفس الرتم من المذاكرة وكتابة الافكار على الاوراق الخارجية. . . دخلت فترة الاختبارات النهائية وكان الجدول مخيف لي بسبب وجود مادتين قريبة من وقت بعض , كان عندي يوم الخميس اسلامي ويوم الاحد الليل اختبار ماث والاثنين الصباح ics , وهالشي كان مضايقني كثير لأنها كانت تجربة جديدة اني اختبر الليل اختبار وارجع للشقة انام واصحى على اختبار ثاني , يعني مافية وقت للمذاكرة ووووووو اختبرت اول اختبار اللي هو الاسلامي وكان سهالات ولله الحمد , واول ماطلعت نظمت وقتي عشان اقدر اخلص الرياضيات والـ ICS في وقت جيد لأن اوقاتهم قريبة جدا من بعض . . . ذاكرت الـ ICS يوم الخميس فقط , وبعدها ذاكرت الرياضيات الى وقت الاختبار اللي هو يوم الاحد الليل , واختبرت ولله الحمد كان رااااااااااااااااااااائع بكل المقاييس وهذا بفضل الله ثم بفضل دعا الوالدين ثم بفضل ورقة افكاري العجيبة للأمانه كانت ورقة الافكار لمادة الرياضيات تقريبا 18 صفحة فيها مالذ وطاب من الافكار والتريكات وكل شي خلص اختبار الرياضيات ورجعت للشقة الليل وعلى طول نمت وقررت اصحى على الساعه 3 الفجر اراجع لمادة ICS نمت بحفظ الله ورعايتة وصحيت على الساعه 4 الفجر , يعني تأخرت ساعه على موعدي المحدد وكان وقت الاختبار الساعه 7:30 صباحا , يعني انا ماعندي الا 3 ساعات فقط للمراجعه وبعدها لازم امشي للجامعه , لكن المفاجأة السارة كانت : المذاكرة لم تأخذ اكثر من 3 ساعات فقط , كانت جميع المذاكرة من خلال اواق الافكار اللي احتفظ فيها فقط دون الرجوع الى اي شي اخر , وتوجهت بعدها للجامعه ودخلت الى قاعه الاختبار واختبرت , ولله الحمد جميع الافكار اللي كانت في الاختبار تقريبا كنت اعرفها . . . خلص الترم وكانت المفاجأة السارة بالمعدل المخطط علية وحصلت على معدل فصلي 3.62 تقريبا من 4 ومعدل تراكمي في حدود الـ 3.24 على ماأعتقد . . . كان هذا الترم نقطة تحول كبيرة لي في مسيرتي الجامعية وهذا يعود بفضل الله ثم بفضل بعد الاساليب اللي استخدمتها في هالترم وهي : 1) ترتيب الوقت من اروع وابدع الطرق للأبداع , كنا نسمع ان ترتيب الجدول مهم من ايام المدارس ومانعطيها اي اهتمام , او بالاحرى نقول طيب بننظم وقتنا ويوم ويومين واحنا راجعين على طير ياللي مرة ثانية , جربوها وراح تدعون لي ان شاء الله , رتب جدولك اليومي ووازن فية بين الترفية والتعليم وراح تحس فعلا بطعم المذاكرة وبطعم الترفية . . . 2) ورقة الافكار هي من اهم اسباب قراءة افكار الدكتور وجعل الصعب سهل بعد توفيق الله , يعني خلونا نسولف شوي عن ورقة الافكار , افرض وانت جالس في الكلاس ويشرح الدكتور لكم فكرة فيها الاعيب كثيرة ممكن تجي في الاختبار , وانت كنت تقول في نفسك ايه عرفت للفكرة واذا جتني في الاختبار بجيبها بسهولة , صدقني هنا تكون اخطأت خطأ كبير جدا وعلى قولتهم (العلم في الراس مش في الكراس) , لا انا اقول في مثل هالظروق العلم في الكراس مش في الراس انت اكتب معه الفكرة وروح للبيت وسجلها في ورقة افكارك لهذي المادة وحاول تلعب في هالفكرة وتطلع لك فكرة جديدة وحاو تحلها , بهالشي انت تكون كسبت اشياء كثيرة منها انك عرفت كيف تلعب في الافكار واستفدت ايضا من وجود ورقة الافكار اللي راح تساعدك كثير في اوقات الاختبارات وراح تختصر عليك اشياء كثيرة جدا انا ادري اطلت عليكم اليوم , وانا بعد تعبت شوي من الكتابة , , نراكم على خير في كتابتنا القادمة
والله كلامك تمام وترتيب الوقت مهم وان شاء الله نطبقه اوافقك وبشدة في هذه النقطة وانا مجربها على ابسط مثال في الثانوية الغبراء كان عندي الدفتر ابو 200 ودايما اكتب في اليسار الا في حالة الافكار الغريبة كما قبلت فاكتبها في ناحية اليمين ووالله لها فوااائد عظيمة وترسخ في راسك اشكرك الف شكر والله يوفقك بس وش كان تخصصك؟ هندسة كهربائية
الله يسعد قلبك ويبارك فيك والله اني انتظر هذا الكلام لأن الكلام لباقي الطلاب بالمنتدى كان ترهيبي وتعجيزي لكن بيض الله وجهك وعسى الله يوفقك لأعلى المراتب في الدارين ننتظر القادم الرائع منك اسأل الله التوفيق لك وللجميع
الله يبارك في الجميع ان شاء الله اخوي الغالي , صحيح في كلام كثير وطويل من الشباب ان الجامعه شي صعب وان الجامعه نقطة سوداء في تاريخ كل طالب وهذا خطأ خطأ صحيح ان الجامعه فيها اوقات عصيبة حالها كـ حال اي شي اخر , لكن اعيد واكرر ان جميع من يذكر السلبيات دون الايجابيات هو كـ حال زميلنا يوسف في قصتنا في مادة الفيزياء , لأنه اخذ d+ نسى جهد الدكتور ونسى كل شي واصبح الدكتور هو الاسوء , صدقني لو كانت درجتة b+ او a لأصبح هذا الدكتور هو الافضل والامثل . لكن للأسف احنا نشوف الامور بعين عوراء تذكر دائما الجزء المملوء من الكأس وليس الفارغ لي تكملة ان شاء الله لمسيرة التخرج وراح يبين فيها قوة شهادة جامعه الفهد بالتوفيق للجميع
والله العظيم انك خليتني أتمنى الإجازة تنتهي بسرعة بس عشان أروح وأدرس في الجامعة وعلى فكرة أخوي (أوريا1431) أنا تابعت موضوعك (ليش كل هذا التحطيم ) وكان كلامك فيه جدا رائع وأعتقد إنه هذا الموضوع (قصة كفاح وتميز "خريج" ) أكبر رد للمتشائمين