السلام عليكم ورحمة الله وبركاته . . . حياكم الله اخواني من جديد , واسف كل الاسف على التأخر في تنزيل هذا الجزء بسبب الانشغال في بعض الامور اتمنى تتقبلون اسفي . في كتابتنا الاخيرة اللي كانت في ترم (061) ذكرنا ان ذاك الترم كان بداية الانطلاقة القوية نحو التميز ونحو المسير على مراتب الشرف الجامعيه , وذكرنا ايضا ان في ذاك الترم نزلت 14 ساعه فقط خوفا من المغامرة الخطيرة او الغير محسوبة لو نزلت ساعات كثيرة وضاع المعدل في بدايتي الجامعية . . . المهم في وقت تنزيل الجدول لـ ترم (062) جلست احاول احسبها مع نفسي كم هي عدد الساعات اللي راح انزلها في هذا الترم , وبعد عدة مشاورات مع النفس عرفت ان بالامكان زيادة عدد الساعات فوق مستوى 14 ساعه , لأن الـ 14 ساعه كانت بالنسبة (لي) عدد قليل نوعا ما, وقررت انزل هالترم 16 ساعه . . . طبعا لابد اني اذكر ان في هذا الترم كانت اولى تجاربي مع مواد التخصص ( هندسة كهربائية ), وكان لابد من التفكير كثيرا في كيفية جعل الجدول مريح ومناسب لي , لأن بداية مواد التخصص هي اللي راح تحدد استعدادك لـ هذا التخصص من عدمة . . . بدء هذا الترم وتم انزال المواد التاليه : EE 200 <<<< مادة لوجيك في الكهرباء EE 201 <<<< هذي اسمها Electric Circuit 1 وهذي تعتبر من اهم مواد التخصص في الهندسة الكهربائية لأنها مفتاح لأكثر مواد التخصص في الهندسة الكهربائية math 201 Ias 212 Ias 211 Pe 102 مجموع هذه المواد 16 ساعه , وفي هذا الجزء راح اتكلم اكثر عن مواد التخصص واهميه البداية القوية فيها ومدى تأثيرها الجامعي عليك حتى التخرج ان شاء الله . . . في بداية هذا الترم كنت مُلم بأشياء كثيرة اكتسبتها من خلال تجربتي في الترمين الماضيين ,وعرفت ان استشارة الاصحاب والطلاب شي طيب لكن يجب ان لا يتشكل في داخلك اي شي حول رأي اي طالب وانما فقط اسأل لتشكيل فكرة عامة فقط لاأكثر , بدء الترم وبالاخص في كلاس EE201 وبدء الدكتور في تحضير اسماء الطلاب , والدكتور ينادي من اسم الى اخر حتى وصل الى اسم واحد من الاشخاص وقال فيصل الـ **** وقال الطالب حاضر , سأل الدكتور الطالب فيصل وقال له يافيصل اخبر انك كنت معي السمتسر الماضي في هالمادة ولا أنا غلطان قال الطالب فيصل الا بلا يادكتور كنت معك الترم الماضي لكن قررت احذف الترم تقريبا قبل فترة الاختبارات النهائية بـ 3 اسابيع اقل او اكثر لاأذكر والله . . انا اول ماسمعت هالكلام من الطالب فيصل وعرفت انه قرر يحذف ترم على اخرة قلت لازم اتعرف على فيصل اكثر واستشف منه سبب حذفة للترم هل هو سبب عائلي او سبب دراسي , اذا كان السبب دراسي ناقشتة بالمضوع حتى استفيد منه اكثر ولاأقع في نفس غلطتة. . . خلص الكلاس وحاولت اتكلم مع فيصل لكن ماسمح لي الوقت وحتى هو كان مايسمح له الوقت وكل واحد راح لكلاسة الاخر , وخلص الدوام وانا راجع لشقتي وافكر بأسباب جعلت الاخ فيصل يحذف الترم على النهاية تقريبا دعوت الله ان لايجعلني في موقف حذف الترم على نهايتة , وصلت لشقتي العزيزة ولازال التفكير يراودني عن اسباب حذفة للترم ( اتمنى ماتفهموني غلط وتقولون هالشخص ملقوف ^_^ ) بس حتى اتحاشى استفيد من تجربة الرجال , وانا جالس افكر وافكر واستخرج بعض الاسباب وبعض الاشياء اللي ممكن تكون سبب لـ حذفة الترم , وبعد عناء طويل مع التفكير توقفت عن التفكير وقلت ماعندي الا اني اسألة بكرة بأي شكل من الاشكال واذا كان الوقت مايسمح له باخذ رقم جوالة وبناقشة لأن الرجال عندة خبرة اكثر مع هالمادة وابي اعرف منه اكثر عن مواد التخصص وخصوصا انها مرحلة حساسة جدا جدا في بداية المسيرة نحو التخصص . بدء الكلاس الثاني والثالث . . حتى قدرت اوصل للرجال وتناقشت معه : انا : السلام عليكم يافيصل فيصل : عليكم السلام , ماشاء الله تعرف اسمي بعد انا : ايه اعرف اسمك بسبب شي واحد بس فيصل : وش هالشيء اللي جعلك تعرف او تحفظ اسمي انا : تذكر قبل كم يوم , وقت ماكان الدكتور يقول اسماء الطلاب للتحضير وقال اسمك وقال لك انه يتذكر انك منزل المادةمعه الترم الماضي وقلت له ايه يادكتور كنت منزل المادة معك لكن قررت احذف الترم على نهايتة تقريبا فيصل : ايه ماشاء الله عليك حافظ السالفة انا : ايه حفظتها والسبب ابي استفيد من تجربتك لاأكثر يافيصل فيصل : طيب امر وش تبي مني بالضبط انا : في البداية قبل لاتجاوب على اي سؤال , اذا كان سبب حذفك للترم عائلي الله يسهل عليك واسف على المضايقة , اذا السبب الاهمال الدراسي او اي سبب دراسي انا ابي اعرفة واستفيد منه الله لايهينك يافيصل فيصل : تبي الصراحة , انت تعرف ان هالمادة مهمة جدا في التخصص وانا كنت مطنشها في البداية ويوم وصلت في نصف الترم حسيت بصعوبة كبيرة في الفهم مع الدكتور وحسيت ان تخصص الكهرب ماعاد ينفعني او بالاحرى ماكنت مستعد لة اتم الاستعدد وجبت درجات سيئة للأمانه واضطريت احذف الترم على نهايتة بسب هالمادة فقط لأن باقي المواد كنت متمكن فيها ودرجاتي فيها كانت لابأس عليها انا : طيب معقولة تحذف ترم عشان مادة وحدة يافيصل فيصل : ياجعلك ماتحس بنفس الشعور اللي شعرت فية وقت ماحسيت اني بسقط في اول امتحان التخصص لي , ويوم عرفت ان مالي امل بالنجاح وخصلت الفترة المسموح فيهالحذف الموادواضطريت اني احذف الترم كلة والسبب هالمادة فقط فقط انا : الله يوفقك ان شاء الله وبيننا ان شاء الله تعاون في هالترم خلصت محادثتي مع فيصل وانا في راسي الف علامة استفهام , وكنت وقتهااقول ان تلك الاستفهامات ستتلائى مع الترم وراح اعرف كل شي في وقته ان شاء الله . خلصت دراسة ذاك اليوم ورجعت لـ شقتي وجلست افكر هل معقولة في يوم يوصل اني احذف ترم عشان مادة او ماشابة , يارب استر بس . . . اول مارجعت قررت ارتب لي جدول دراسي بحيث اجعل لـ مواد التخصص نصيب الاسدمن الوقت وخصوصا مادة EE201 لأني الكثير من الطلاب وحتى دكتور المادة كان يقول ان هذه المادة هي من اهم المواد وهي البنية الاساسية لتخصص الكهرب , رتبت جدولي وخلصت وقررت في نفس اليوم اذاكر لمادة التخصص هذه وحسيت من البداية بسهولة المادة ومتعتها ومع الوقت بدأت المادة تزيد حلاوتها لأن اي دائرة كهربائية ممكن تحلها بأكثر من 4 طرق واهل الكهرب يعرفون هالشي في الدوائر الكهربائية ... . ومع الوقت ومع اي سؤال يواجهني احاول احل المسألة بكل الطرق اللي اعرفها واتأكد من الحل هل هو صحيح وهل هو مشابة لحل للطريقة الاخرى وبدأت بتسجيل ملاحظاتي في ورقتي ورقة الملاحظات وكتبت كل طريقة وشروط تطبيقها وبعض الاسس عنها , حتى تمكنت من كل الطرق الل تحل الدوائر الكهربائية وكنت للأمانه احل تدريبات كثيرة حتى اتقن حل مثل هالمسائل . . بدء اول كويز وكان السؤال يقول حل الدائرة الكهربائيه بطريقتين مختلفتين وكنت مذكورة الطرق في السؤال وتأكد من ان الحل مطابق في الطريقتين, والحمد لله كنت متمكن منها وحليتها وتأكدت منها , وكنت اشوف بعض الطلاب يحاولون مع الدكتور ويقولون لة يادكتور تكفي طريقة وحدة بس والثانية مايحتاج , وقوبلت بالرفض من الدكتور , المهم انا خلصت من الكويز وسلمته وطلع بعدي على طول زميلنا فيصل وتكلم معي وقال لو سمحت بسألك عن الاختبار , قلت له اسمع انا اكثر واحد في العالم يكرة يراجع اسألتة بعد الاختبار , وقلت له انتظر تطلع النتائج وبعدها لكل حادث حديث . . الكلاس اللي بعده طلعت النتائج وكانت مرضية تماما لي ومرضية نسبيا لصديقنا فيصل , انتهى الكلاس وبعدها كلمني فيصل وقال لو سمحت ممكن رقم جوالك حتى نقدر نذاكر مع بعض ونجتهد انا وانت مع بعض لأني مرتاح لك كثير , انا عطيتة رقم جوالي وتيسرت ووقت مارجعت لشقتي ورن الجوال الا وخوينا فيصل يتصل وانا مارديت علية , قلت في نفسي اخاف اذاكر معه ويصير لي ( نشبة ) وماأستفيد منه اي شي بل العكس ممكن يشغلني ويخليني ماأذاكر زي الناس , وبعدها رجعت شوي وقلت افرض اني في مكانة واتصل على واحد ويطنش , اكيد بتحس في النفس رجعت اتصلت علية وقلت له انا معك ان شاء الله وراح نذاكر للمادة سويا من هنا الى نهاية الترم ان شاء الله بس بشرط , لازم توافق على شروطي وعلى مواعيد المذاكرة بينناقال انا على يدك اليمين وابشر جلسنا مع بعض جلسة وحددنا فيها اهدافنا لـ هالمادة ومواعيد المذاكرة الجماعية بيننا . . .. بــ صراحة تامة , توقعت ان الرجال مستواه العلمي اقل من المتوسط توقعت ان الاستفادة الاكبر ستكون لة وليست لي , بدأت اولى جلساتنا مع بعض واستشفيت من فيصل العزيمة القوية جدا ماشاء الله على تعويض مافاتة الترم الماضي , وكان الرجل مجتهد لأبع الحدود بدء اول اختبار شهري لنا , والمفاجأة السارة , انا وفيصل من اعلى الدرجات في الفصل وليست الاعلى , واول ماطلعنا من الفصل وكل واحد ابتسامته شاقة وجهه نقول لبعض والله المذاكرة الجماعية والافكار اللي طلعنا فيها فادت فينا كثير . . مع الوقت حمدت الله على قبولي المذاكرة مع فيصل لأنه بدء يطرح لي بعض الافكار الغائبة عني وانا كذلك بدأت اعرض علية اشياء كانت غائبة عنه وبدأنا بتشكيل افكار كثيرة وغريبة عن الامتحان الثاني . . . بدء الامتحان الثاني وكانت النتائج شبية لدرجة كبيرة جدا من الاختبار الاول ونفس السيناريو يتكرر والابتسامة شاقة وجينها فيصل : تصدق والله الجلسة معك فادت فيني كثير انا : بقول لك شي بس لاتزعل , انا والله كنت معااااااااارض جدا لفكرة اني اذاكر معك لأسباب كثيرة , اولها تخيلي انك مهمل وانك غير مبالي وراح انحدر بمستواي معك , لكن يشهد الله يافيصل انك افدتني كثير الله يعطيك العافية وان شاء الله نكمل المادة سوى ونطلع بنتائج حلوة مع نهاية الترم . . قربت فترة الاختبارات النهائية وطحت في ورطة غبية نوعا ما , وهي تنزيل مادتين اسلامي وعربي في نفس الترم وهذا غلط كبير راح اذكر لكم اسبابة بعد قليل واحد الاسباب ان بين هذين المادتين في الاختبار النهائي نصف ساعه فقط فقط المهم نرجع لمادتنا EE201 ونبدء الاختبار النهائي له بعد مذاكرة طويلة وكثيرة بيني وبين فيصل زميلي واتفاجأ للأمانه بوجود فكرة قوية قالها لي صاحبي فيصل اوقات المذاكرة بيني وبينة وكنت اقول مستحيل يافيصل احد يفكر مثل هالتفكير الا وتجي في الاختبار النهائي وانا احل اقول الله يوفقك يافيصل ان شاء الله , ونطلع من الاختبار وفيصل جاي بسررررررعه , اقول وش رايك في الفكرة اللي قلت لك عليها ^_^ شفتها جت . . . انتهى الترم والحمد لله المعدل طيب فية وراح اذكر لكم في الرد القادم ان شاء الله اهم ماأستفدت منه في هالترم لأن مساحة الرد لاتكفي اني اجعلها في رد واحد
واستفدت كثيرا ايضا في هذا الترم اهمها : 1) البداية القوية والموفقة ان شاء الله في مواد التخصص تجعل من هذا التخصص شي محبب للقلب كون انك اتقنت البداية اتقان طيب , وهذا راح ينعكس اكثر على فهمك للمواد المستقبلية لهذا التخصص ان شاء الله . 2)الاستعجال بالحكم على الناس خطأ , كما حدث معي وتصورت بسوء مستوى فيصل العلمي بسبب اهمالة في الترم اللي قبلة , فـ لولا الله ثم فيصل ومذاكرتة الجماعية معي لما تحققت هالنتائج المميزة لابد ان نعرف ان بعض الطلاب يملكون مستوى علمي مميز , لكن للأسف هم لايعرفون تميزهم او بالاحرى لايحاولون زيادة تميزهم بل للأسف يتهاونون في امور كثيرة رغم انهم قادرين على فعل اشياء مميزة كما فعل فيصل زميلنا , فـ من بعد حذف الترم وتطنيشة , الى الحصول على درجة عالية وممتازة في بداية مواد التخصص 3) المذاكرة الجماعية فيها من العلم والراحه الشيء الكثير , بشرط ان يكون الطرف الثاني في المذاكرة الجماعية او الطرف الاخر سواء كان شخص او اكثر في نفس المستوى العلمي وتقارب في الافكار حتى يحصل الامل المنشود من هذه المذاكرة الجماعية 4) انزال مادة عربي واسلامي في نفس الترم من الاخطاء الشائعه اللي ممكن يقع فيها اي طالب في الجامعه ولايعرف مدى تأثيرها في المستقبل الجامعي له , انا نزلت في هذا الترم مادة اسلامي وعربي , غير ان الاختبار النهائي بينه تقريبا ساعه بالكثير , الا ان السلبية في هذا الموضوع ليست هنا فقط . . السلبية الاكبر انه في التدرج الجامعي , راح تواجهك في بعض الاترام صعوبة في المواد وتحتاج انك تزيد ساعات الترم بمادة اسلامية او عربية, واخذك لمادة عربي واسلامي في نفس الترم يخليك تخلص من العربي الاسلامي في وقت مبكر , ويجلعك في احد الاترام مُجبر على انزال ساعات كثيرة وجميعها دسمة , وكنت تتمنى لو بقى لك مادة اسلامية او عربية حتى تشيل عبئ الساعات اسف على الاطالة اكتب لكم هالكلام وانا مضطر الان للخروج لظرف طارئ جدا , لكم كل التوفيق ان شاء الله
الله عيطيك لف عافية ما شاء الله تبارك الله والله تصلح تحطها في كتاب وتحط العنوان مذكرات من حياتي ^_^ الف شكر لك متاااابع
الله يعطيك الف عافيه على الدرر اللي تقولها وانت رفعت من معنويااااااتي الشيء الكثير بغير قصد منك لانو انا متحير بين هندسة كهربائيه وهندسة ميكانيكيه وانا اصلن ابي هندسه كهربائيه والناس تقول انو مش سهل بس لما انت قلت انو لو تعرف تحل الدوائر بالطرق الاربعه راح تتسهل انا الحمد لله ارتحت لانو انا اعرف احل الدوائر وهذا الدرس بالذات هو احسن درس مر علي في فيزياء ثالث لانه كان ممتع >>>>يتمنى انه ما يكون يتكلم عن درست ثاني دمت بالخير والصحه
بيض الله وجهك كفيت ووفيت حبيبي عايش ..واللي اجمل من كذا ذكرك لشخصيات كانت معك في رحلاتك الجامعيه <<<مشتاق لرحلات المدرسه الحقيقه وانا اخوك توني ماطبيت ارض الجامعه وهذي اخر سنه بثالث ثنوي توها مابدأت ,بس يوم قريت الموضوع عن حياتك مع الجامعه وتجربه قلت وش خسران خلني اكمل اقرا ,والحمدلله كل اللي مريت فيه انت ,مااتكبر واقول اعرفه لا, سبق وان مرو ناس بهاالكلام ماافادوني مثلك بس دايم احب اسألهم ليش وليش <<<مثلك ملقوف<<<بينضرب والحمدلله فكرتي عن مابعد القبول ممتازه , ... بس المشكله يوم اشوف الوضع واحسب حسابات جدا سيئه لعدم قبولي للبترول واحط احتمالات وفرضيات مالها اول ولا تالي .. والاول والاخير طموحي هندسة بترول , يوم اقول فجامعة البترول ويوم اقول سعود .. وبس وانا اخوك هذي يدي اللي كتبت نيابه عن خيالي نسجته في فكري وجعلته اطروحتي واتمنى من التوفيق لي وللجميع يارب العالمين . مع قمة التفائل اوقات ننسى انفسنا الله ييسر الامور يارب ونعيش ايام جميله نقدر نسردها لأخواننا ونعيش على أمل جميل ^_^ اخوكم مقرن والسنه الجايه تحكم معكم ولا مو معكم ,,,الف تحيه وأسف على الاطاله يتبع <<<<
بيض الله وجهك على هالموضوع الابداعي يا صاحب الأفكار المبدعة صدقني انا قادم باذن الله للبترول في السنة التحضيرية وانا متحمس للغااااية بفضل الله ثم بفضل تشجيعك لنا متابعين ولا تتأخر علينا تحياتي
يفضل نقل الموضوع الى القسم المخصص له , لأ، هذي ساحة المقبولين الجدد أو بالاصح طلاب الثانوي والقبول واستفسارات وماالى ذلك ... ارجو الاهتمام ونقله لساحة الخريجين والدراسات العليا أو السنه التحضيره يرجى الاهتمام ايها الاخوه , للإفاده العامه , اخوكم مقرن,,,