كيف استثمر حياتي الجامعية ......

وعليكم السلام ورحمة الله وبركاته

بجاوبك على النقطة الأولى، والشباب يفيدونك بباقي النقاط

نصيحتي استثمر حياتك الجامعية ببناء معدل يرفع الراس، مرتبة الشرف الثانية بيكون شي ممتاز،

اذا قدرت توصل لمعدل فوق ٣.٥ وقتها دعّم سيرتك الذاتية بشهادات في تخصصك او بعمل جزئي مرتبط ايضا بتخصصك

الاندية الطلابية بعضها مفيد جدا وينمي فيك مهارات كثيرة في التواصل والقيادة والعمل الجماعي، شف لك اي نادي له نشاط وحضور والتحق فيه، لكن لا يكون هالشي ع حساب معدلك،

try your best to raise your GPA if you are willing to get employed in a professional company

 

و عليكم السلام
شيئ جميل إن تكون عندك الرغبة لاكتساب المهارات و تطوير نفسك قبل التخرج لكن قبل هالشي لازم تعرف شي معين ، الهدف من الدورات و التطوير و هالأشياء مب إنك تعبي السيرة الذاتية . الهدف إن تستفيد منها وتطور نفسك سواء شخصيا أو في تخصصك و إذا حققت هالهدف النتيجة بتكون شخصية ممتازة & تمكن من التخصص و سيرة ذاتية ممتازة .

اقولك هالشي لأن شفت شباب بس يسجل في أندية او يحضر دورات عشان تتسجل في السيرة الذاتية لكن في الواقع ما استفاد منها ، فايش المانع انك تستفيد و نفس الوقت تضيفها للسيرة ، لأن ماتدري ممكن في مقابلة يسألونك عنها بشكل مفصل و لو ما جاوبت بيطلع شكلك غلط.

بعض الدورات الي في الجامعة ما تهتم فيها الشركات ، او بشكل أدق ممكن يكون تأثيرها شخصي يعني مثلا الدورات الي تتعلق بالشخصية وكيف تنظم وقت و من هالكلام ، مستحيل الشركات تهتم بهذا النوع م الدورات لكن لما تحضرها و يكون المحاضر شخص فاهم ومميز وحط خطين تحت فاهم و مميز , في هالحالة بتستفيد وممكن تكتسب عادة جيدة او تطبق نصيحة ويكون لها أثر ايجابي على دراستك أو حياتك . هذا الي اقصده بالتأثير الشخصي. وهالتأثير ممكن يغيرك للأفضل ، فيعني تأثير هالنوع من الدورات في التوظيف يعتبر غير مباشر .

نجي للنوع الثاني من الدورات : وهي الدورات و الشهادات الي تكون في التخصص ، حاول تأخذ دورات في البرامج المهمة في تخصصك , طبعا احيانا الأندية الطلابية تعلن عن دورات للبرامج ( تحصلها في الهاشتاق او اللوحات في المباني ) هالدورات ماراح تخليك تتقن برنامج معين لكن بتساعدك تفهم الأساسيات وتخليك تطبق بعض الاختصارات او المهارات في مشاريع الكورسات وبتسهل عليك الشغل . وبعض البرامج تهم الشركات مثلا الأوتوكاد , او hysys بالنسبة للكيمكال ، فلما تكون فاهم فيه حتى لو بشكل متوسط راح يميزك نوعا ما خلال التدريب او في الوظيفة .
وهالنوع من الدورات أو الشهادات المعتمدة تعطي انطباع جيد لمسؤولي التوظيف انك شغال على نفسك و فاهم في البرامج الي الشركة شغالة عليها .

طبعا لاتفهم من تصنيفي ان الدورات الشخصية او العامة مب مهمة ، بالعكس الشخصية و مهارات التواصل مهمة وممكن كثير من الخريجين ماحصل وظيفة بسبب إن مهارات التواصل عنده اقل من المستوى المطلوب ، لكن الي اقصده ان الدورات العامة تأثيرها بيكون على شخصيتك ويفضل تأخذها عند محاضرين مميزين ( وللأسف نادرا ماتحصل محاضرين مميزين)
اما الدورات التكنيكال فبتساعدك خلال الدراسة في مشاريع الجامعة ، و بعد التخرج لو كانت البرامج او الشهادة معتمدة راح تميزك عن بقية المتقدمين نوعا ما.


الأندية الطلابية ، نفس الشي مستحيل انها تكون سبب رئيسي في توظيفك ، الشباب يمدحونها لأنها مع الوقت بتساعدك على تطوير شخصيتك وممكن تلاحظ هالشي لما تتدرج في النادي وتكون مسؤول فيه عن نشاط معين ، ممكن تكتشف إنك تصلح تكون قائد او وجودك في النادي طور من مهارات التواصل عندك وزاد ثقتك . لكن مثل ماقلت لك مستحيل شركة توظف شخص بس لأنه كان رئيس نادي او عضو فعال فيه ، ممكن يعطيهم هالشي انطباع جيد لكن مب يكون سبب رئيسي في توظيفك.

طبعا فيه خيارات ثانية غير الأندية الطلابية ، مثلا لو حاب تطور مهارة الإلقاء و ال public speaking بإمكانك تنضم لتوستماسترز .
قائمة : حسابات الأندية الطلابية في مواقع التواصل الإجتماعي

بخصوص العمل الجزئي ، رايي اول شي جرب العمل التطوعي أو الأندية الطلابية ، وتالي جرب العمل الجزئي خاصة لو كان برا الجامعة عشان لا تشتت وتشغل نفسك بأشياء كثيرة و ممكن تأثر على دراستك ، وبعد ماتحس نفسك تعود على العمل في الأندية و الدراسة ، ابتدي في العمل الجزئي وانا افضل العمل الجزئي في الجامعة لأن الدوام غالبا مرن ومناسب للطلاب.



الأهم إنك تتذكر انك جاي الجامعة عشان شهادة و تفهم تخصصك ، فلا تبالغ كثير بالإهتمام بالأنشطة وتنسى الدراسة و لاتسوي العكس ، فحاول توزان بين الجانبين.
ومثل ماقال بوريان ، حاول تجيب أعلى المعدل لأن للأسف هو المعيار الأول في فرز المتقدمين في أغلب الشركات.

هالموضوع فيه بعض المعلومات ممكن تفيدك
نصائح كنت أتمنى أسمعها في بدايتي بالجامعة + روابط مهمة

الله يوفقك واسف على الإطالة