للجميع : كيف تتم المفاوضة على الراتب

موضوع جميل .. لكن خبرتي ماهي كافيه للاجابه

ننتظر اهل الخبره

شكرا لك و دمت بوود’’|

 

طبعا قدمت على إحدى الشركات وطبعا كنت أعمل في شركة، وبعد تجاوز المقابلة الشخصية، أرسلوا لي العرض وفيه الراتب فقلت لهم هل بإلإمكان زيادته فقال الرواتب لحديثي التخرج لايمكن التفاوض فيها، يعني من هم أقل من سنتين في بعض الشركات....

أهم شي أنك تسأل من هم بنفس تخصصك وخبرتك الوظيفية سواء أقل من سنة، خمس، عشر سنوات،،، وتعرف رواتبهم.. لأنه ممكن يحصل فيه خطأ من قبل إدارة الموارد البشرية.. ولأنك إذا وقعت على العقد صعب وصعب جدا تغيير الخطأ لاحقا...


بالتوفيق

 

بقولك عن تجربه شخصيه

كنت في شركه ( أ ) في المنطقه الشرقيه و كانت عارضه علي مرتب منخفض 7500 كفل بكج و أثناء عملي معهم بعد فتره بسيطه وردني أتصال من شركه ثانيه (ب) و قال لي أنت وش اللي راح يخليك تغير موقع شركتك و تجينا الرياض , قلت له بالحرف فرق مادي لأن الراتب الأول منخفض قال تقريبا كم قلت 1500 ريال أو أكثر و فعلا حصلت على أكثر و لله الحمد و طلعت من الأولى

بعد فتره طويله شويه اتصلت علي شركه ثالثه (ج) و عملت المقابله و كل شيء كان ممتاز و لله الحمد سألني فالمقابله عن راتبي الحالي و اجبته بصدق , وصلني العرض الوظيفي بعد فتره و اتضح انه نفس راتبي الحالي بالضبط ..

ارسلت له رساله اعتذار و قلت له صراحه أنا كنت أتوقع ان وظيفه بهذا المسمى ( اللي كان أعلى من مسماي في الشركه ب) يتطلب راتب أعلى من راتبي الحالي و فعلا جاتني زياده فيه 1000 ريال و قليل عن الراتب الأساسي للشركه (ب) لكن ما رحت لهم .. لأن الوظيفه الحاليه لي فالشركه (ب) و الوظيفه المعروضه علي فالشركه (ج) في قطاع ما له دخل بتخصصي بشكل كبير ..


عموما من خلال واقع تجربتي السابقه اشوف الآتي :-

1- لا تلعب بالنار إذا هذي أول وظيفه لك .. أسمكها و أبحث عن غيرها إذا كان عرضها ضعيف مثل شركه (أ)

2- تكلم بصدق .. لو كان عندك وظيفه ثانيه و سألوا فالمقابله عن راتبك الحالي فيها .. و غالبا راح يعطونك نفس الراتب علشان يتأكدون أنت تبي شركتهم أو الماده همك الأول ..

3- لو تساوت الرواتب .. رتب أولوياتك ..

4- أفضل طريقه لطلب رفع الراتب هي الآتي .. لكن أستخدمها بحذر

إذا كانت هذي ثاني وظيفه لك .. قل لهم انا من الصعب اني أطلع لشركه ثانيه من شركه تأقلمت معها إن لم يكن هناك فرق مادي جيد يساعد على التأقلم .. و أنتو تعرفون الآن أصبح لدي اساسيات و مباديء فالعمل بشكل عام فراح أكون أفضل من المتخرج حديثا

إذا هذي أول وظيفه احرص انك تعرف كيف كانت عقود من كانوا قبلك فالشركه لأن بعض الشركات هداها الله .. توقع لثلاث أشخاص في نفس المجال .. برواتب مختلفه

دائما تذكر شيء مهم أن بعض الشركات لها سلم رواتب واضح و معروف .. راح يكون من الاستغراب انك تناقشهم عن الراتب لأنه ستاندر .. فاحذر من هذا الأمر ..​

 

فهد، ليه تقول لهم راتبك الحالي يوم كنت بالشركه (ب)؟ هم يبغون يعرفون راتبك الحالي عشان يعطونك الفرق او يعطونك مثله... من الافضل انك ماتقول لهم الراتب واذا فتحوا موضوع الراتب، باغتهم بسؤال "كم عادة تعطون الناس على هذي الوظيفه"!!

 

تستطيع ان تتفاوض عندما تملك الخبرة الكافية في اختيار ما تريد من الشركات لأن الشركات ستكون بحاجتك
أما عندما لا تملك شي فببساطة بقولوا "فيه ألف واحد غيرك"
وبعضهم يقول "الناس تدفع لي عشان اوظفهم"

هذي بركات الشركات المحلية
ولو ما إلزامهم بنسبة سعودة كان حتى السكورتيه صاروا أجانب

 

من واقع تجربة الخريجين الجدد وخاصة اللي اقل من سنة بمجال العمل يكون في صعوبة بالتفاوض على الراتب مع الشركات
وكل ما تتقدم بك الخبرة يكون عندك مجال اكبر للتفاوض وحتى يمكن يوصل الى اكثر من 50 بالمية من راتبك الحالي
ونصيحة اذا تم سؤالك عن راتبك الحالي ومافي مجال تتفادى الاجابة عليه اعطيهم راتبك زائد 30 بالمية ولا تذكر لهم راتبك بالضبط وبعض الشركات تطلب كشف راتب للشركة اللي شغال فيها فحاول تعطيهم كشف يكون فيه زيادات مثل اوفرتايم او غيرها
وشركاتنا هنا اذا ما يكون عندك (وخلني اقولوها على بلاطة: خبث) راح يأكلوك

بالتوفيق للجميع

 

ما يكتمل الابليكيشن حقه إلا يعطيهم تعريف براتبه من شركته

 

متكهرب.. انا يوم توظفت في سابك، طلبوا مني تعريف بالراتب ورفضت! قلت هذا شئ بيني وبين شركتي الحاليه.. كملت اجراءات الوظيفه بدون مايعرفون راتبي السابق

 

دكتور مجنون وش تخصصك ؟

 

سستمز انجنيريقنك وكمبيوتر ساينس

 

أضيف لما ذكره الشباب أن التفاوض يكون على قدر مؤهلاتك الدراسية الخبرة و أمور كثيرة لا حصر لها من التخصص و الجامعة ربما حتى قبيلتك أو مظهرك (و إن كان ذلك يندرج تحت العنصرية) ... كل شركة لها أولويات مختلفة و لكل وظيفة متطلبات ... أنت تفاوض إذا كنت تعلم أن هناك شيء يدعوهم للتمسك فيك حتى لو كانت خبرتك سنتين أو أقل بعض الشركات تتسمك بالخريجين الجدد المتميزين مثلا لديه مرتبة الشرف الأولى فهم يعلمون أنك جاد في إنك لن تقبل بأقل من راتب معين أو درجة وظيفية معينة.

أنا عرضت علي في الفترة الأخيرة عروض كثيرة و رفضتها رغم أني لا أملك من الخبرة إلا أقل من سنة و نصف. ففي آخر مقابلة عملتها عرضت علي وظيفة بمنصب مدير و براتب أعلى من زميل آخر بنفس الدرجة و بخبرة أكثر من خمس سنوات و لديه درجتين ماجستير كما عندي ... الخلاصة إذا كنت واثق من إستحقاقك و كنت جاد فغامر لأن هناك إحتمال كبير إنهم ما يقبلوا مفاوضتك و يختاروا غيرك لذلك تحمل نتائج المفاوضة حتى لو كان هناك عرض وظيفي و هذا الشيء حصل معي أيضا ربما يوجدون سبب لإلغاء العرض رغم أنه عمل غير قانوني فضلا عن كونه غير أخلاقي.

 

موضوع جميل ..

لكن يا دكتور أتوقع إنهم يقدرون يعرفون من خلال التأمينات الإجتماعية

 

مدري ياحمد اذا يعرفون او لا عن طريق التأمينات الاجتماعيه

 

الموضوع قديم لكن عندي بعض الملاحظات عليه
أنا عندي خبرة 5 سنوات و للأسف كل ما تجيني عروض سواء بالاتصال أو الايميل يعطوني أقل من الي أستلمه حاليا مع أنهم في كل مرة يسألوا عن راتبي و أعطيهم تفاصيل الراتب كاملا و بعضهم طلب مني البي سلب و لكن للأسف يصرون على نفس العرض دون زيادة
خلال الخمس سنوات جتني 4 عروض كلها أقل من راتبي حاليا فقط واحدة من العرض أعطاني أكثر بعد ماتفاوضت معهم بالقوة و أرسلت لهم البي سلب أما البقية فتجاهولني حتى بعد إرسال البي سلب
هذه إحدى التجارب التي حصلت معي خلال التفاوض للاسف
ما لا حظته هو أنه سبب ذلك هو فشل hr في تقييم خبرة المتقدم لوظيفة معينة من خلال السيرة الذاتية للمتقدم فهو لا يدري عن هذا المتقدم للوظيفة كم يستحق من الراتب من خلال خبرته

up.....

 

اذا خبرتك اقل من 3 سنوات .... التفاوض صعب

اذا خبرتك أكثر من 3 سنوات انت اطلب زيادة 20 في المئة من راتبك الاساسي كأقل حد عشان توافق تنقل من شركتك القديمة...... بالتوفيق

 

بالضبط إذا عندك خبره تقدر تفاوض على الراتب .. وعلى فكره التفاوض مع ال hr على الراتب المعروض على حد علمي انه مايضر .. يعني مايقدر يقول " خلاص صرفنا النظر عنك مانبيك تتوظف عندنا " لإن قرار التوظيف من المنجر اللي سوى لك المقابله .. والتفاوض على الراتب مع ال hr .. بالعاده إذا انت كوويس والمنجر انبسط وبغاك تتوظف يقوول لل hr عطوه راتب كوويس !!

ال hr بيحاول قدر المستطاع انه يقلل من الزياده .. بس لما تفاوضه يزيدك !