مالذي استفدته من ترم 162

- حاول قد ماتقدر تخلي السمستر الاخير خفيف ( 14 ساعة بالكثير) لأنك بتكون مشغول بالمقابلات و نفس الوقت المشاريع بتكون اثقل و بيضيع اغلب وقتك عليها.

- ابتدي من بداية السمستر الأخير لك في الجامعة في التقديم ع الشركات و لاتبين لهم إنك مابعد تتخرج لأن أغلب الشركات تسحب على الي ما تخرج رسميا . ونفس الوقت لاتقدم على كل الشركات بنفس ال cv حاول كثلا لكل 10 شركات cv معين عشان لو طلع واحد من النماذج الي سويتها لل cv فيها خطأ او كان سيئ مب كل الشركات راح تسحب عليك .

- يمكن هالشي يضحك , لاتخلي جوالك صامت اخر سمستر لك خاصة لو بديت تقدم ع الشركات من بدري ، بعض الشركات تدق عليك للمقابلة مرة وحدة واذا ما رديت مايتواصلوا معاك حتى لو رجعت ودقيت على نفس الرقم وهالشي صار لي مع شركتين لكن ان شاء الله انها خيرة .

- اهتم بالسينير بروجكت لأن اغلب المقابلات راح تركز عليه ، اذا كان شغلك تلفيق او معتمد على بقية القروب او اجتهدت في البروجكت هذا الشي راح يبين في المقابلة .

- حاول تحضر الدورات والنشاطات المتعلقة بتخصصك بداية من السفمور وراح تحس بقيمتها وفايدتها مع اخر سمستر لك لما تدخل المقابلات و لما تكتب ال cv .

- حاول قد ماتقدر تستفيد من الكورسات ، لو استفدت 30 % من كل كورس ، على اخر سمستر بتكون كونت موسوعة علمية ومع اي مقابلة تركز على الأشياء التكنيكال راح تكون فاهم وتقدر تأخذ وتعطي . اما لو نظامك كان احضر للكلاس عشان التحضير ، احفظ ، اختبر ، نهاية السمستر انسى كل شي : راخ تتعب في المقابلات وحتى على اخر سنة ماتكون عندك ثقة في معرفتك وفهمك للتخصص .

 

أبعد نفسك عن الضغط النفسي والارتباك ، وصدقني راح تشوف نتائج مبهرة.
كل شيء بالرواقة يجي.

 

تعلمت ان لا انزل ساعات كثيره السمستر الثاني لكي اذا تقدمت الاجازة مانضغط . لقد اكلتها هذا السمستر و ان شاء الله يعدي على خير

 

تعلمت انني أنجز تحت الضغط

 

- الفاينل أحيانًا يكون غدّار .

- المتابعة أول بأول هي النصيحة اللي أنصح فيها دائمًا، لكني طول مسيرتي الدراسية عجزت عن تطبيقها حتى هذا الترم، هي أول أسبوعين ثلاثة وبعدها يبدأ التهاون والتكاسل، والهوموركات نسخ ولصق. متفائل إني إن شاء الله من الترم الجاي بكون قادر على تطبيقها حرفيًا لأن النتائج متأكد إنها راح تكون مبهرة.

 

- اللي عنده شرط 2.5 , تذكر الهدف الاساسي لك انك تجيب هذا المعدل فنزل لك 12-13 ساعة بالكثر , وخلها كلها سهلة يعني اسلامي وعربي مع بعض + GS اذا تقدر تنزلة مواد يعني سهل انك تجيب فيهم قريد , عشان ما يجي نهاية السمستر بعد الفاينلات وتشوف نفسك اقل من الشرط وتدخل في دوامة معاوية تاج و ادارة القبول ودسمس مرة ثانية وهذا الكلام

- الفاينلات تغير كثيير من المعطيات في القريد النهائي فشد حيلك فية كلها اسبوعين ثلاثة ومخلص وتستانس

 

شغلك طوووووووووووووول الترم وتعبك = c , الفاينل هو زبده الزبده في جامعه الملك فهد

الترم هذا فيه ماده ليفل 3 مياجري فيها 18 و 20 من 20 , وجبت العيد في الفاينل وطلعت ب c+ ..

ماده ثيرمو 2 , طول الترم جايب العيد , وبدعت ايما تبديع في الفاينل ( اتوقع 29 من 30 ) وجبت فيها c+ وانا كنت خايف من F

بالاضافه : اذا احد قالك الماده الفلانيه تجيب فيها A+ لا يعني اسحب على ام امها لانها سهله , ولكن ضع لها الكثير من الجهد والتركيز لانها A+ فالجيب , وهذا صار لي مع ماث 202 وريحت منها شوي وطلعت بقريد B واخوياي كلهم A+ ..

القهوه العربيه + السهر لمده 36 ساعه امور قد تحدث من فوق خشمك , فاستمتع بها وشدددد ي وحش

كل ترم في جامعه البترول فيه ضغط , اما آآن لك ان تعي ذلك عزيزي وتكف عن البحث عن الراحه المزعومه !!!

اي دافور يتفلسف عليك ونظم وقتك وقرقر المعتاد , اسحب عليه وركز على شي واحد فقط , كيف اجيب قريدات شيوخ باي طريقة كانت ..


بالتوفييييييييييييييييق للجميع ورمضان مبارك