محتار بالمسمى الوظيفي احتاج مساعدتكم باسرع وقت

انا ماني مهندس ولكن مع الاوضاع الحالية وغلاء المعيشة ما اشوف انه عادي تتنازل عن فرق دبل الراتب عشان مسمى

للأمانة راتبك الحالي راتب Technician بغض النظر عن المسمى

مجرد اعتقاد : اظن التطوير وبيئة العمل في جاكوبز افضل من شركتك الحالية

وانصحك بالاستخارة قبل كل شي

 

لا تروح بعيد
المساوئ ممكن من أول ما تدخل الشركة تشوف مهندسين مثلك و مناصبهم أعلى منك و أنت تشتغل تحتهم و ذي قمة الغبنة

المهم أنك تشتغل شغل المهندسين و ذي نقطة مهمة

أوصيك بالاستخارة و حاول تغير المسمى
فعلا الأمر محير و متعب الله يعينك و يكتب لك اللي فيه خيري الدنيا و الآخرة

 

اقترح عليك اول خطوة انك تكلم ال HR في شركتك الحالية وتوريهم العرض وتتفاوض معهم انهم يرفعون راتبك.
اذا رفضوا تفاوض مع الشركة الثانية على مسمى انجنير وبين لهم انك متحمس لاكن ودك في بوزشن مهندس واحياناً يقبلون، انا مره استدعوني ل مقابلة على مسمى (فني صيانة) وطلعت بعد المقابلة بعرض (مهندس مشروع).
واذا غلبت الروم اتوقع ان الشركة الثانية كخبرة وتطوير راح تكون افضل من شركتك الحالية وعرضهم ممتاز.

 

وعليكم السلام


اول شي بعطيك نبذة عن الشركات وممكن انت تعرفها بما انك موظف:

مسمى مهندس في الشركات الصغيرة سهل تحصل عليه بخبرة او بدون. ولكن في الشركات الكبيرة اغلبها تتطلب خبرة وهنا صعب يوظفون مهندس حديث تخرج بمسمى مهندس لان مو كل شي درسته راح يكون بالشغل. راح تشوف حاجات ومسميات ممكن اول مرة تسمع عنها بحياتك وخاصاً اذا الوظيفة في غير مجالك.

على حسب كلامك راتبك الحالي ٦٠٠٠ والمسمى الوظيفي مهندس. ولكن خلينا نشوفها من زاوية اخرى: هل المهندس يستحق راتب ٦٠٠٠؟ هل انت تعبت ودرست وكرفت عشان تستلم ٦٠٠٠؟ طبعاً لا وفي الوضع الحالي هذا الراتب ما يسوي لك شي. وانا متأكد ان التأمين الطبي مش ولا بد الي عطوك اياه.

بالنسبة لجايكوبز ، عطوك مسمى فني وراتب يعتبر ممتاز دامه فوق ال١٠. هل تتوقع راح تشتغل طول عمرك بمسمى فني؟ هل تتوقع في شركة امريكية معروفه مثل جايكوبز ماراح تتطور وتصير مهندس او مدير قد الدنيا؟

نصيحة اخ وانا انصحك لاني كنت في مكانك بيوم من الايام. ادخل جايكوبز و وريهم انك انت المهندس! وصدقني اثبت وجودك واجتهد وراح تاخذ المسمى الي تبيه.

واذا الاوفر الي وصلك حق المشروع الي بتحلية الجبيل احلى واحلى لانك راح تشتغل مع موظفي التحلية وكذا تكون علاقات وماتدري يمكن يكون رزقك معاهم اذا اعجبتهم ( اعرف واحد في نفس المشروع والحين صار موظف في التحلية ) وكان المسمى حقه نفس الي عطوك اياه. والله يوفقك ويرزقك ماتتمنى.

 

مادام ان الشركة اسمها عالمي ومعروف مثل جيكوبز.. روح وماعليك
تعتبر اضافة قوية بالسيفي. واذا بتقدم وظايف ثانية الخبرة من الشركة هذي بيدعمك كثير.

والمسمى الوظيفي يمكن يتغير بعدين اذا كلمتهم.

غير كذا يعتبر دبل الراتب فهي فرصة.

 

تقدر تتوظف بمسمى فني واذا جاك عرض اخر تقدر تكلم الشركه وتغير مسماك في التأمينات الي مهندس قبل ما تطلع من عندهم

الموضوع ما فيه اي تعقيد

الله يوفقك