محتار ما بين هندسة بترول او هندسة كيميائية؟

الهندسة البترولية مشكلة مستقبلها الوظيفي محدود في كم شركة كبيرة فقط ، أحد اقاربي تخرج من جامعتنا قبل سنة تخصص هندسة بترول للآن ما لقى وظيفة .

لكن الهندسة الكيميائية مطلوبة بشكل كبير في الكثير من الشركات وبامكانك تكمل ماجستير بالخارج على حساب الشركة .. وتستطيع العمل في شركات المنطقة الشرقية او الغربية في ينبع ورابغ وغيرها

 

دور عن تخصص مجالاته واسعه عشان لاتتعب !

ابعد عن البترول

 

ابعد عن الهندسه ,, اذا تبي الراحه والقريدات ووظايف اريح كمان ...

اسال اهل الادارة المتخرجين كيف كانت دراستهم وكيف فرصهم !!!

امانتن انا ندمان اني ما دخلتها (

 

من ناحية الراتب البتروليوم اعلى لكن سلبياته مثل ما قالوا لك الشباب بس اذا انك بتجيب معدل فوق 2.75 ممتاز ان شاء الله بتحصل وظيفة بسهوله

 

اذا تبي رايي ..
ادخل هندسه كيميكال .. واذا تخرجت راح تكون بين خيارين

الاول هو الفرصه انك تشتغل بشركات البترول كـ Schlumberger وطقتها .. ويمديك وقتها تاخذ خبره جيده بالشغل ..

والخيار الثاني .. انه يمديك تشتغل بشركه تطبق فيه تخصصك مثل صداره وساسرف وياسرف وطقتها ..

>> اما اذا دخلت بتروليوم >> لو تطامر مني لبكره .. مالك الا شركات البتروليوم ..

 

1- المستقبل الوظيفي: يعتمد على الشركة مو على التخصص
2- الراتب: يعتمد على الشركة مو على التخصص
3- امتيازات العمل: يعتمد على الشركة مو على التخصص

4- سهولة المواد او ان صح التعبير أيهما استطيع الحصول على قريدات افضل
ديبارتمنت البترلويوم عندنا شباب فوق الـ 3.9، 3.8، وعندنا أقل من 2.5، لكن الاغلبية حول الـ 3. المواد عادية وفي نظري مائلة للسهولة ما عدا كم كورس

5- مجال العمل: يعتمد على الشركة مو على التخصص


صدقني، كل شي يعتمد على طموحك وإرادتك. إذا انت من الناس اللي مهتمين بمجال النفط والغاز وبمجال الطاقة اجمالا وعندك قابليبة كبيرة للسفر وحياة الرقوق (rig مفردها) وايضا ما عندك مشكلة نتكرف في اول كم سنة بعد التوظيف (بس فيها فلوس من جانب اخر)، ادخل هندسة البترول. ودي اعطيك معلومات اكثر بس عندي مياجر، لي رجعة قريبا

 

وعليكم السلام ورحمة الله حياك الله باش مهندس ​

​

​

​

الكيميكال أفضل,, لأن المهندس الكيميائي مجال عمله واسع قد يعمل في تحلية المياه أو في تكرير البترول أو في البتروكيماويات أو في البولمرات والبلاستك أو في انتاج الأدوية والأطعمة ولكن مهندس البترول مجال عمله محدود في البترول بس. وهذا الشي واضح في يوم المهنة الطلب على الكيميال أكبر بكثير من الطلب على البتروليوم.

​

​

يمكن البترول أعلى شوي بحكم طبيعة عمله ولكن مع الوقت والخبرة أعتقد ماراح تفرق واجد بينهم.

​

​

على حسب الشركة, مثلا شلمبرقير تودي المهندسين إلى جميع مناطق العالم فلا تستغرب إذا رحت للبرازيل أو فنزويلا علشان تتدرب هناك .

​

​

خذ قاعدة مني قبل لا تدخل أي تخصص هندسي, كل تخصصات الهندسة مهي سهلة وأيضا في نفس الوقت مهي صعبة. هي تعتمد على ميولك ورغبتك الشخصية وايضا تعتمد على قدرتك. مثلا أنا دخلت الهندسة الكيميائية لأني أحبها وراغب في التخصص ولكن مستحيل أنجح أو أكون مهندس كهربائي لأني فاشل في الكهرب وأكره كره شديد .

​

​

الكيميكال أوسع كما ذكرت سابقا

​

نصيحة اخوية:
​

لا تسمع كلام فلان وعلان واحد يقول لك ادخل كيميكال والثاني يقول لك خلك بتروليوم. اختر انت بنفسك التخصص اللي تحبه بعد القراءة العميقة والدقيقة عن كلا التخصصين. شوف وش هو ميولك ورغباتك بعد كذا اختر التخصص المناسب.

​

بالتوفيق ​

​

 

مثل ماذكر اخوي كمست, اختيار التخصص في النهاية يعتمد عليك انت. في النهاية هذا مستقبلك وانت اللي راح تدرس وتتعب وانت اللي راح تتوظف وماحد غيرك. أقرأ وابحث عن التخصصين وشوف أيهما أنسب بالنسبة لك وتحس انك راح تبدع فيه. اخذ معلومات من الأشخاص لكن لا تاخذ بآرائهم لأن زي ماذكرت هذه حياتك انت. وانت اللي مسؤول عنها.

بالنسبة لتخصص الكيميكال أخوي كيمست ماقصر حاط لك موضوع متكامل عن التخصص ويفيدك في معرفة أغلب المعلومات عن التخصص ويمديك تتوسع في البحث. وبالنسبة لهندسة البترول ابحث في قوقل واقرأ واسأل اهل التخصص شنو هندسة البترول بالضبط وشنو المواد اللي تدرسها وشنهو مخرجات الدراسة و...و...و.... إلخ.

واذا محتار استخير.

أسأل المولى عز وجل أن يكتب لك اللي فيه الخير.

دعواتك

 

وعليكم السلام ..

شوف اخوي انا بقولك كم شغله ، اول شي انا دخلت هندسه بترول ، وقبل ما ادخل بصراحه كنت محتار بين التخصصين ، وفي النهايه اخترت البتروليم ، اول شي بكون معاك صريح انا لما دخلت البتروليم ما كان رغبتي او بمعنى ثاني ما تخيلت بعمري اني اكون مهندس بترول ، ودايم كنت اقول انا حدي هندسه كمبيوتر ، وكنت في هندسه الكمبيوتر وحولت للبتروليم ..

هندسه البترول:
1- موادها سهله جدا جدا جدا ، ما عدا تقريبا 3 الى 4 مواد من كل المواد ، هم الي يتحتاج تتعب عليها شوي ، وطبعا مافي تخصص مافي ماده صعبه

2- انت ايش تحب ، وهذا بيريحك كثير اذا انت ميولك لعالم النفط والغاز ، فما بتلاقي احسن من البتروليم اما اذا ميولك للكميكال ، فا توكل بدون اي تفكير ، لان بيكون بصراحه فرق بين التخصصين بشكل ما تتوقعه ، يعني اختار الي تبيه والي تحبه انت والي تشوف نفسك بالمستقبل

3- تخصص البترول ، ممكن يطلعوك برررا 3 سنوات او 4 او اكثر ، وممكن ما يطلعوك وبعدين يطلعوك ، وممكن تطلع سنه وترجع سنه وبعدين تطلع سنتين وكذا ... وانت ماشي ، يعني لازم تكون متفهم الوضع وتكون مستعد لهالشي

4- سالفه الرواتب ما يحتاج لها كلام ، من ناحيه كل التخصصات الهندسه والي اعرفه عن نفسي ، ما افي اعلى من مهندس البترول.

5- شركات البترول صح انها قليله ، وماهي كثيره بالعالم ، بس بتاخذك اذا كان معدلك من 2.5 وفوق ، واكبر مثال السمستر الي راح رحنا للشمبرجر مع الديبارتمنت وقابلنا المدير ، وقال لنا احنا بالعاده ناخذ الطلاب الي اقل من 3 ، الطلاب الي معدلاتهم 3 وفوق ياخذونهم طبعا بس بالاغلبيه للمكاتب (لانهم داوفير ) ، فا يعني ان شاء الله مافي خوف من هالناحيه ، وطبعا يعني لا تكسل نفسك وتقول بياخذوني وخلاص ، لا لازم تتعب عن نفسك

وفي النهايه مثل ما قلت لك ، اختار الي يناسبك والي تشوف نفسك فيه كويس

وموفق عزيزي

 

كان ودي أنصحك بس توي طالع من اختبار المادة الوحيدة المشتركة بين التخصصين (che 204) و حدثت أشياء عجيبة هناك تخليني في وضع غير قادر على اعطاء أي نصيحة

 

لا تذكرني تكفى ، انواع التاليف بالاختبار ههههههههههههه