معيد في الجامعة vs مهندس في أرامكو

يا اهلا وسهلا
اول شي بعلمك شغله بالنسبه كمهندس موظف في ارامكوا
الراتب اقوى + الامان الوظيفي + تقدر تحصل ع قرض البيت + خبرتك في ارامكوا راح تعطيك مجال انك تروح لشيء افضل واقوى من ناحية الخبره والمميزات و و و ..
لكن ممعيد الميزه فيها الدوام المريح نسبياً + ابتعاث
لكن الماده ماراح تفرق معاك الا بعد ما تبي تتزوج ان شاء الله وودك تكون مؤسس نفسك ماديا صح .
انا من وجهة نظري ارامكو افضل لك كقوه وخيارات كثيره بس الجامعه ماراح تكون عندك الا خيارات نادره

 

ببساطة لو بتكمل دراستك والجامعة بيبتتعثونك تكمل ماجستير ودكتوراة فهذا شيء ممتاز جداً وعن نفسي انا كان عندي فرصة اني اسلك هذا الطريق لكنني رفضت لسببين:

1- جربت اشتغل بحوث وفعلياً اكتب ورقة علمية جاهزة للنشر لكن عرفت ان الشيء الوحيد اللي استمتعت فيه بهذه المرحلة هو مرحلة الـ implementation، وهنا عرفت ان هذا الطريق مو لي.

2- فيه اشاعات واتوقع بتصير حقيقة في السنوات القادمة، وهي ان رواتب الدكاترة في الجامعة راح تكون حسب دخل الجامعة، وبيقل الدعم الحكومي.

لكن فيه مميزات للدكتور:

1- بيئة عمل ممتعة.

2- ممكن يشتغل استشاري مع شركات محلية او عالمية ويستلم راتب فوق الراتب حق الدكتور.

اما انك تكون مهندس في ارامكو فهذا شيء عادي، مثل اللي يكون مهندس في اي شركة ثانية رواتبها مثل رواتب ارامكو. يعني بتصير مثل الموظف العادي، تشتغل وتكرف وترجع من الدوام تعبان ولا لك خلق تسوي شيء، وتتقدم بحياتك وتشوف لك فرص اقوى او تنتشر ترقياتك وتثابر لها.

 

ارامكو افضل بكثييييييييييير

لاتفكر باللحظه الحاليه

قدامك زواج وبيت وحياة

 

أنا ماراح اقول لك وش الافضل من ناحية الرواتب والامان وغيره لانك المفروض عارف هالشي راح يكون لمصلحة ارامكو. اذا انت تشوف نفسك او ناوي تكمل في المجال الاكاديمي تكمل ماجستير ومن ثم دكتوراة وبعدها تكون دكتور بالجامعة هنا اقول لك خذ وظيفة المعيد بس اذا كنت ناوي تشتغل بشركة وبنفس الوقت تبي تكمل دراستك الماجستير والدكتوراة هنا اقول لك روح ارامكو افضل لك حاليا والدراسة لاحق عليها بالمستقبل.

 

بحكم اني كنت مهندس في ارامكو بعدين طلعت والحين محاضر في جامعة الملك عبدالعزيز، راح اعطيك خبرتي البسيطة، بالاضافة الى كلام "صدق من قال":

- العمل الاكاديمي ينعشك اجتماعياً وتتعرف على دكاتره وباحثين من جميع انحاء المملكة بينما العمل في الشركات يقتلك اجتماعياً و١١ شهر نوعاًَ ما تكون مملوك للشركة حتى بعض الاحيان ماتحصل وقت تقضيه مع اهلك.

- العمل الاكاديمي يسمح لك الفرصة لاكمال دراساتك العليا وبناء اسم لك بالابحاث والتعليم ولو نناظر معظم الوزراء واعضاء الشورى كانوا في يوماً ما اعضاء اكاديمين بعكس الشركات وخصوصاً ارامكو تحتاج وقت وعمل عشان تترفع وتبني اسمك في حدود الشركة فقط.

- العمل الاكاديمي يسمح لك بتكوين عضويات بالاضافة الى محاضراتك مثلاً تكون عضو بهيئة الابحاث والاستشارات بجامعتك او عضو في المدن الصناعية والهيئات البحثية في المملكة وهنا تعوض المقابل المادي اللي بتحصل عليه في الشركات.

-العمل الاكاديمي صراحة عمل انساني ومهنه شريفة خصوصاً اذا كنت تحب نشر العلوم والابحاث.

-العمل في الشركات قد يكون ذو دخل اعلى في البداية لكن صدقني كل شي بحسابه من الشغل في اماكن نائية وتحت ضغوط العمل والشمس وساعات اطول بعكس المهنية والآريحيه في العمل الاكاديمي.

-العمل الاكاديمي مع الوقت لما تحصل على الدكتوراه وبتكون على الاقل عضو في هيئتين خارجية او داخلية راح يكون راتبك جداً ممتاز وفوق راتب الشركات وايضاً ساعات اقل.

وفي الاخير انت اعلم بقدراتك والله يوفق الجميع،،،

 

مُشاركة تُكتب بماء الذهب

 

صلى صلاة الاستخارة ولو اكثر من مرة ..
ارجو الله أن يوفقك للخير دائما

 

ما شاء الله الشباب اراءهم جدا مفيدة ...

بالاضافة الى ما تفضل به الاخوة ... انا برأيي أنت اكثر شخص ممكن يستطيع أن يتخذ القرار المناسب لك , استمع لصوتك الداخلي , قبل لا تحدد اي قرار , تعرف على نفسك وطموحات المستقبلة ... اسأل نفسك اسئلة مثل / ايش تشوف نفسك بعد 10 سنوات من الان ..؟ بناء عليه تقدر تتخذ القرار المناسب .؟

بالنسبة لي " الوظيفية الاكاديمية" هي الوظيفة المثالية من ناحية تكوين الهوية الذاتية المستقلة للشخص , مثال ؟ انا شخص احب البحث العلمي واجد فيه متعة كبيرة جدا

لذا لو توظفت كـ أكاديمي في الجامعة , الوظيفة راح تعطيني استقلالية كبيرة في بناء الابحاث والافكار الخاصة فيني ...
سلبية العمل الاكاديمي انه عمل روتيني وممل من ناحية " اعطاء المحاضرات وعمل و تصحيح الاختبارات وغيره "

العمل في الشركة خاصة الكبرى مثل ارامكوا , ايضا له ميزات خاصه المادية , لكن هل انت من النوع الي تحب البزنسس .. ؟؟!

العمل في شركة مثل ارامكوا راح يعطيك ميزة انك تأسس نفسك ماديا بشكل قوي , بعد كم سنة راح تشوف نفسك ان عندك مبلغ كويس , يمكن تبتدي فيه البزنس الخاص فيك , ثم بشكل تدريجي تتخلى عن العمل في الشركة ..

لكن زي ماتفضل الاخوة , اذا كنت تنظر انك تريد تتطور من خلال الشركة , فالوضع أصعب , لان ارامكوا كلها مبنية على كفاءات والمنافسة سوف تكون شديدة

فكلا الامر في النهاية يعتمد على شخصيتك ونظرتك لنفسك وطموحاتك المستقبلية ... والله يوفقك