ملخص مقابلة سابك للبتروكيماويات

السلام علاكم

شخباركم شباب ان شاء الله تمااام

ادري ان الوضع متأزم وكلكم بانتظار نتائج القبول


المهم يا مهمين بس حبيت اسلم عليكم << بيتكفخ

امزح وياكم بس حبيت اقوولكم اليوم وش اللي صار بخصوص مقابلة سابك .. يمكن تستفيدون منها


اول شي رحت .. لشخص شكله ينظم .. ما شاء الله عليه اخلاق رفيعة .. وخلاني اتفضل اقعد على الكرسي اللي كان لونه تقريبا ازرق << دقيق

واخذوا مني المعلومات .. وبطاقة الاحوال والشهادات ويسألني عن القياس والتحصيلي .. يبي يتأكد اني حافظهم ولا لا

المهم خلصنا وقاال رح استريح في القاعة .. واشرب لك شاي او عصير



وشوي يطلع اسمي... يا فلان .. رح جا دورك << اول واحد ..

طبعا على فكرة المقابلة الساعة 1 ونص .. وانا موجود هناك من 12 وثلث << دافور


المهم مالكم بالطويلة << هو باقي شي ما قلته


المهم يامهمين

ادخل غرفة فيها ثلاثة اشخاص على طاولة .. ويقووولون تفضل حياك حياك


ويسألوني عن اسمي .. والمدرسة وخرابيط عادية



نبدأ في الجد الاسئلة اللي انتطرحت علي ..<< ترى كل اللي فوق مقدمة بس


وادري انكم مو جايين الموضوع إلا علشان الاسئلة المهم خلينا نشوف

- سألني وين سافرت قلت له امريكا وبريطانيا وكندا وغيرها .. قاالي درست فيها انجليزي قلت له ايه

وقام يتكلم بالانجليزي .. يقوولي وين سكنت هناك وكيف كان الوضع .. وبعدين سألني عندك جيرل فريند ولا لا .. قلت له انا ما عندي هالسوالف << شلاخ

المهم بعدها رجع للعربي .. قالي وش هواياتك

قلت له كرة القدم والسلة . و السباحة .. طبعا نصيحة لوجه الله لا احد يقوول ان هوايته القراءة او الشعر لأن بيحقطون له لين ما يقوول امين ..إلى ان يعترف ان القطو يبيض << مبالغة

إلا اذا كنت فاهم في الشغلة

المهم مسوي بيحقط لي .. سألني كم عدد لاعبين السلة .. وقلت له .. بعدين سألني كاس العالم لكرة القدم .. وين بتكون


الحين الزبدة جاب لي سؤال .. ما ادري من وين طلعه

وش الصفات اللي يكتسبها الشخص .. من ركوب الخيل .. لا تسألوني وش الاجابة .. لاني قعدت اخربط من عندي بس الحمد لله سلكت اموري


بعدين جا سؤال خش في نص المقابلة .. من هو وزير الداخلية


ما علينا ..

بعدين قالي .. انت ما شاء الله عليك باين انك انسان متحدث وما تشعر بالخجل وشو السر

قلت له انا في المدرسة .. دايما تصير فيه لقاءات من ناس خارج المدرسة و انا اشارك فيه واجد يعني ومن هالحركات


بعدين سألني انت تشارك في عمل تطوعي .. قلت له اكيييييييييد

طبعا سكت لوهلة << حلوة وهلة

وتذكرت سباق الجري الخيري اللي تنظمه مدرستنا الظهران الأهلية كل سنة .. قلت يلاااا طلعت فايدته واخيرا .. واتكلم لهم عنه واسولف وكذا يعني


بعدين سالني لو بعثناك .. لأمريكا مثلا وهي رغبتك الثالثة .. هل بتوافق ولا لا .. قلت له اكيييييييييد اوافق انا هدفي انجح في الحياة .. وين ما تودوني بإرادة الله بانجح << واثق

وبعدين سالني حتى الوظيفة .. قلت له ايه ما تفرق وياايي لو تشغلوني في الصين .. ما عندي مانع << شلاخ


بعدين سألني .. وشوو الحاجتين اللي يحتاجهم الشاب بعد التخرج من الجامعة .. قلت له الوظيفة والحياة الزوجية



بعدين
سألني السؤال الأهم .. لو حصلت قبول من اكثر من مكان وشوو تسوي ..:: جاوبته استخير اول شي << الاجابة ماخذها من شخص ذكرها في المنتدى .. الزبدة لما قلت له استخير .. استااانس هو ..علي


وهذي المقابلة اللي صارت لي .. اللي تقريبا كانت مدتها من 10 إلى 15 دقيقة .. والله مو متأكد بالضبط بس الزبدة اني ما حسيت بالوقت ابدااا .. وكان ودي نكمل المقابلة اكثر




ويلاا تشاااو 4 ناااااااااااااو

والله يوفقكم جميعا

وان شاء الله القاكم في مواضيع ثانية

احلى بااايااات
​

 

هلا اخواني

معليش True New انا بجاوب هنا عشان يستفيد الجميع

بالنسبة لنظام المقررات واللي هو مطبق في مدارس الظهران الأهلية << مدرستي .. ومدارس الحصان ومدرسة ابن باز . وكم مدرسة ثانية


المهم طبعا الشهادة تجيك من المدرسة مو مترجمة .. انت تروح في مكاتب خاصة لترجمة الشهادات

.. بالنسبة للدمام .. فقريب من الجوازات .. تحصل أماكن حق ترجمة ..

المهم خلصت من مسألة الترجمة

الحين قريب بس مو قريب مررررة من الجوازات بعد .. في مكان .. اسمه إدارة التسجيل والقبول .. إسأل عنه وما بتضيع ان شاء الله هذا خليه يختم لك الشهادات المترجمة ..

طبعا أنواع الختومات اللي بتصير لك .. بس لازم تجيب معاك الشهادة الأصل .. عشان يتأكدون ان العلامات مو ملعوب فيها

المهم بعد ما يختمون الشهادات المترجمة .. تروح وزارة الخارجية .. اللي تصير تقريبا بعد الكلية التقنية تقريبا

وتخليهم يختمون لك على الشهادة .. إلى الحين اوكي


بعدها تروح المكتبة تصور لك نسخة من الشهادة اللي عليها زحمة ختومات .. وتصور منها كم نسخة براحتك انت

بعدها تروح إلى ادارة التسجيل والقبول مرة ثانية .. وخليهم يختمون على النسخ الثانية .. ختم مكتوب عليه :: نسخة طبق الأصل::


وبكذا تنتهي المهمة .. وهذا بالضبط اللي سويته انا .. والله يعينكم جميعا

ومشكوور على مروركم

والله يوفقنا وإياكم


ملاحظة ختم الخارجية ضروري ولا ما في فايدة من شهادتك .. لأن الجامعات الخارجية تشترط ختم وزارة الخارجية