موضوع مهم احتاج نصائكم

السلام عليكم ورحمة الله وبركاته
الحمد لله تم قبولي في جامعة جازان
لي موضوع سابق كنت اسئل عن قبول الطلاب الغير سعوديين والحمد لله قبلوني مع اول دفعة للغير سعوديين ( طبعا مستحيل ينقبلو اول ترم يقدمو فيه اقل شيء ترم ثاني ، ممكن تقابل ناس انقبلو الترمم الاول لكن هذولي تلاقيهم انتظرو سنة كاملة للقبول ) الحمد لله يارب لك الحمد والشكر
، بدأ المسيرة الجامعية وللاسف جات كورونا وخربت الدوام وصار عن بعد ، ماخفيكم كنت احب الدوام الى حدا ما ( احب فقط محاضرات الرياضيات ) الباقي زي الانجليزي مضيعة للوقت و الحاسب و الثقافة حرفيا مو مستفيد منها لان مستواي كلهم فيها كويس
والحمد لله نزل معدلي 5 من 5 ،
السؤال الي مخليني اكتب الموضوع ، طبعا اول سنة تحضيري ثم تخصص في جامعتنا ، وللامانه محتار بين كيميائية او ميكانيكة لكن باذن الله 100% كيميائية عاد وش رايكم لاني من الثانوي اقول ابي هندسة كيميائية .
-
ايش الدورات الي اقدر اعبي فيها السي في ، يعني الحين لما صار كل شيء عن بعد ي رجل الاف الدورات تحصل ومجانية صراحة احس مالها فائدة في السي في ممكن تستفيد منها انت ك شخص لا اكثر ولا اقل ويمديك ي رجل تخش اليوتيوب وانتهى في بعض المواضيع طبعا مو كلها
لكن انا اتكلم عن الدورات الي تفيدني لما اقدم على شركات زي ارامكو سابك ، و الشركة الي ودي فيها شالمرجير ( Schlumberger )
ما ابغى اتخرج من الجامعة وانا ماعندي الا شهادة الباكلرويس هذا الي خايف منه جدا لذلك اي نصائح بخصوص هذا الموضوع ؟
ايضا ايش الشهادات الي رشحت اخواننا المتخرجين للحصول على وظيفة ؟ كمثال شهادة سيفتي الخ ....
ايضا اختبار ال fe ضروري ؟ لانه ب 3000 ريال حسب علمي !
الكثير ممن حولي ناويين يحولو والي يبي يروح itc حق ارامكو والي بينقل تخصص صراحة شيء محطم يفرون من الهندسة وكذا ،
ممكن في جامعة البترول ماتحصلو هذي العينات بسبب ان اصلا الي داخل البترول داخل بنسبة عالية لكن هنا عشان تخش الهندسة ما يبي لك نسبة عالية ابدا ابدا ، وايضا انا انقبلت في الترم الثاني ! ف تخيل فوق ما ان القبول سهل مايبي له موزونه عالية الدفعة الي معي انقبلو ترم ثاني ! ف للاسف وقت البريكات او الدكتور يغيب انا و الجوال بيست فرند ،
اتممنى الي عنده نصائح او بمعنى اصح طرق و طريق امشي عليه يخليني ماتخرج ب سي في فاضي ياليت يذكر لنا هنا نستفيد جميعا
ايش الاشياء الي تخليك قوي ك مهندس وتفيدك في الجامعة برضو وتفيدك لما تتخرج وكيف ايضا تستمتع ب الدراسة وما الى ذلك ...
بارك الله فيكم .