ياعيال معقوله المشكله في سيرتي الذاتيه ادارة اعمال خريج امريكا ٢٠٢١

ولله مثلك ياغالي بس هنا محد يصدق ان الوظايف صعبة

قدمت كل مكان شمال وجنوب وغرب وشرق وما انكتب لي شيء بس خيرة ان شاء الله ..

لاتيأس ياغالي قدم مكان وبكل الطرق يدوي وأونلاين .
بالنسبة ل P&G ارسلو لكثير رفض دون أسباب .

السيرة الذاتية ممتازة وماشاء الله مليئة بالإنجازات بس لو تضيف شوي الوان عليها .

الله يسهل عليك يارب ويرزقك أفضل وظيفة بإذن الله .

 

هلا مساء الخير

بالنسبة للوظايف الفترة الاخيرة بدا ينشط سوق العمل وبدا يتعافى بشكل كبير من كورونا اللي كان سبب في انعدام الوظايف اخر سنة.
بأذن الله راح تحصل الوظيفة الطيبة
أما يالنسبة للسيرة الذاتية حقتك فيها عدة أمور لازم تعدلها:
1- التنسيق غير جيد فمثلا فوق ويسترن بروفينس ورقم الهاتف متقدم على الباقيات لازم تخليهن مرتبات ولا يتقدمن على بعض كذلك بالنسبة لمهارات الكمبيوتر أيضا معلومات الاتصال ارفعهن فوق وخل السفت سكيلز يكون في خط واحد مع البروفشنل سمري ايضا في الاكسبيرينس السطور غير مرتبه كتنسيق.
2 - البرسنتج اللي حاطها للمهارات والكمبيوتر مالها داعي احذفها تشوه السيفي بدون فايده.
3 - في اللغة النيتف والادفانس اخرهن شوي.
4 - بالنسبة للشالنجز والبارتيسيبيشن الكلام جدا كثير وتصميمك للسيفي المفترض انه يكون رؤوس اقلام فقط فعندك خيارين يا أما تخليهن رؤوس اقلام فقط او اذا تبغى تتكلم بشكل مفصل أشوف انك تغير التصميم كامل.
حاول تعدل الأمور هذي لأن بكل صراحه كل واحد يفتح السيفي بيأخذ انطباع غير جيد بسبب سوء التنسيق والترتيب وحشو الكلام.

 

انا موظف اتش ار و لدي خبرة بالتوظيف شكل السيرة الذاتية غير مهم عند موظف الاتشار لان موظف الاتشار يبحث عن معلومات محددة في سيرة ذاتية بتوصيه من مدير التوظيف بمعني مدير توظيف او مدير القسم يطلب معلومات معينة مثال عدد سنوات خبرة دورات محددة في مجال معين و متي يقدريبدا يشتغل معنا بالشركة. وش يصير بعدها اذا وصلتني يسيرة ذاتية اقراْ هل طلبات مدير التوظيف مكتوبه بالسيرة الذاتية اذا مكتوبة ارسلها له اذا لا ادور على غيرة مدير توظيف يقرا سير التوظيف ويحدد اثنين او ثلاث للمقابله والباقي يكون انتظار.من الاشياء اللي يهتم فيه موظف الاتشار هو الهدف objective هذي اول شي اقراه لان اغلب الوقت يكون فاتح اكثر من وظيفة عندنا ف انا كيف اعرف اي وظيفة انت مقدم عليها عندي الا عن طريق حاجتين ام عن طريق الهدف الوظيفي او عن طريق مسماك الوظيفي في شهايد الخبرة او عن طريق عنوان الايميل مسمي الوظيفي ماهو اسم شهادتك اذا ما حصلت علي هذي المعلومات بسرعة ادور علي سير الذاتية جديدة لان الاغلب يكون وصلني عدد كبير والادارة تضغط تطلب سير ذاتية مستعجلة . الشي ثاني اذا كانت الوظيفه لحديث تخرج بالعادة نبحث عن سنة تخرج ويفضل ما يكون اشتغل و نبحث عن مكان السكن ندور علي شخص ساكن في نفس مدينة العمل او قريب منها و اسم التخصص او شهادة اذا كل شي تمام نحدد له مقابله مع مجموعة من المرشحين مع مدير التوظيف هو يختار منهم علي مزاجة وشخصيتك تلعب دور هي تحدد تكون الاسئلة صعبة عليك او سهله اذا حبك مدير التوظيف يريحك بالاسئله واذا ما شتهاك يعقدك بالاسئلة . لكن اذا تحاول تلون ملفاتك وتكتب باسلوب محترف بزيادة ترا محد يمك اهم شي يتطابق مع طلبات مدير التوظيف. اذا تبي تحصل وظيفة بسرعة لازم تشتغل مثل البحث قبل لا ترسل سيرة الذاتية لتوظيف اسئل موظفين الشركة وش محتاجين في الوظيفة ممكن هم محتاجين موظف له خبرة معين في سوفت وير معين بمعني شهادتك وخبراتك القديمه كلها ما لها معنى هم يبون شخص ممارس في هذا سوفت ويرحتي يخلص شغلهم مثال ساب اوتوكاد او فيس و غيره . اذا عرفت وش يحتاجون تغير سيرة ذاتية لهم حسب الطلب وترفق معها اثباتات حتى يتاكدوا من قدراتك واخيرا اقبل باي وظيفة حتي تقدر تدخل الشركة وبعده تحاول تقنع الموسؤلين يغيرون تخصصك لانك كذا يكون لك طريق تعرف احتياج الشركة و تقدر تكلم مع الاقسام اللي هم يوظفون فعلين وهذي من تجربة شخصية . ونقطه اخيرة موظف الاتشار ما يحب يحط ايميله الرسمي لانه ما يبيه يتعبى رسايل فا عشان كذا اذا حصلت ايميل منتهي ب جيميل او هوتميل الاغلب يكون صحيح . ونسئل الله توفيق لك ولنا وللجميع

 

السيرة الذاتية تحتاج شغل كثير، في نماذج كثيرة جدًا في النت ممكن تستعين فيها، ممكن حتى تدور أحد يضبطها لك بمبلغ رمزي.

نصيحة: شيل درجة الايلتس والجواز من الملف، مالهم داعي في هذه المرحلة.

 

اولا الف مبروك التخرج

ثانيا هذه ملاحظاتي على السيرة الذاتية وتعديلها بيكون بسيط عليك ان شاء الله:

1- الكتابة ماهي متناسقة بأكثر من مكان بتكون الكلمة يسار واللي تحتها يمين يعني تحتاج تنظيم عشان تكون سهلة للقراءة ، مثال على كذا لما تكلمت على المشاركات الكلام محشور تحت يسار وراح للصفحة اللي بعدها ولا زال رايح يسار وبرضه في العنوان
2- خلي السي في صفحة وحدة واستغنى عن المعلومات اللي مو مرة مهمة (مثل نسب كل مهارة لانه ممكن يقولك ليه التعلم السريع 99%؟ ما راح يمديك تحدد كيف حسبتها )
3- ماله داعي تكتب company وبعدها اسم الشركة ، حط اسم الشركة علطول وتحته المسمى الوظيفي
4- التحديات للأمانة مو ضروري تكون في السي في ، خليها ببالك عشان لو انسألت بالمقابلة عن التحديات تقولها
5- اللي يكون على اليسار المهارات واللغات وطريقة التواصل فقط ، الباقي خليه كله يمين بشكل مختصر (كذا راح يطلع مرتب اكثر عشان لا يصير اللي يقراه شوية يروح يمين وشوية يروح يسار)
6- الجواز والايلتس ماله لزمة حالياً ، خليه معاك لو احد طلبه فقط
7- تحت اسمك مو لازم تكتب تاريخ التخرج
8- بعض شهور التواريخ لاصقة بالارقام وبعضها فيها نقاط
9- الخط للمحتوى شوية رمادي شوية اسود ، يحتاج يكون موحد (مثال على كذا لما كتبت مهام كل وظيفة بالكهرباء رمادي والوظيفة الثانية اسود)
10- وضح انه المعدل من 4 او 5 ، واذا من 5 شيله افضل
11- المسمى الوظيفى لشركة الكهرباء كان بخط اكبر من المسمى الوظيفى للوظيفة الثانية
12- تأكد انه الحروف دايما كابيتال في بداية كل جملة
13- في الـ Summary بعض الكلمات كابيتال والمفروض سمول وبرضو بأماكن اخرى
14- الانقلش advanced بدال advance
15- رقم الجوال محطوط مفتاح الدولة وبعدها كمان 0
16- حاولت ادخل اللكندان حقك قلي page not found
17- اذا ما عندك مشكلة تشتغل بأي مدينة سوي نسختين للسي في : وحدة لوظايف جدة وتكون حاط مدينتك جدة ووحدة بدون مدينة بس saudi arabia
18- تأكد انه مقاس الخط متناسق مع بعض يعني مهام الوظيفة نفس الخط ومسمى الوظيفة نفس مقاس الخط
19- لو عدلتها الافضل تطبعها لانه احيانا السي في لما ينطبع ما يبان الكلام لو الخط فاتح او الخلفية فاتحة


كل التوفيق

 

الله يوفقك ويرزقك ويرزقنا... ملاحظاتي على الملف IBRAHIM_BUSINESS ADMINISTRATION اشوف تصميم هذا الملف افضل.

١- اخذف شعار لنكدان وامسح الرابط حط اسمك يعني مايحتاج الأرقام اللي بعد الاسم.
٢- التعليم قبل الخبره.
٣- اكتب الدورات اللي حضرتها وحاول تكون حول تخصصك واذا الخبره الثانيه لها علاقه بتخصصك حطها.
٤- المهارات حاول تزيد وتكتب اشياء ثانية، لان كل اللي كتابه عند الجميع حاول تتميز.
٥- حاول تسوي ملفين واحد مع الخبره والثاني بدون.
٦- غير نوع الخط وخله الكلام متساوي يعني السطر اللي فوق نفس اللي تحت وما يكون اللي تحت اطول من اللي فوق.
٧- حاول تغير تصميم العناوين واذا تقدر غير لونهم بعد.
٨- واذا ودك حط صورتك.
٩- اذا كان عندك مشروع تخرج حط يكون افضل ولا يكون نقاط.
١٠- المربع اللي ع اليسار تحاول تصغره شوي.

حاول تدور لك تدريب تكسب منها خبره.

الله يوفقك...

 

١١- واذا عندك اختبار انقليزي حطه يكون افضل

 

الله يعطيك العافيه على المعلومات و بسالك هل تحرصون تشوفو كل السير الذاتيه او اول ما تحصلون العدد الكافي توقفو بحث

ايضا وش الشخصية و الاسلوب اللي دايم تنجح فالمقابلات؟ هل تحبون التفصيل بالاجابه ام الاختصار