الحمدلله ، اليوم كان ال Assessment Day
وبحاول أذكر كل شي بالتفاصيل
امس تواصلوا مع الي عدوا المقابلة الأولى ودعوهم لل Assessment Day وللأسف بعض الشباب ماقدر يجي بسبب اتصالهم المتأخر
اليوم كان في مقر الشركة بالخبر و المفروض من ٨ الى ٦ لكن الي صار انهم تأخروا في البداية وفي بقية الاجرائات فتقريبا خلصنا ٧ الا ربع فإذا عندك رحلة احسب حساب هالشي .
البداية كانت بتعريف عن البرنامج وهذي بعض المعلومات :
العام الماضي الي انضموا للبرنامج ١٤ واحد .
وهذي السنة الي وصلوا للاسيسمنت دي ٤١ لكن بيرشحون 23
بياخذون صورة لك وكل طالب بيكون له رقم وراح يعطونك ورقة فيها اسمك و رقمك تعلقها في مكان واضح ، على جيب القميص مثلا ، اهم شي تكون واضحة ، بشرح تالي وش السبب
طبعا هذي السنة المرشحين بينقسمون ل ٣ اقسام :
Direct Hire
Production Engineer Program
Graduate Development Program
والبقية للأسف رفض .
والاسبوع الجاي بتكون النتائج , المشرفين على التقييم موظفين من مركز الشركة في دبي وموظفين من فرع الخبر .
هذي مراحل Assessment Day بالترتيب
Group Activity # 1
بيقسمكم الى قروبين كل قروب فيه ٢٠
وبيعطيك case study وفي كل case 3 سيناريوهات
فالي تسويه انك تقسم قروبك الى ٣ اقسام ، كل قسم يمسك سيناريو ويحلله
يعني المجموع ٦ قروبات في القاعة .
في كل قروب مطلوب منكم شي مثلا في قروب كان السيناريو ان شركة ، اسست شركة تابعة لها لكن بعد فترة انفصلوا والشركة الصغيرة بعد مدة واجهت مشاكل لأسباب معينة فالمطلوب تحلل اسباب النجاح والفشل في حال قررت الشركة الأم الاستحواذ على الشركة الصغيرة من جديد.
طبعا كل قروب(اقصد القروب الي فيه ٢٠ واحد ) تقريبا له ٤٠ دقيقة عشان يحلل و ٣٠ دقيقة للبرزنتيشن لكن لأن فيه قروبين معاك فكل قروب بياخذ ١٠ دقايق تقريبا .
والبرزنتيشن هو شرح للسيناريو و وجهة نظرك اكثر من انه برزنتيشن ، يعني تطلع وتشرح بدون بابوربوينت ولا شي .
بس وانتوا قاعدين تتناقشون فيه ناس قاعدة تراقبكم و هذا سبب وضع الارقام في مكان واضح.
Group Activity # 2
يوزعونكم على قروبات اصغر ومطلوب منكم عمل مودل لبرج ، طبعا يعطونك اشياء كثيرة مثلا فلين ، صمغ ، حبل و ورق ملون وغيرها من الاشياء
بعد ماتسون المودل راح يقيمونكم ويسألونك بعض التفاصيل مثلا في حالة الطوارى او حريق وين مخرج الطوارئ و نقطة التجمع ، هل الرياج بيكون لها تأثير او لا ومن هالأسئلة .
طبعا الهدف هو معرفة الفعالين في القروبات ويقيميون حتى المهارات الشخصية .
٨ اختبارات بعضها قصير وبعضها طويل
- اختبارين على الاشكال مثل اختبارات IQ بخلي روابط عشان توضح الفكرة .
IQ Test Experts - Sample Questions for Visual/Perceptual Skills
IQ Test Experts - Sample questions for Pattern Recognition Skills
- اختبار انجليزي ، قطع صغيرة وكل قطعة سؤال عنها.
- اختبار ، يعطيك.اكثر من سيناريو ويقولك اختر الاكشن المناسب والاكشن الغير مناسب .
- اختبار ، افترض انك مدير المبيعات في شركة معينة وطبعا تقريبا عندك ٨ حالات و مطلوب منك تفرزهم كذا
Low Priority
High
Medium
وفي كل حالة تكتب الاكشن الي بتتخذه ومع من بتتواصل
طبعا الحالات هي مثلا عبارة عن استقالة موظف عندك , او شكاوي عملاء او اجتماع كان المفروض المدير السابق يحضره او حضره واتخذ بعض القرارات , وفيه احصائية عن مدى رضى الموظفين في الشركة وكيف راح تتصرف .
طبعا هالقسم مقالي مب خيارات
- اختبار ، يسألك بعض الأسئلة العادية مثلا وش نقاط ضعفك ، وش تسوي في اوقات فراغك ، اذكر شي حققته وانت فخور فيه ومن هالكلام .
- اختبار numerical مشابه لاختبار ارامكو الاونلاين لكن الوقن قليل وبسبب التعب ممكن ما تلحق تحل كل الأسئلة
ارشادات وتوضيح هام عن Assessment Test
ولاتنسى تجيب معاك حاسبة
- اختبار personality , يذكر صفات وانت تحدد اذا تطابقك.او لا ، يعني تختار agree , strongly agreee , etc
طبعا خلال الاختبارات في بريك و في نفس الوقت فيه ناس تسوي مقابلات لكن في النهاية كلكم بتدخلون المقابلة وبتختبرون نفس الاختبار .
المقابلة :
تكون شخصية ، يعني مشابهة لأسئلة مقابلة بيكر هيوز :
تجربتي مع مقابلة بيكرهيوز, مع الاسئلة
لكن الفرق ان في النهاية بيسألونك قدمت على ارامكو ؟
اذا قدمت ، ليش ؟ شجايبك عندنا ؟ متزوج او ناوي تتزوج في الفترة الجاية ؟ مستعد تنتقل لدبي بعد اسبوع من قبولك ؟
الي يسوي معاك المقابلة اثنين او ثلاثة وكلهم يقرون الأسئلة من الورقة . الهدف من هالمقابلة يقيميون لغتك وكيف شخصيتك.
للأمانة الاختبارات ماكانت صعبة لكن لو كنت مستعد لها اتوقع ادائي بيكون افضل . الشي الثاني لا تجي وانت مواصل او تعبان فيه اكثر من واحد طلع من الاختبار وماكمل بسبب الصداع او التعب فحاول تجي وانت شابع نوم ومروق لأن الموضوع مب بس اختبارات ، فيه ناس تقيمك من بعيد وتقيم تفاعلك بس نصيحة نصحني فيها واحد من الشباب الي قد ادخلوا البرنامج : لا تسكت واجد ولا تتكلم كثير لأن بعض الي معاه استبعدوهم بسبب كثرة الكلام .
بعد ماينتهون راح يجمعون كل درجاتكم و التقييمات وبيجتمعون وبيقيمون المرشحين واحد واحد ويعرضون صورته على الموظفين المسؤولين عن التقييم
و ان شاء الله بعد اسبوع يردون عليكم.
في النهاية ، الي اقدر اقوله ان الشركة ممتازة و واضح انها تبي تطورك لو شافتك مؤهل بنسبة كبيرة للعمل معاها فلا تضيع هالفرصة لو جاتك في يوم من الأيام.
الله يوفقنا واياكم واسف على الإطالة لكن قلت ممكن هالتفاصيل البسيطة يحتاجها أحد في السنوات الجاية.
واذا في شي مب واضح او سؤال انا حاضر
إعجاب
