ثاني موضوع أشوفه اليوم عن حقوق الانسان في الاسلام -الثاني في قسم الدراسات الإسلامية-، و كلها كذا سرد معلومات و كلام انشائي، يبدو أن مدرس المادة معطيهم أساينمنت ينشرون هالمواضيع في المنتدى.
مثال جديد لتخبط هالمادة والله، قسم الدراسات الإسلامية و العربية عندنا شغلهم "دفها و إلحقها" بالعموم، بس هالمادة بالذات تحسهم متورطين فيها ولا يدرون وش يسوون.
كانت من اسوأ المواد الي درستها، و لو ابي أحلف أن ضررها على إيمان الطلاب أكثر من فائدتها، فيها يستعرضون شُبَه دينية كثيرة -مثل ظلم المرأة أو تحليل الإستعباد-، ثم يردون على هالشبَه بكلام انشائي غير مدعوم و غير مقنع، تحسه موجّه لطلاب في الإبتدائي. يعني لا هم الي حمونا من هالشبه -بعضها أول مرّة تمر علي و أنا قضيت مراهقتي كلها أجادل الملحدين عالنت- ولا هم الي ردّوا عليها رد شافي و دحضوها. كل الي كنت أفكر فيه بعد كل محاضرة هو أن كم طالب في هالكلاس انزرعت فيه بذرة شك، و متأكد أنه بيروح يبحث في النت و بتصير فرصة نجاته 50/50، اذا طاح على مصادر دينية ربي رحمه ،و ان طاح على مصادر إلحادية الله يعينه على السنين الجاية من حياته.
إعجاب