السلام عليكم ورحمة الله وبركاته بما ان مافي احد طرح عن الشركة شئ أو محد عنده معلومات عن الشركة أنا بكتب لكم هذي الرسالة وأي شخص عنده استفسار أو شئ يسألني وان شاء الله افيده ،
بحكي لكم عن نموذج التوظيف اللي مريت فيه مع الشركة , اول شيء بتمر بمرحلتين اولها اختبار لغة انجليزية وماث بعدها مقابلة شخصية مع مهندسين الشركة وبعلمكم وش الأشياء اللي صارت
الاختبار:
أنجلش وماث ،انجلش ٤٠ سؤال وماث ١٥ سؤال طبعً الاختبار كان على كمبيوتر ف معهد SPSP بالدمام والخفجي اقرب مكان لك يخلونك تختبر فيه ،اختبار الانجلش يحتوي على الريدنق والاستماع والقرمر بالعربي اساسيات اللغة طبعا كان سهل بس من ذاك السهولة أما اختبار الماث كان سهل جداً يحتوي على الأشكال الهندسية والجمع والطرح والقسمة والضرب والنسب المئوية.
المقابلة:
نظام المقابلة ان مهندسين الشركة يسوون لك المقابلة الاسألة اللي بتجيك منهم وش تعرف عن الشركة كم تبعد الشركة عن ديرتك هل أنت مستعد تشتغل ف منطقة نائية وبعيد عن اهلك وبيكذبو بيقولون ماعندنا الا تخصص واحد وهو انابيب أو لحام وأسألة عامة بعدين بيقولو لك تكلم عن نفسك بانجليزي طبعً إذا طلبو منك هذا الكلام لاتقول خمس كلمات أو ست وتسكت لان على طول بيسجلك رفض حاول انك تتكلم إلى مايقولك خلاص يكفي وبعدها بيوهمك بالكلام الحلو انك مقبول ومن هالكلام وحاول انك ماتاخذ كلامه بمحمل الجد وتفصل من شركتك أو جامعتك كثير شباب أوهموهم بالكلام الحلو وبعدها رفضوهم.
واخر شئ الفحص الطبي:
الفحص كان عن أشعة للجسم وتخطيط قلب ونظر وطول ووزن ،كان بمجمع المرجان الطبي بالدمام.
عدد المتقدمين للاختبار ١٤ الف عدد اللي وصلو مرحلة المقابلة ٢٢٠٠ ، عدد اللي عدو المقابلة ٧٠٠ ،
وتم تقسيم الطلاب إلى أربعة معاهد : معهد Niti ٢١٨ طالب،معهد Npa ٦٠ طالب ، معهد Spsp بالدمام ٢٠٠ والخفجي ٢٠٠.
طبعً وزعو الطلاب ف المعاهد عع حسب التخصص مثل اللي بمعهد Npa تخصصهم كهرباء والشباب الثانين لهم تخصصات الثانية ،
التخصصات المطروحة:
لحام ،الآلات دقيقة ،كهرباء ،انابيب ،تكييف وتهوية، رافعات ثقيلة.
مميزات تقدمها الشركة :
المميزات والأشياء اللي عطتنا الشركة وقت الدراسة السكن على حساب الشركة بدون ماتدفع ولا ريال مثل معهدNpa ماكان موفر سكن الشركة أخذت الطلاب وسكنتهم بفندق إلى مايشوفون سكن كويس لان تونا بادين دراسة، المواصلات حقين الأحساء مالهم مواصلات لان المعهد مايدعم أما المعاهد الثانية يوجد لديهم مواصلات.
الدراسة:
اول يوم بيخلونك تختبر لغة وبيعطونك اللفل اللي تبدا منه دراسة لفل١ أو ٢ أو ٣ وأنت راح تدرس خمس لفلات مثل من١الى٦ أو ٢الى ٧ وآخر شئ هي ٧ بعدها بتدرس التخصص ،طبعً سنة دراسة لغة وسنة دراسة تخصص ،الدراسة بتكون مناهج أرامكو يعني كتب أرامكو هي اللي تدرسها ،طبع راح يسلمونك ايباد جديد تدرس عليه وبعد ماتخلص دراسة تاخذه لك الا معهدNiti يرفضون انك تأخذ الايباد لك، الايباد يعطونك بلفل ٢، إذا أنت لفل١ يعطونك كتاب تدرس عليه بعدها يعطونك الايباد.
السيفتي وهو السلامة:
نظام الشركة نفس نظام أرامكو بالضبط مافي لعب أو خرابيط يركبون لك جهازdmd وهو يشمل سرعة وتفحيط وبريك قوي أو مفاجأ أو انك تضغط عع دعسه بقوة وحزام أمان ، تخالف هذي الأشياء الأولى إنذار الثانية طرد.
الحضور والغياب:
الشركة اكثر شئ يهمها هو الحضور وعندك الحضور يحتسب بساعات مو بالأيام عندك ٣٠ ساعة بعذر و٣٠ساعة بدون عذر، بتكلم لكم عن نظام الدراسة بمعهد Niti الدوام يبدا الساعة ٨:٠٠ مجرد تجي الساعة ٨:٠١ أبواب الكلاسات تتقفل بسبب ان الأبواب مبرمجة عع الوقت الدراسة باليوم ٦ حصص ، ٥ حصص انجلش وحصة وحدة مادة السيفتي كل مابين حصة بريك ١٠ دقائق وبريك فطور٢٠ دقيقة وبريك غدا ساعة.
المكافأة:
تنزل المكافئة كل شهر تاريخ ٢٥ بمقدار ٣٠٠٠، ٢٣٠ للتامين ،هذا اول سنه،ثاني السنة المكافئة تزيد وتصير ٣٥٠٠، طبعً بعد ماتخلص دراسة راح يكون في قريدات وأنت بعد ماتخلص بتتوظف عع قريد ٦.
أشياء غير مهمة:
الشركة مهتمة جداً بطلاب وتحاول تأخذ منا معلومات عشان تفيدنا وتفيدهم بالمستقبل لدرجة من اول أسبوع بدينا اختبار القبول للوظيفة كبير المشرفين ومسؤول المتدربين داخل معنا بالقروبات بالواتس وكان يعطينا معلومات عن الشركة ومو راضي يعرف عن نفسه الا بعد القبول سوا اجتماع للطلاب وعرف عن نفسه وطلع من جميع القروبات ورسل رقمه إذا عندك مشكلة أو شي تتواصل معه
أتمنى أني إفادتكم.
-
الساحة الجامعية العامة هي للمواضيع غير الأكاديمية، إذا كان لديك أية استفسارات أكاديمية [اضغط هنا]، وإذا كنت تريد النصيحة والاستشارة [اضغط هنا]إستبعاد الملاحظة
إعجاب