أفضل المشاركات: الفرق بين الجامعة والجامعات الاخرى

ميزات البترول (عن باقي جامعات المملكة بالاخص):


1- الانتقائية

مثل ما تفضلو الاخوان، بيئة البترول فيها افضل واذكى طلاب المملكة بسبب الانتقائية الشديدة في القبول.
هذا الشي يخلق بيئة جامعية متميزة عن بيئة باقي الجامعات.

على ايامي كان الابتعاث سهل (برنامج خادم الحرمين الشريفين الملك عبدالله) لدرجة انه القبول في البترول كان اصعب من القبول في الابتعاث. يعني جامعة البترول كان فيها طلاب افضل من طلاب كثيرين راحو برا.

طبعا هذا ما يعني انه طلاب البترول افضل من غيرهم بشكل مطلق او انه مافي طلاب متميزين خارج البترول، لكن الاغلب انه الطلاب الموجودين داخل البترول كانو متميزين من ايام المدرسة



2- المسؤولية

اغلب طلاب البترول ساكنين في السكن الجامعي. يعني بمعنى اخص هم طلاب جادين لدرجة انهم اختاروا انهم يسافروا بعيد عن اهلهم ويستحملوا الغربة في سبيل العلم.
وتجربة العيشة كشخص مستقل من عمر ال18 لها فوائد تنعكس على شخصية الطالب، مقارنة بالطلاب اللي فضلوا انهم يدرسوا في جامعات مدنهم ويسكنوا عند الاهل.



3- الكتب

كثير من طلاب الهندسة في باقي جامعات المملكة ما يعرفو شي اسمه كتاب... المعروف عندهم انه الطالب يشتري "شيتات" او ملخصات من المكتبة حقت الجامعة وتكفي يدرس منها وينجح في المادة.
اتذكر في ايام دراستي في البترول كان الكتاب هو الاساس والسلايدات او الملخصات عمرها ما تكفي. وكانت ميزة لنا انه الجامعة توزع علينا الكتب مجاناً فما كان فيه حجة عشان الطالب يقول ما حصلت الكتاب او ما قدرت اشتريه عشان ما يقراه.
هذا الشي يحسن التحصيل العلمي عند الطالب.



4- التركيز على الاساسيات

عدد ساعات الدراسة في تخصص المكانكل في البترول: 134 ساعة
عدد ساعات الدراسة في تخصص المكانكل في عبدالعزيز: 154 ساعة

طالب البترول في الاغلب يخلص كلاساته على الظهر لو منزل اغلبها صباحي
طالب عبدالعزيز في الاغلب يخلص كلاساته على المغرب كل الخمس ايام في الاسبوع

ايش الفرق؟
طريقة البترول هيا
We will be very tough in teaching you the basics, then your company will make you specialized according to its needs
تركيز البترول جدا عالي على تدريب الطلاب في الاساسيات العلمية واساسيات التخصص، لكنهم ما يتعمقو في المجالات الفرعية للتخصص
بالمقابل الجامعات الثانية موادهم اكثر وفيها تشعب اكثر

تركيز البترول على الاساسيات جنوني لدرجة انه الطالب مستحيل يغلط فيها... وهذي حتلاحظوها في سوق العمل

7 كورسات ماث بدون آلة حاسبة؟ النتيجة انه خريج البترول مسسسسستحيييييل يغلط في الحسابات ...
الشخص لو ما طور مهارة الproblem solving السريع والحل بطريقة صحيحة من اول مرة وبدون مراجعة ، ما حيقدر يعدي الاوريا والفريشمان في البترول.

هذي النقطة شفتها كثييييير في العمل عند خريجين الجامعات الثانية... لازم تراجع ورا شغله حتى لو كان مدير. يغلط في جداول، يغلط في ايميلات، يغلط في حسابات...



عبدالعزيز موادهم كثير. في المكانكل (فرع الثيرمل) مثلا كل طالب لازم يدرس هذي المواد المتقدمة في مجال الثيرموفلودز بالاضافة لنفس المواد حقت البترول:
heat exchangers
pumps
powerplants
refrigeration and airconditioning
internal combustion engines
Turbomachinery
Thermal engineering mesurements

في البترول الطلاب ما يدرسو الا اساسيات الثيرموفلودز (ايضا الزامية في عبدالعزيز):
Thermodynamics 1
thermodynamics 2
heat transfer
fulid mechanics
وبسس... مستوى صعوبة الاسئلة في المواد الاساسية كافي انه ياهل الطالب انه يتعلم باقي المواد الفرعية بسهولة اذا احتاجها في وظيفته... ايضا الجامعة تقدمها كمواد اختيارية للي يبغى لكنها ما تلزم الطلاب بها

هذي طريقة البترول: الاساسيات ثم الاساسيات ثم الاساسيات، ولا تقدر تتخرج الا لو عرفتها زي اسمك.





5- العدل

اغلب جامعات المملكة فيها نفسيات... يعني دكتور يحقد على الطلاب، يحلف ويقول والله لا ارسبك، استقصاد وشخصنة للامور...

هذي الاشياء عمري ما شفتها في البترول ولا سمعت حتى عنها.
الدراسة جدا صعبة في البترول لدرجة انه اذا الدكتور رسبك، انت تستاهل ترسب. حيوريك درجاتك وسجل حضورك ويرسبك وهوا يضحك ولا تقدر تجادله. كل شي محسوب. مافيه مجال للتلاعب. راي الدكتور فيك كشخص مو مهم.

لو كان الدكتور فعلا سيئ في التدريس، تقييم الطلاب له نهاية السمستر حيجيب له مسائلة وحتغصبه الادارة يغير طريقته. هذي ما تشوفها في باقي جامعات المملكة.

يتبع،،، (نقاط تحتاج الى التحسين في جامعة البترول)