أفضل المشاركات: وبعدين مع العطاله؟ الي عاطل يدخل والي توظف يفيدنا

السلام عليكم ورحمة الله وبركاته

حقيقة شدني موضوعك لأني مريت تقريبا بنفس التجربة مع بعض الفوارق وحاب أكتب كم نقطة من خبرتي البسيطة والي ممكن ما تكون جديدة لكن هذا كان اسلوبي في التقديم .. وطبعا الموضوع يبغاله طولة بال ..

أولا ومثل ما قلت في كلامك أنه الأرزاق بيد الله وكل واحد بياخذ رزقة عاجلا أو آجلا والحكمة لله في تحديد الوقت ومالنا إلا الصبر والدعاء وأكيد السعي لتحقيق وطلب الرزق .. والمكاسب كلها للانسان في جميع الحالات ..

ثانيا وبرضه مثل ما تفضلت الدورات لها دور كبير وطبعا هنا أتكلم عن الدورات الاحترافية وليست دورات بشهادات حضور فقط لانها غالبا ما تفيد مع الشركات .. وكمان الي يفيد الدورات الي الناس تبحث عنها في الفترات الحالية .. وعن نفسي دورة وحدة أخذتها وكانت مفتاح لي في بدايتي ولله الحمد ..

ثالثا بالنسبه لل CV الأفضل يكون معروض بطريقة خفيفة وجذابة أكيد والأهم إنك عارضه على ناس خبرة وقيمت الموجود فية .. لانه بصراحة الموضوع هذا جدا ماله أي أساس وكل شخص له طريقه يفضلها في عرض ال CV عن الثاني .. يعني أنا دايما أفضل يكون صفحة وحدة فقط وفيه كل المعلومات الأساسيه وبشكل خفيف وسلس والباقي على الله ..

رابعا حاول تعمل اضافات كثيرة وبالأخص لموظفين الHR وكمان كبار الموظفين في الشركات في موقع Linkedin .. بمعني وسع دائرة التواصل مع الأعضاء هناك وحاول تبرز نفسك دائما .. لأنه ممكن تجيك رسائل منهم من دون ما تكون مقدم على وظيفه عندهم وكثير من الشركات عندهم وظائف داخليه ما يعلنو عنها ابدا .. حقيقه عن نفسي كنت ادخل على بروفايل الشركات وابحث عن الاعضاء الي احس انه راح استفيد من التواصل معاهم واعمل اضافه بشكل دوري ..

خامسا برضه في طريقه ممكن تفيد في حالات وهو انه تراسل موظفين ال HR في Linkedin وتعرض عليهم ال CV تبعك على اساس اي وظيفة محتمله وهم يتواصلو معاك .. طبعا هذي الطريقه الأقل جدوى في نظري لكن برضه جابت معايا نتايج وفي بعضهم تواصل معايا بعد ما أرسلت لهم ..

سادسا حاول تدخل مواقع الشركات وأعمل بروفايل هناك وحاول تحدثه كل فتره وحتى لو ما كان في وظائف وطبعا لا تنسى موقع Bayt.com لانه أكثر من مره جاني اتصال وكان المصدر انهم شافوا البروفايل تبعي في الموقع .. صحيح في اتصالات فقط تجي وما تسمع منهم شي بعدها لكن أنت أعمل بالأسباب .. طريقتي وقتها كانت كنت كل يوم أبحث عن شركات بصناعات معينه .. مثلا يوم أمسك شركات البترول وتوابعهم واعمل بروفايل ولو فيه وظيفه معروضه مناسبه اقدم عليها .. ونفس الشي ثاني يوم اشوف مثلا البنوك وعلى هذا الحال ..

وثامنا التوكل على الله في كل أمورك والثقه أنه الله ما راح يخيب ظنك وأحب أذكر نفسي والجميع بحديث (قَالَ رَسُولُ اللهِ صلى الله عليه وسلم : يَقُولُ اللهُ جل وعلى :أنا عند ظنِّ عبدي بي، وأنا معه إذا ذكرني، فإن ذكرني في نفسه ذكرتُه في نفسي، وإن ذكرني في ملأ ذكرتُه في ملأ خيرٍ منهم، وإن تقرَّب إليَّ شبرًا تقرَّبتُ إليه ذراعًا، وإن تقرَّب إليَّ ذراعًا تقرَّبتُ إليه باعًا، وإن أتاني يمشي أتيتُه هرولةً).

والله يوفقنا وإياكم أجمعين ..

تقبل مروري ..

 

هذا الي قاعد اسويه، افكر افتح بزنس خاص.

عموماً نسيت اضيف نقطه! فيه شركه دخان مشهوره عالميا كلمتني وسويت معهم مقابلتين وقبلوني وارسلولي العرض وكان ١٥ الف ريال! فريش. ولكن رفضت.. تقولي ليه؟ اقولك اول حاجه راح يخرب السي في تبعك.. ثاني حاجه فلوسك ما تدري هي حلال ولا حرام

الله ييسر الحال