بسم الله الرحمن الرحيم
الاخوة الاعضاء والزوار، السلام عليكم ورحمة الله وبركاته
قبل 3 سنوات كتبت موضوع مفصل عن اختبار الFE في هذا المنتدى وانتشر الموضوع بشكل كبير جدا، وتم نسخه في تويتر وغيره من المواقع عدة مرات وبغض النظر عن عدم أخلاقية هذا الفعل إلا أن هذا دليل واضح على نقص المعلومات العربية بشكل واضح جدا، وعليه قررت كتابة موضوع جديد عن الاختبار الأكبر والأصعب، اختبار الPE أو ما يعرف بـ Principles and Practice of Engineering Examination
تنويه: قبل قراءة هذا الموضوع، تفضل بقراءة موضوع اختبار الFE هنا: كل ما تريد معرفته عن اختبار ال FE الخاص بالمهندسين
ما هو اختبار الPE؟
هو اختبار موجه لخريجي الكليات الهندسية ممن لديهم 4 سنوات عملية من الخبرة الهندسية بعد التخرج وسبق لهم اجتياز اختبار الFE، يقدم الاختبار في عدة تخصصات أهمها الهندسة الكيميائية والميكانيكية بأقسامها والكهربائية بأقسامها وغيرها كثير
يقدم الاختبار من قبل المجلس الوطني لممتحني الهندسة والمساحة NCEES بالتعاون مع الهيئة السعودية للمهندسين SCE
تنويه: هناك اختبار آخر يقدم من قبل هيئة المهندسين بالتعاون مع قياس وأيضا اسمه اختبار الPE وللأسف هذا مسبب لخبطة وعدم وضوح، كل الكلام هنا عن الاختبار الأصلي، أو اختبار ال NCEES
اختبار الPE يختلف عن اختبار الFE كونه اختبار متخصص ولا يحتوى أسئلة عن المواد العامة كالرياضيات والفيزياء والكيمياء وغيرها، يدخل في أسئلة التخصص على طول، يتكون الاختبار من 80 سؤال مقسمة على فترتين بينهم فترة راحة، اذا قررت تاخذ الاختبار فغالبا هذا بيكون أطول اختبار تاخذه في حياتك، لأن مدته الكاملة 8 ساعات! فترة أولى بعدين بريك 50 دقيقة بعدين فترة ثانية، طبعا لك مطلق الحرية تقسم الوقت أو ال8 ساعات بين الفترتين، شخصيا وزعتهم بالتساوي وكان هذا شي جيد معي، المفروض كل سؤال ياخذ معك 6 دقايق عشان ما يكون عندك مشكلة في الوقت، طبعا بيكون في مرجع واحد متاح لك وقت الاختبار ولكنه طويل جدا (فوق 500 صفحة) فلازم تكون عارف أنت جالس تبحث عن ايش
بالنسبة لتكلفة الاختبار فهي 4000 ريال سعودي، تدفع 2500 ريال لهيئة المهندسين والباقي ل NCEES (التسجيل للاختبار نفس طريقة الFE)
الاختبار كما ذكرت متخصص، فمافي أي تشابه بين اختبار الهندسة الكيميائية واختبار الهندسة المدنية أو غيرها، راح أذكر تجربتي الآن في اختبار الهندسة الكيميائية:
الاختبار بصراحة ثقيل جدا، من ناحية التحضير والدراسة والتدريب وبعدين من ناحية تحدي أنك تجلس تحل أسئلة بشكل شبه متواصل لمدة قريبة من 9 ساعات!
هذه بعض أشهر المصادر للمذاكرة والتحضير:
1- ppi review book by lindeburg هذا أشهر مصدر للمذاكرة في أمريكا والكثير ينصح فيه، وفي رأيي المتواضع أن هذا الكتاب عبارة عن مضيعة للوقت والفلوس، الكاتب باختصار يسعترض عضلاته ويجيب أسئلة مالها علاقة في أي شي إلا خيالاته، للأمانة في أجزاء بسيطة جدا مفيدة في الثيوري وليس المسائل، لكن لو عندك كتب الجامعة ما تحتاجه
2- NCEES Practice exam 2020 ، هذا الاختبار التجريبي الرسمي الأحدث وهو أفضل مرجع للاختبار، مستوى صعوبته مقارب للاختبار الفعلي، لا تروح الاختبار اذا ما كنت فاهم 90٪ من أسئلة الاختبار التجريبي وتقدر تحلها
3- NCEES Practice exam 2004 ، الاختبار التجريبي القديم، مقارب للاختبار الجديد ولكن فيه أسئلة كثير مختلفة، عيبه أنه لا يوجد سلوشن رسمي له ولا له مكان تقدر تشتريه منه، لازم تحوس في النت عشان تحصله
4- capstonlearning ، كورس اون لاين يشرح لك المفاهيم، عيبه أنه بطيء في الشرح والأسئلة قليلة نسبيا (ويشرح أشياء مالها شغل في الاختبار)
5- ppi quiz generator ، موقع يطلع لك أسئلة عن الموضوع اللي تبغاه، وميزته الأسئلة كثيرة جدا ومتنوعة ومستواها مقارب للاختبار، عيبه سعره الغالي نسبيا 59$ في الاسبوع
أسئلة متكررة:
هل الاختبار الزامي؟
لا
ليش تاخذ الاختبار؟
سؤال معقد في رأيي وكل واحد له أسبابه، أهم ميزة أن الاختبار يؤهلك تكون مهندس محترف licensed professional engineer
كم درجة النجاح؟
غير معلنة
كم نسبة الناجحين؟
بالنسبة للهندسة الكيميائية، حسب آخر احصاء رسمي، ينجح 58٪ من المختبرين، لباقي التخصصات راجع موقع NCEES
متى تطلع النتيجة؟
النتايج بالنسبة لل fe وال pe تكون يوم الأربعاء الساعة 5 المغرب بتوقيت السعودية (هذا بالنسبة للاختبارات المحوسبة، في كم تخصص اختبارهم باقي لسى ورقي)
نصيحة أخيرة:
اذا قررت تاخذ الاختبار، فجهز نفسك لتحدي شاق جدا، راح يعدي عليك أيام كثير الناس مو فاهمة ليش أنت خريج وجالس تدرس وتذاكر وتتعب نفسك، ولكني أوعدك أن لذة النجاح في الاختبار هذا رائعة جدا والحمد لله لها تقدير كبير وعالي جدا في الشركات والمجتمعات الهندسة المحترفة
تحتاج معلومات زيادة؟ راسلني هنا أو في مواقع التواصل
موفقين لكل خير والمعذرة على الاطالة
إعجاب