7 شهور عاطل مالحل؟

رح خذ ماستر
او ادخل على الشركات وقولهم يوظفوك بنص الراتب
لا تضيع وقتك نصيحة

 

اهم شي انك ما تيأس. استمر في التقديم وفِي نفس الوقت حاول تحسن وتتعلم مهارات. وان شا الله ربي يفرجها

 

اخوي اذ ما حصلت ع اي مقابله حتى الحين ، اعرض السي في هنا واسمع نصايح الشباب
واذ دخلت على مقابلات ولم توفق حاول تطور مهارات التواصل واساسيات التخصص وثق بالله ولا تيأس

والله يوفق الجميع

 

الله يسهل ويفرجها وجميع المهندسين السعوديين يتوظفون قريب

كفاية الهزل اللي صاير بسوق العمل

القطاع الخاص عليه ان يتماشى مع مستوى البلد المعيشي بتوفير الوظائق بالمرتبات اللتي تخدم الشباب والشابات الخريجين وابناء البلد , كفاية استقدام للاجانب بمرتبات اقل بالنسبة للجاليات الاقل اجرا , وبنفس الوقت حرام نشوف الجاليات الاوروبية والامريكية واللاتينية تستقدم بمرتبات خيالية ما يحلم فيها السعودي ولو في اخر سنين خدمته !!!


الموضوع يحتاج لغربلة من المسؤولين لانقاذ الموقف

 

اذا انك بالخبر/الدمام/الظهران فالمنطقة مليانة شركات استشارات هندسية ومقاولات مريتها؟

عندك للمثال لا للحصر روابي/نسما/أركاد/(عموم مقاولي أرامكو)/جيكوب زيت/فلور/jgc/يوكاقاوا/بنيان/اليمامة/سعودي كونسلت/زهير فايز/مكتب بالطيور/موستنق/شركة الحفر العربية(شغلهم حقول نفط لكن سمعت ان عندهم احتياج والتقديم يدوي) وشركات كثير جدا لها مقرات بالمنطقة باختلاف مستوياتهم ورواتبهم لكن ما اظن بالصناعية دورهم بقوقل ماب وقدم يدوي لو حاب(أنا ما جربت للأمانة لكن اذا انك وصلت لهالمرحلة فمنت خسران شي)

بالتوفيق.

 

الشباب ماقصروا , بس اذا ماعليك امر ياليت ترفع ال cv ممكن هي السبب + حاول تقدم على الشركة الي تدربت فيها و لو تعرف ال hr فيها تواصل معاه .
حاول تستغل هالفترة في الدورات الي تقدمها هيئة المهندسين او الشهادات المعتمدة + لاتنسى تختبر تقييم 1 عشان تقدر تقدم على الوظايف الحكومية .

 

السيرة أشوفها معقولة لشخص حديث تخرج ماعندي عليها ملاحضات لكن تأكد من بياناتك الشخصية ممكن فيها خطأ .موفق عزيزي انا توي متخرج هندسة كهربائية ومعدلي حولك صار لي 3 شهور وطفشت ماقول الا الله يعينك

 

السلام عليكم ورحمة الله وبركاته

فعلا القطاع الخاص يجب أن يتبنى السعوديين. السعوديين أراهم من أكفأ الناس وخاصة المهندسين خريجين الجامعات المتميزة مثل البترول.

أذكر قبل فترة قدمت على شركة مشهورة جدا بالصناعية الثانيه بالدمام وكان مرشحين للمقابلة يمكن 14 واحد و مافي إلا أنا و واحد آخر السعوديين. اكتشفت بعد فترة إني كنت من أعلاهم كفاءة ومعدل .. الخ لكن جاني رفض بعد 24 ساعة وقالوا تقدر تقدم السنة الجاية والوظيفة أخذها شخص آخر أجنبي. الله المستعان ( وما توفيقي إلا بالله فعليه توكلت وهو رب العرش العظيم ).

 

اخوي صاحب الموضوع... شيل المعدل من السيرة الذاتية... ضروري.

خل الشركات تحكم على المقابلة مب على المعدل.

 

في أبراج الخبر هناك كثير من الشركات الأجنبية المستثمرة هنا في السعودية و ما نعرفها مجرد تاخذ لك لفة عليهم اكيد فيه شركات بتستلم السيفي و ممكن تعمل لك مقابلات مباشرة نصيحتي لك اسأل عن هذي الأبراج و المكاتب و اطبع لك نسخ من السيرة الذاتية و الشهادات و انطلق .. كثير اشخاص توظفوا عن طريقهم

 

نزل السيفي pdf عشان أراجعها لك

 

ماشاء الله تبارك الله عليك .. اذا ينفع تتواصل معاي خاص ودي اعرف بعض التفاصيل(من اهل الشرقية او اذا مافي مانع تشتغل بالشرقية) و ان شاء الله بعطيك اميل ترسل عليه السي في وربنا ولي التوفيق

 

job seeker@

مرحبا اخوي هذي ملاحظاتي ع السيفي...

اولا احذف الصورة من السيفي !
السيرة الذاتية يجب ان تكون بدون صورة على الاطلاق

ثانيا ال career summary حقك ضعيف و ما يعطي مسؤول التوظيف اي معلومات عنك و عن مهاراتك و انجازاتك ، اسأل نفسك:
who you are and what are your qualifications?
what are your skills?
what are your achievements?

اعطيك مثال
A dedicated Electrical Engineer with extensive background in ABC . Skilled in XYZ . Strong engineering professional with a Bachelor's Degree in Electrical Engineering from KFUPM

حط في بالك ان ال summary راح تكون اول شي يقرأه مسؤول التوظيف و لازم تكون قوية حتى تلفت الانتباه و تشده الى قراءة المزيد

ثالثا ال Education
- احذف المعدل من السيفي ، و خليك محضر زين اذا سألوك في المقابلة ليش معدلك اقل من 3
- تاريخ التخرج: انت كاتب من 2011 الى 2016 , و تحت في الديسكربشن كاتب تاريخ التخرج 2017 !!!

رابعاً ال كوأب
انت اللي كاتبه فقط يعتبر job description بسيط
يعني مو واضح خلال ال 7 شهور ايش هي المهام و الانجازات و المهارات اللي اكتسبتها ؟ لازم تفصل اكثر لان هذي 7 شهور خبرة يعني كأنها وظيفة

خامسا انصحك تحذف ال references + interest
و تضيف مكانهم مشروع التخرج او اي مشروع او كورسات تتعلق بالوظيفة اللي انت مقدم عليها ، هنا تتكلم عن ايش سويت في هذا المشروع

بالتوفيق ان شاء الله