درست معه 092 .. انقلش 101

يحضر يومياً .. وبداية كل كلاس .. أحياناً يتاخر بالتحضير

مو راعي كرف .. أغلب شغله داخل الكلاس (الرايتنق)

يصحح الررايتنق ويرجعه على طول .. نادر ما يتأخر فيها

تنكيته سااااامج

أغلب شرحه على سلايدات .. لو كنت تعبان بتنام من شرحه

صوته واطي جداً

اللي يعجبني فيه .. أنه يدخل الكلاس وهو يدري وش يبي يشرح

منظم جداً جداً جداً .. شنطته كلها ملفات وبألوان (كل لون لشيء)

يهتم بالويب سيتي كثير .. لازم تشيك عليه كل يوم

قريداته مو ذاك الزود .. عطاني C مع أني كنت متوقعها +C (مع أن ماعندي غيابات )


أن لقيت أفضل منه وألا توكل على الله


القريد النهائي : +C


وبس ​

 

اخذت معه انقلش 101 في 092

والله يا شباب اشوفكم بالغتـوا بسبـه..!!!!

ما اقول انه رائع وخرافي..

بس مو للدرجة اللي وصفتوها فيه..

الرجال راعي تحضيـر يومـي وفي بداية كل كلااس..

ومثل ما قال اخوي اللي فوقي انه مو راعي كرف ابد..

كل شغله بالكلااس..

وفي البداية انا حسبته انه غير قابل للتشبيـك ابدا..

وفي اول رايتنق تاسك صفقنـي بـ( دي بلااس)

عاد هنا قلت خلني اوريه اني مهتـم ومجتهـد..

وقمت اتراسل معه بالويب سيتي..

وزرته اكثر من مرة في الأوفيس وخليته يحفـظ اسمـي مضبوووط..
وبصراحة حبيب جدا بالأوفيس..

والمهـم وبعدهـا بباقي التاسكات كل قريداتي من (سي بلس) وطالع....

ولو تشوفون درجاته بتشوفون 2 او 3 طلعوا بقريد آي وحول الـ 5 طلعـوا بقريد (بي) والبقية بين السي بلس ونازل..

يعني الرجال مو راعي خسف بالطلاب للأمانـة..

وذكرلنـا بالويب سيتي انه ساعـد الجميع قدر المستطـاع..

وعلى طاري الويب سيتي فالرجل منظم جدا جدا جدا ولازم تكون مشيك عالويب سيتي بإستمرار..

طبعا من سلبياته ان بعض كلاساته وخصوصا اذا فيها شرح تكون مملـة جدا..

انا كان جدولي عبارة عن كلااس ماث وبعده كمستري وبعدين انقلش

والله في كثير من الأحيان كانت كلاسين الماث والكمستري مع بعض يمشي الوقت فيها اسرع من الإنقلش!!!

ما اقول عنه رائـع وممتاز وايضا ما اقول عنه انه سيء وفاشـل..

بكل اختصار اذا ما لقيت احسن منه فلا تتردد بإختياره لأنه افضل من غيره بكثير..

اعطيه c+

 

إنجلش 101 - 091
إنجلش 102 - 092

نزلت معاه بالحظ في السمستر الأول ، لكن الحمدلله كانت صدفة جميلة ..

التحضير : يحضر بداية الكلاس بالأسماء ، يؤخر التحضير أحيانًا حتى نصف أو آخر الكلاس .. بالنسبة للتأخير فالحمدلله ما تأخرت أبدًا ولا أدري كيف يتعامل مع المتأخرين لكنه يطلب منهم الحضور آخر الكلاس حتى يحضرهم .. في الـ 101 كان هناك لكل طالب غيابين مجانية وفي الـ 102 كان لكل طالب 4 غيابات مجانية ..

طريقة الشرح : طريقة الشرح مملة نوعًا ما .. يشرح بالسلايدات اللي تختصر الدرس في مجموعة صفحات لكن الدرس نفسه كامل يضعه في ملف وورد في الويب سيتي حتى تقدر ترجع له وقت ما تبغى .. ما يعطي تمارين كثيرة في الكلاس فقط للأشياء المهمة زي التاسكات ، ما يعطي واجبات أبدًا فقط تمارين اختيارية لكل درس إذا تبغى تحلها يصححها لك إذا ما تبغى بكيفك ولا عليها أي درجات .. ما يكرف أبدًا وخصوصًا في الـ 101 ، يعني تنسى إن عندك إنجلش .. يتواصل معك على الويب سيتي ، كل شي رح تأخذه موجود في التقويم وبالتفصيل الممل ، مقسم المنهج تقسيم جميل تعرف اللي لك واللي عليك ..

الكويزات : يمكن اعتبار الريدينق تاسكس على انها كويزات ، غالبًا تكون توفل أو مقالات من عنده .. ساعدنا كثيرًا في الـ 102 بالتدريبات على اختبار التوفل النهائي رغم إنه كان ممنوع من الديبارتمنت.. ولهذا حقق سكشنا أعلى أفرج في الاختبار النهائي في الـ 101 وفي الـ 102 ..

المياجر : كومن، لكن يمكن اعتبار الرايتنق تاسكس على أنها مياجر ، تكتبها في الكلاسات ، غالبًا ما تكون عارف الموضوع ومرات قليلة يعلمك الموضوع اللي تكتب عنه الكلاس الجاي .. يصحح ويعاملك في التصحيح على إنك كاتبه في 45 دقيقة .. يعني ممكن يكون تاسكك كله أخطاء لكن تقسيمك للقطع والأفكار جيد ، فيمكن يعطيك بي .. يكون تاسكك قليل الأخطاء مع تقسيم ممتاز للبراغرافات والأفكار واستخدام جمل طويلة وقصيرة يعطيك أي بلس ..

الريبورت : في الـ 102 .. الكتابة في الكلاس برضو .. يقسم الريبورت على أربع كلاسات .. تكتب أي جزء تبغاه من الريبورت .. بس أهم شي توصل 250 كلمة .. البري ريبورت يشمل النوت والآوتلاين والسورسات .. قبل منتصف الترم تكمل البر ريبورت وبعد الإجازة غالبًا تبدأ الكتابة .. تسلم سورس كل أسبوع من الإفالوويشن .. المواضيع يختارها لك وغالبًا يختار شي مخالف عن الثيم حق القسم كامل .. يعني الترم الماضي كان الثيم حق كل السكاشن الرود سافتي بينما سكشنا كان عن الـ Disasters ..

الفاينلات : كومن ، لكن زي ما قلت يدربك عليها رغم أن القسم يمنعهم من ذلك ..

الصوت : ضعيف شويه ، يحاول ينكت أحيانًا :D

الفريد النهائي : أعطاني أحلى قريد في الكورسين ، ما ينفع معه التشبيك لأنه في الـ 101 ما كان يعرفني أصلاً ولا بدأ يعرفني إلا يوم نزلت عنده الكورس الثاني ولا زرته في الأوفيس ولا مرة.. يستاهل A+

إضافات : في الـ 101 كان أفرج الكلاس 73 % وأعطى على ما أذكر 2 اي .. خمسة أو ستة بي .. ثلاثة دي .. والباقي سي .. في الـ 102 .. كان الأفرج 79 % وأعطى 2 اي .. 11 بي .. 8 سي .. 1 دي .. وما أعطى أحد إف في الكورسين ..

زي ما نتوا شايفين .. القريدات عنده ممتازة وأحسن من مدرسين كثييييير .. وما أدري يمكن حتى الأحسن .. باختصار إذا مهاراتك في الرايتنق ممتاز وعندك قدرة على كتابة تاسك كامل في 45 دقيقة بتنظيم جيد ومقدمة وخاتمة ممتازة وقوية .. أعتقد إن هذا المدرس ممتاز لك وخصوصًا أن الرايتنق يشكل الجزء الأكبر من المنهج ..

بريطاني ويشجع مانشستر يونايتد ، ولو تجي بدري يجلس يسولف معاك عن الكورة

إن شاء الله يكون الرد مفيد ..

تحياتي

 

أنا درس معاه 102 .

الأستاذ طيب وخلوق جداً.
التحضير عنده كل يوم إذا جيت آخر الحصة قبل نهاينها 10 أو 15 عادي يحضرك ، على ما قد تشتغل تأخذ حقك ، متساهل شرحه واضح .
التقرير يتعب معاه شويه ، في المكتب ممتاز ومتواجد في ساعات .
نهاية السنة إذا كان فصل ممتاز يزود ل طالب درجة مثل c إلى c+ .
القريد النهائي A .

 

درست عنده في 092 ,, e 101

مدرس بصراحة رائع و تمنيت أنزل 102 عنده ، لكنه ما نزل صيفي .

التحضير بداية الكلاس ، لكنه يريحك كثير بالكلاس و ما يطلب منك أي شيء من هوموركات و خرابيط طول السمستر و كل شي بتلقاه عالويب سيتي ..

لكن نصيحتي للي ينزل عنده إنه يكون جيد بالإنجليزي ، يعني إذا أنت مو مره بالإنجليزي ما أنصح فيه أبداً ..

و الرجال حقاني و مب راعي دف تقريباً .

 

شباب ممكن أحد يعطينا رابط صفحته الشخصية


ضروري بارك الله فيكم

 

888888

ما عطيتونا رابط صفحته يا شباب


أتمنى أحد طلابه يعيطني إياه لأني أبيه ضروري




بانتظاركم ياشباب

 

أعتقد من الأشياء اللي تضبط لك القريد حق الرايتنق

أن تكون أفكارك ونقاطك مميزة عن الطلاب الباقيين حاول أنك ما تكتب شيء معتاد هذا يساعد

 

أنا نزلت عنده لأني كنت مستعجل
و الآن متوهق أحذف المادة على كلام الشباب الذين في البداية أو أكمل على كلام الشباب فوق

 

نصيحه لالالالالالالا تنزلون عنده اذا نزلوا عنده سوا دروب على طول
والله ما يعطي درجات كانه دافعها من جيبه الله يحرقه
ويقعد يكرفكم كوزات ويهلكم في الدرجات
نصيحه هذا الادمي مرررره لالالالا

 

على الاقل في ناس مدحته شوي افضل من نيكولاس ( على ما اضن)

اذا حصلنا واحد افضل منه في الليت رجستراشن سجلنا

 

لي رد هنا لأني أخذت معه 101

وهذا تقييمي لكورس 102

طبعاً ما اختلف كثير .. لكن الكورس نفسه فيه شغل أكثر .. واهمها الريبورت (عليه 20%)

نظرتي للمدرس نفسها ما تغيرت .. نظامي جداً .. يقدر الظروف القاهره (مايمشي عليه أي شي) .. محترم .. تنكيته أحياناً سامج

كل شغله داخل الكلاس ماعدا النسخه النهائية للريبورت (طباعته على الوورد وتغليفه) + تقييم المصادر (السورس ايفالوويشن) + النوت كاردز (للريبورت)

التجهيز لبداية كتابة الريبورت كانت قلق شوي .. لازم تسلم 4 سورس ايفالوويشنز و50 نوت كاردز والمصادر بملف يعطيك اياه (كل شغلك يكون فيه عند التسلييم)

الريبورت قسمه على 4 كلاسات كل كلاس تكتب تقريباً 250 كلمة (ضروري جداً تكون محضّر وش بتكتب لأن الوقت ضيّق) وبعدها حوالي اسبوع لطباعته على الوورد وتغليفه وتسليمه

نصيحه أكررها .. سو اللي يطلبه منك بحذافيره وبتاخذ قريد ما يقل عن C .. والـ F صعب أحد ياخذها عنده

البرزنتيشن عنده يكون بآخر السمستر .. وتروه كريم بدرجات البرزنتيشن .. لاتفوتونها

طلعت من الكورس بـ +C

موفقين

 

^^
+1
اضافات
الدكتور هذا ما يظلمك
يعني مو من النوع اللي اذا اخذت عنده قريد بداية السمستر
بتظل على نفس لقريد للنهايه
بالعكس كلما اشتغلت معاه كلما حصلت اكثر
باختصار
انصح فيه اذا كنت مستعد تشتغل معاه
ولا بتطلع بأقل من c في أسوأ الأحوال

 

انقلش 102 في الترم 102...

انا نزلت الـ 101 معـاه وما ترددت اني انزل الـ 102 معاه ..

وانا ملاحظ طلاب كثير نفس حالتي نزلوا الـ 101 والـ 102 معاه ..

بإختصار هالمدرس منظم وواضح جدا جدا جدا ....

وفوقهـا يريحك ولاهو راعي كرف ابدا....الا في فترة الريبورت بتكون فترة قروشـة شوي وشرحها بالتفصيل اخونا (المظلوم) بلا زيادة او نقصان...

على فكرة ترى الملف النهائي للريبورت اللي بتسلمه له لازم تطبق فيه كل اللي يقوله لك..

لا تسحب على اشياء بسيطة بحجة انه ما بينتبه لها...لالا ترااه تأخير كثير واخذ حوالي شهر كامل عشان يعطينا درجات الريبورت...دقيييق جدا في تصحيحه وبيعطيك حقك بالممممملي ..

يعني اذا كنت مجتهد وتطبق بكلامه بتطلع بقريد طيب...

وفعلا تراه كريم جدا في البريزينتيشن...من جد لا تفوتها وشد حيلك...

التحضير بعد اول 5 دقايق تقريبا في كل كلاس ولو جيت متأخر بيحضرك آخر الكلاس .. (بس لا تزودها)..

وفعلا يقدر الظروف القاهرة...انا صارلي حادث ولا قدرت اسلم (التيتوريال) في الموعد المحدد..وهو منبه بشكل كبير انه كل واحد لازم يجي بالموعد المُحَدد له..وشؤون الطلاب رفضوا يعطوني عذر رسمي وقالولي المسألة شخصية بينك وبين المدرس...

ورحتله وتفهـم وضعي وبالعكس ما ناقشني عالدرجة او التأخير وقام يسولف معي على تفاصيل الحادث خخخخخخ..

بإختصار بقدر ما تجتهد معه بتحصل ...


انا عن نفسي انقليزيتي مو لذاك الزود وطلعت بـ ( سي بلص) بالكورسين مع اني ما كنت معطي المادة حقها... ولو اني شاد حيلي معه اكثر كان طلعت بالبي بالرااااااحة...


تراه افضل من غيره بكثيييييير...انصح فيه ..


بالتوفيق ..

 

أنحش إذا تقدر
فريدات زفت , شرح زفت , صوت ما فيه , متعه في الحصة ما فيه
ما أدري ايش يسوي في الجامعه كيف أني أجيب في الميد ترم والفاينل b+
وأطلع من الكورس ب c مع مرتبة الشرف

 

Eng 214 t131
التحضير :
كل كلاس
طريقة الشرح :
يشرح لك المطلوب منك
الكورس ما يحتاج له شرح
القريد النهائي:
c+
الصوت:
واضح
اكسنت بريطاني
إضافات :
الدكتور تصحيحه شديد
بس ميزته إنه ما يعلق على قريد زي باقي دكاترة الانقلش
يعني طبيعي لو أخذت d في سورس إيفالويشن مثلا وأخذت المرة اللي بعدها a أو العكس
مو سيء بس مو الأفضل

 

هذه قريداته لترم 131 كورس 214

 

اغلب الكلام الي قالوه الشباب صحيح الرجال بريطاني و مرتب و صوته هادىء لابعد درجة خصوصا لما يحضر يعني لما يحضر لازم تخلي اذونك وياه درسني ١٠١ في ٠٨١

 

صحيح شباب طلعت منه بقريد زين و تقييمي له c+

 

صحيح يا شباب ترى الرجال حقاني و ما اظن انه حق دف يعني انا طلعت منه ب‌ c+