SAOO & GM & Pipeline interviews for EE

السلام عليكم ورحمة الله وبركاته

هنا ودي اشارككم تجربتي في مقابلاتي مع ارامكو بعد كورونا.
في البداية خل اعرف بنفسي، انا احمد المشرف ، تخرجت بمرتبة شرف تخصص هندسة كهربائية من جامعة البترول. تخرجت في ٢٠٢٠ يناير دفعه ٢٠١٤.

قدمت على ارامكو لما بدت كورونا بثلاث شهور تقريباً، يعني بعد التخرج بفترة. سويت اول مقابلة اون لاين والثانية والثالثة في مركزهم في الظهران. التجارب الثلاثه لم تنجح معاي.

• المقابلة الاولى كانت مع قسم SAOO/ وكنت اطول مقابلة سويتها، حوالي ٤٥ دقيقة. في البداية عطوني مقدمة عن الوظيفة ثم بدت الاسئلة. اول سؤال هو حدثني عن نفسك ثم بدت الاسئلة التقنية البحته في مجال هندسة التحكم وهندسة الطاقة.

امثلة على بعض الاسئلة:
If I give you a control system transfer function. how can you determine the system stability?

What it is the unit of conductance?

how much is the neutral current of balanced three phase power system?

• المقابلة الثانية كانت مع قسم GM/ جتني بعد ما حدثت البروفايل حقي في موقعهم وكانت في الشرقيه في شهر ماي ٢٠٢١. زي الي قبلها عطوني مقدمة عن الوظيفة ثم طلب مني اتكلم عن نفسي.

هذا القسم مسؤول عن الدعم التقني لخدمات Downstream الي تقدمها ارامكو مثل المصافي و NGRs factories. اكثر قسم الهمني وتحمست له. كنت المقابلة لطيفه مع ثلاث مهندسين بالبدل الرسمية حقت ارامكو. لما بديت اتكلم عن نفسي توقف تنفسي شوي وبديت ارتبك لاني كنت حافظ وخايف منهم. سألوني اكثر شيء عن تجربتي في شركة الفنار للانشاءات. ايش طبيعة وظيفتي وايش الاشياء الي قدمتها. مع اني مالي الا ثلاث شهور معاهم بس. عموما طلعت من المقابلة وكنت نوعا ما مرضيه بالنسبة لي. ما سألوني اسئلة تكنكل عن تخصصي. جاني الرفض خلال اسبوع

• المقابلة الثالثة كانت مع قسم Pipeline/ جتني بعد ما حدثت البروفايل حقي في موقع الشركة، بعد الرفض السابق. عرفوني عن طبيعة الوظيفة ثم سألوني عن نفسي.

من الاقسام الي عطوني وقت كثر للتحضير لها ، اكثر من عشر ايام. كلمت شخص اعرفه يشتغل معاهم اسوي معاه بروفه مقابلة. جيتهم وكنت مرهق تماما لاني اخذت قبلها بيوم اللقاح الثاني لكورونا وكنت جاي لحالي سفر وسهران وخط الشرقية. دخلت عليهم وكنت واثق من قدراتي ثم بدت المقابلة. سألوني عن المترو حق الرياض وليش تركت شركة الفنار.

اسئلة المقابلة:
What is the demand factor?
Are willing to relocate to Jizan or Yanbu?

تقييمي للشركة من ناحية المقابلات 7/10

تجاربي معاهم كانت فاشلة لكني تعلمت الكثير منها. واهم نصيحة اقدمها لكل مقبل على مقابلة معاهم هو: اهم سؤال هو عرف بنفسك، خليه خفيف وبسيط وعطهم زي مقاولون Keywords. وخلهم هم ستكشفون الباقي من خلال الاسئلة.
راجع المصطلحات الاساسية ( الاساسية) كيف؟ في كل كتاب اخذته غالبا في اخر الشابتر ملخص عن الموضوع. اذا قدرت تعرف اهم المصطلحات وتشرحها بنفسك تكون اتقنت اسئلة التكنكل. وهنا ركز على الكثرة وليست الجودة. اقصد لا تروح تحل مسائل.

في الاخير احب اقول شكرا لكل من دعمني ووجهني خلال رحلتي مع المقابلات. واسأل الله ان يرزقني بوظيفة احلامي.

تحياتي

 

وجهك ابيض.. نعم صحيح سوق العمل جته ضربه قويه بسبب انخفاض الاستهلاك العالمي وضعف الاقتصاد في اغلب الدول.. لكن الحمد لله اننا في هذا البلد كنا اقل المتضررين عالمياَ.. انا توظفت في شركتين وحده لمدة شهرين في مترو الرياض والثانية في شركة الفنار للانشاءات لمدة ثلاث شهور.. السعودي يواجه صعوبه في الشركات الصغيرة والمؤقته بسبب سيطرة بعض الجنسيات على بعض المواقع الاساسية في الشركات، مع انهم محققين نسبة سعودة عاليه لكنها في شغلات الموارد البشرية والادارة والكمبيوتر. اما الشغل الحقيقي حق الشركة ما تلقى الا هم ويدورون عليك الين تطيح في حفره ثم تتورط في قضية انت مالك علاقه بها..

الي احب اقوله ان السعودي هو الرقم الاول عالميا في الانسانية والاخلاق و لكنه لازم ياخذ حذره من جميع الجوانب عشان ما تطلع عليه الخسارة عالية ولا يستطيع ان يتحملها..

واكثر شيء يدور في ذهني هو كلمة دكتوري في السينير بروجك: كان يقول الي تبغاه راح تحققه مهاما واجهت من صعوبات. لكن لازم تكون مؤمن بنفسك ولا تأيس واعمل الخير حتى لو قل لكن بشكل مستمر.

تحياتي..

 

انا حدثت الملف للمقابلة الثانية برفع سي في جديدة و اضفت لهم cover letter

المقابلة الثالثة حذفت السي في ثم رفعته بعد ما عدلت شوي عليه وحدثت ايضا Application letter

الان فقط حدثت السي في بدون اللتر

بالتوفيق