السلام عليكم ورحمة الله وبركاته
قبل كل شي هذه شركة اسمها تيناريس والبرنامج اسمه Global Trainee Program للفريش وهذا البرنامج اول مايوظفوك تدرس في مكان يسموه Tenaris University لمدة سنتين وبعدين يشوفوا اذا يوظفوك او لا.
الشركة متخصصة في صناعة الانابيب ولها فرع واحد فقط في السعودية واللذي يقع في الدمام الصناعية الثانية .
المهم باختصار بقول تجربتي مع هالشركة :
اتصل بي شخص من هالشركة واسمه محمد وقال لي احنا رشحنا متقدمين ومن ضمنهم انت لها البرنامج - اللي سبقت وعرفت فيه في البداية - وقال لي بنسوي اختبار و ( 2 case study ) عشان نصفي العدد الكبير اللي عندنا ونرشحهم لمقابلة في اليوم اللي بعده وطبعًا الموعد في تاريخ 21 August قلت له انا تمام .. قال برسل لك رسالة وبرفق الموقع والموعد.... قلت له طيب .
فعلًا رحت الموعد وكان موجود ٣٦ شخص وتقريبًا كلهم من البترول باستثناء كم شخص << اظن ان المرشحين قدموا عن طريق يوم المهنة. المهم اختبرنا اختبار غالبه لازم من تخصصات الادارة المالية والمحاسبة وغيرها والاختبار فيه حسابات دقيقة لدرجة حتى بعض اجوبتي كانت بالفواصل << ممنوع نستخدم آلة حاسبة. مدة الاختبار ساعة واحدة فقط لحل ٤٠ سؤال. بعد هذا الاختبار اخذنا راحة ساعة اخرى ثم بدأنا الكيس ستدي الاولى ... وزعونا قروبات وعطونا مشكلة اللي هي .. لو كان عندك شهر عشان تسلم بضاعة ضخمة الى زبون وبعد ٢٠ يوم اكتشفت انك سويت بضاعة لزبون آخر .. شنو بتسوي ؟
طبعًا تتفق مع حلول مع قروبك وتناقشهم مع حوالي ٩ اشخاص كلهم رؤساء اقسام ومن ضمنهم مدير المصنع.
الكيس ستدي الثانية تتكلم عن اولويات .. مثلًا رتب الاهم فما دون من هذه القائمة :
١- الماء
٢- الكهرباء
٣- الطب
٤- الشرطة
٥- النفط والغاز ....
وهكذا .. تتكون من ١٠ خيارات وتختار اهم ٣ اشياء ( الاهم فما دون ) يعني مو كل الـ ٣ اشياء بنفس الاهمية .
المهم الحمد لله رب العالمين ترشحت للمقابلة ( وكنا فقط ٤ اشخاص ) في اليوم التالي وسويت مقابلة مع ٢ من الاتش ار وكانت اسألة عامة واسألة في التخصص بعد ماسألني في اي قسم ناوي اشتغل معهم .. ثم انتقلت من هذه المقابلة الى غرفة الانتظار لان قالوا الان عندك مقابلة مع مدير المصنع وفعلًا عملت هذه المقابلة وكان رجال فاهم وسألني في التخصص كم سؤال بس مااذكرهم .. كل اللي اذكره انه في اللاب اشتغلتوا ع CNC Machine ؟ وجاوبته بالايجاب وسألني شنو نوعها ( brand name ) ؟
في تاريخ ٨ ديسمبر كلمني محمد - الاتش ار - وقال لي عندك مقابلة مع الـ Country Maneger في تاريخ ١٨ ديسمبر ورسل لي المعلومات كما في المرة السابقة ... سويت المقابلة وكانت اسألة مثل :
ليش تبي تطلع من عملك الحالي ؟
ليش تبي تدخل شركتنا ؟
لو جنك ٣ شركات شنو المعايير اللي بتحددها عشان تختار الشركة ؟ ....
تقريبًا استمرت حوالي ٣٠ - ٤٠ دقيقة .
طبعًا بس شخص واحد من الـ ٤ اشخاص شفته جاء بعدي .. الا اذا كان هنالك اكثر بعد مامشيت .. ماعندي علم صراحة.
ومن بعدها والى الان لا رد ولا خبر .. دقيت عليهم ولا فيه فايده .. الشيء اللي زاد الامر سوء انه محمد -الاتش ار- راح دبي ( ترقية ) وتعاملي من بعدها مع مدير قسم الموارد البشرية .
حتى رحت له مرة بعد مااخذ فترة طويلة في الرد وقال لي اسبوع الجاي بنرد عليك .. وصار له الان من قال هالجملة شهر ونص .. ع الاقل ارسل رسالة اعتذار او رفض او قبول ولكن ننتظر يتحسن الوضع عشان نعطيك العرض الوظيفي ...!
اعتذر جدًا ع الاطالة ولكن حبيت اعطي صورة واضحة عن هالشركة وعن المقابلة والاشياء اللي اعتقد انه من حق المتقدم انه يعرف عنها .
الله يوفق الجميع لكل خير .
إعجاب