فيه موقف حصل لي أمس فحبيت أدونه هنا لذكرى
رحت لموعد علشان أفحص على نظري التعبان ووصلت على الموعد فدخلت على الدكتورة وسوت الفحوصات اللازمة ثم قالت: لازم نشوف الشبكية حقت العين قلت: قو أهيد ما عندس مشكلة قالت: أنت جاي لحالك للمستشفى ؟ استنكرت سؤالها ثم رديت ببطئ نعم لوحدي قالت: كذا عندنا مشكلة قلت: لـيـه !! قالت: علشان نشوف الشبكية لازم نقطّر في عيونك, وهذي القطرات تسبب لك عدم وضوح في الرؤيا فلازم ماتسوق لأننا خايفين عليك . فكيف ذا الحين هل راح تجينا المساء ونعمل لك القطرة. أنا يوم سمعت المساء رفضت على طول وقلت لها لا فيه أخوي بيجي وياخذني خلينا نعمل القطرة, (قايم الساعة 4 الفجر وقاطع مسافة 200 كلم وتبيني أقعد للليل فكذبت عليها وقلت أن أخوي بيجي وأنا ما خبرت احد أصلا ). قالت: بسم الله قطروا في عيوني 3 مرات وفي بداية الأمر ماحسيت بشي في نظري. بعد خمس دقايق دخلوني غرفة الفحص وفحصوا على الشبكية وطلعت سليمة والحمد لله ولكن قالت عندك ضعف نظر ولازم تقص نظارات جديدة لأن القديمة ماعاد تنفع. بعد 10 دقايق صرت أشوف الأشياء وكأن عليها ضباب والأشياء البعيدة كنها سراب ولكني رغم ذلك لازلت مصمم إني ارجع للبيت الذي يبعد 200 كلم عن المستشفى . ركبت سيارتي وكانت الساعة 12:30 ظهرا يعني في عز الظهر ودرجة الحرارة تقريبا 50 م. طلعت من المستشفى وأنا أقول اللهم سلّم سلّم في بداية الأمر كانت القيادة صعبة علي لأنني تقريبا فاقد التركيز بنسبة 50% ولكن مع الوقت تعودت على الضباب وتكيفت مع الوضع ووصلت البيت الساعة 2م. هي بصراحة تهور ويوم خبرت أمي باللي صار معي عاتبتني عتاب شديد وزعلت مني وأخذت مني العهود والمواثيق أني ما أكررها مرة ثانية . انتهت
09-07-2014, 05:54
! تــهــور !
