إلا اني عزمت على المضي قدما مهما كلف الأمر
قررت اني أخوض الحرب مهما كانت الخســايـر
وبالفعل اتكلت على ربي, وحزمت أمري, وتجهزت لحربي
هي حرب كان سلاحها القلم, والسهر, والتعب, والإرهاق, والخوف ولكنها انتهت بإنتصار عظيم رغم بعض الخسائر الطفيفة 
.
طبعا كان عندنا كورسين انجليزي ( ENGL 001 & ENGL 002 ) وكل واحد منها 8 ساعات , وفي اليوم الواحد أربع محاضرات 
. بس فادتنا والله 
.
رحى المعركة مع ( ENGL001 )
في تحسن في الإسبوع الثالث وبديت أخذ وأعطي مع المدرس. أما القواعد فكنت ممتاز فيها وما كانت تشكل صعوبة كبيرة. كلمت نفسي وقلت إذا بظل على هذه الحالة والله ماراح أعدي لازم أطور اللغة الإنجليزية عندي ولا رحت وطي. سويت بعض الخطوات اللي طورت لغتي الإنجليزية وخلتني أعدي الكورسين براحة:.
1) كنت اترجم كل كلمة في الوحدة لاحظوا أقول كل كلمة. كنت استخدم في الأول قاموس اكسفورد (عربي - انجليزي) وكنت أخذ وقت طويل وجهد جهيد علشان اترجم كلمة واحدة. في مرة من المرات شافني المدرس استخدمه قال لي: إذا كنت تبي تطور نفسك استخدم مترجم (Longman) (انجليزي - انجليزي) قلت راح يأخذ وقت طويل قال بس صدقني راح يطور اللغة عندك وبالفعل كان كلامة صحيحة طبعا مع الوقت صرت استخدم النسخة الإلكترونية لـ Longman.
2) كنت أقرأ كثييييييير كل شي كان يطيح في يدي أقراه. تطورت مهارة الريدينق عندي بشكل كبير جدا جدا. وتطورت عندي مهارة الكتابة أيضا بسسب تطور مهارة القراءة لأني كل ما أقرأ كل جملة اتفكر في طريقة كتابتها وأحاول أقلد هذا الستايل إذا جيت أكتب.
3) كنت أكتب مقالات كثيييرة وماهي مطلوبة مني بس علشان اطور مهارة الكتابة. وكنت من احسن الطلاب في الفصل في كتابة القطع وإعدادها.
في خطأ سويته ولا زلت أتندم عليه إلا الآن وهو إهمال مهارة الإستماع والتحدث وكنت أجيب فيها درجات نازلة جدا بخلاف الدرجات العالية في ( Writing & Reading ). ولا ذا الحين أعاني منها خصوصا في السبيكينق. يمكن ما لوم نفسي ولكن ألوم مؤسسي كتب ومناهج الإنجليزي في وزارة التربية والتعليم حيث أهملوا هذه المهارتين فأثرت علينا سلبيا.
~~~~Math 001 ~~~~
كان في بداية سهل مرة وما كنت أشيل همه وجبت درجه عالية في ميجر ون, ولكن مع تقدم الوقت وتهاوني فيه بدة فيه معالم الصعوبة وجبت العيد في ميجر تو . بس بشكل عام ماشكلي هم أو خوف وكانت عندي ثقة اني بتجاوزه بسهولة. والمدرس كان حبيب ومتعاون.
~~~~ PYP 002 ~~~~
الحاسب ماكنت أشيل له هم وعديته بسهولة.
~~~~ ME 003 ~~~~
المعضلة الكبرى, والمصيبة العظمى. الطلاب اللي معي يخافون من الرسوب في الماث او الإنجليزي, أنا حضرتي اخاف من الرسوب في الورشة . والسبب يرجع للموقف صار لي مع المدرس الله لا يوفقه وين ما لقى وجهه. في أول حصة من حصص المادة السخيفة " اللي في نظر المسؤولين عن نظام السنة التحضيرية مهمة جدا !!! ". كان المدرس يتكلم وتعرفون ما كنا نفهم عليه المهم قال للطلاب سووا شي وشرح لهم بالتفصيل وانا ناسي هل أنا مافهمت؟ أو أني كنت سارح المهم المصيبة يوم قال لطلاب طبقوا فكل الطلاب طبقوا اللي قال لهم إلا حضرتي 
.
قال: ليه ماطبقت الي قلت لك
قلت: مافهمت عليك 
قال: لا أنت طالب مهمل وأنت جايي تلعب !!! 
قلت: لا أنا صحيح ما فهمت عليك
قال: ماني فاضي أشرح لك مرة ثانية راح أحط لك زيرو!!
قلت في نفسي حط لي من اليوم لبكرة
طبعا هو ذا الحين حطني في باله والظاهر كل فصل يستلم طالب من هالطلاب ويطقطق عليه. جات الحصة الثانية وكل منا ينظر إلى الثاني بنظرة حقد وكره أنا كرهته لعدة أسباب:
1) شايف نفسه علشانه بريطاني وهو ماعنده حتى ماجستير.
2) نفسه في طرف خشمه.
3) يستهزئ بالسعوديين والعرب ويقول انتم ماتفهمون ومتخلفين ومن هالكلام.
4) عصبي ونفسه في خشمه ويهزء على أشياء سخيفه.
المهم كرهته ولا عاد اطيق أشوف خشته. وفي اثناء الحصة سئلني زميلي عن شي وشافنا نتكلم
قال لي: انت مانت مهتم وانت وانت ومن هالكلام الفاضي.
قلت: اصبر اصبر على طول حكمت عليّ بهذه الأوصاف يا خي زميلي سئل سؤال ورديت عليه فيها شئ وترى الطلاب كلهم يتكلمون وقفت علي أنا.
قال: لا انت من أول ما دخلت علي مانت مهتم
سكت ولا رديت عليه.
جات فترة التدريب على Auto Cad ومن سوء الحظ انه هو أيضا كان المسؤول عنا. جات أول حصة فيه وشرح الأخ بسرعة وقال سووا المطلوب منكم. يا فلان يا رجل قال ماراح اشرح ولا كلمة زيادة. طبعا بعض الشباب عرفوا وبعضهم ما عرفوا وأنا لسوء الحظ مرة أخرى كنت من اللي ما عرفوا. المهم سويت نصف الرسمة وعطاني عليها نصف الدرجة. في الحصة اللي بعدها بدت تزيد صعوبة الرسومات فكانت تحتاج إلى شرح ولكن الأخ ماشرح قلنا يافلان مايصير قال انتم ماتفهمون وانتوا وانتوا وعاد علينا مرة ثانية اسطوانته الفارغة. عاد هنا ضربت معي وعاندت.
قلت له: عطني زيرو وريح بالك
قال لي: ارسم بدون كلام فاضي
قلت: مانيب راسم عطني 0 وخلني امشي افضل من أضيع وقتي معك.
واعطاني زيرو كبر وجهي بس كنت مستانس ومبسوط لأني احرجته قدام الطلاب
تخيلوا ثمان محاضرات أوتوكاد كلها زيروز. على نهاية الفصل جاني وقال لي بالحرف الواحد " You will not pass this course" رديت عليه بالحرف الواحد " I will pass and you will be see" ضحك مستهزئ ومشيت وخليته. وصحيح عديت غصب عن خشمه.
للحرب بقية