للمشاركة اضغط هنا
قصة بدوي كريم .. - sKFUPM
sKFUPM  

العودة   sKFUPM > الأقسام العامة > ركن القهوة

إضافة رد
 
أدوات الموضوع انواع عرض الموضوع
قديم 13-10-2006, 13:16   #1
ابو عزيز
عميد المنتدى
 
تاريخ التسجيل: May 2003
المشاركات: 3,168
ناجح قصة بدوي كريم ..





في فصل دراسي سابق انقضى قبل عامين ونيِّفا .. وبعد آخر اختبار نهائي تجهزت للذهاب إلى رياض المحبة حيث ماما وبابا وعمو وخالو .. كان ذلك الاختبار مسائيا فلم أشأ السفر ليلا لأني سأدخل بيت أهلي قريبا من وقت السحر إن فعلت .. فعن ذلك نهى المصطفى صلى الله عليه وسلم .. وما فعلت استحببته لأني أعلم أن أهلي أو بعضا منهم سينتظرونني أو سيقلقون علي .. سيما وأني أطلت غيبتي جدا .. فقررت تجهيز أغراضي بعد الاختبار الأخير .. وترتيب الغرفة وتغسيل المواعين بعده .. وأخوكم إذا جلس يرتب أو يغسل فهو يرتب من قلب .. << قلبنا عامي ، بس أحسن عشان يطلع الحكي بسلاسة ..

صليت الفجر ثم جلست أرتب الغرفة وأغسل المواعين وأرش الزوايا والسيسان بالفليت والبفباف .. وشبكت الرادو على إذاعة القرآن قبل ما أطلع .. قلت خله يونس السِّكِنْ << الشياطين .. في غيابي ..

حملت العفش ودقيت سلف ومحطت الموتر .. وأنا طالع على طريق الحسا توي متعدي مفرق طريق الجبيل .. ومير ألقى لي واحدن يأشر على الخط .. وأهدي وأناظر وجهه وإلاه ملتحي .. قلت يولد خذ ها الرجال معك خله يونسك << وأنا بالعادة ألقط اللي يأشرون على الخطوط بحثا عن الوناسة على الرغم من التحذيرات المتعددة اللي كلن يقلقني بها .. كنت مسرع فتعديته بمسافة .. أو بالأحرى ما عزمت على إني أوقف إلا بعد ما تعديته بمسافة .. قلت عود بس عليه يبو عزيز .. ولين المسافة بعيدة .. وأمشي على الكتف الأيمن عاكس الطريق وآصله ..

"وين يالحبيب .. ؟! "
" الحسا "
" أنا دربي الرياض .. مير اركب خل اقربك غدي تلقى احدن قدام .. "
"سم "

والله ويركب الرجال معي ولين موتري ما به بنزين .. ما فيه إلا قطرة أو جغمة ونص .. وأوقف عند أول محطة في طريق الحسا .. وقبل ما أنزل قزازة موتري أبي أكلم العامل .. نط علي البدوي .. وقال ..

" والله ان ما تحط ريال "
>> وجهي ضاع <<
"تعوذ من الشيطان"
" والله ان ما تحط ريال "
" أنت عزمت موتري .. لكن انا بعزمك .. وش تشرب .. ؟! "
" مالي في الشراب "
" والله ان تشرب .. الغازيات وشكلك منتب من اهلها .. مير وش العصير اللي تبيه "
" اللي تشوفه "

أنا من عبى لي موتري وانا مغيرن خط مسيري .. قلت والله لوديه للي يبي .. ذي كبيرة .. ناسن تعرفهم يركبون معك وبعضهم ياخذون سيارتك يقضون عليها لوازمهم وبعضهم يخربون فيها اشيا ولا يحطون فيها ريال .. وذا واحدن اول مرة تقابله يعبي لك وهو يدري انك منتب موديه .. قلت انا ما وراي شي .. الاجازة وطويلة والاهل ما يدرون عن موعد جيتي ..

وادز على طريق الحسا وهاتك سواليف .. بدوينا من بدو وادي الدواسر .. لكن اشهد بالله ان فيه مرجلة شيوخ القبايل ..

في ثلث الطريق الأخير تقريبا .. وتحديدا حول الاشارة اللي عند التفتيش اللي خارج البلد .. قال رفيقنا ..
" الغدا معنا .. غدا البيت .. مايدرون ان احدن بيجي ولا حاجة .."
" الله يغنيكم ويكثر خيركم .. غداي عند اهلي ان شا الله .."
" يرجال الناس ها اليومين طرحهم الله في العجلة .. امر الله من سعة .. تغد عندنا وتعش عند اهلك .. بتروح في اجازة .. والايام جاية .. بتحلق اهلك .. الغدا بس .."
" الله يسلمك ويعافيك .. انت خابر اللي مبطي عن اهله ما يصبر ولا يصبرون .. "
" القهوة .. القهوة .. وبتاصل اهلك على خير .."
" ان شا الله .. "

وصلنا البيت بسلامة من الله .. وقفنا عند البيت .. وجيت ادور لي ظل .. ابي البق الموتر فيه عشان معي اغراض تضرها الشمس .. ضحك علي رفيقنا وقال "اصفط بس اصفط .." ..

جيت ابصفط .. قلت خل افره عن الشمس خله يتلقاها واحط الشمسية وانسم القزاز .. جيت ابحرك ولين اخوه جا على تحريكتي وشافني وانا انزل اخوه .. نزل من سيارته وطمر علي ..
" والله ان تقلط .. والله ان تقلط .."
" ان شا الله .. ان شا الله .. ابلبق يخوي .. "

وانا في حرج وحالة استدعت الضحك .. وانا في عجب من ذرية تعيش لاولئك الكرماء النبلاء الاوائل ..

قلطت .. وانا حريصن على سلوم البدو وعاداتهم .. واقول الله يستر لا اجيب الطعه عندهم .. ولين مجلسهم كبر الجمنيزيوم ما شا الله << لا تصدقون .. بس كبير ..

تقهوينا .. وتشهوينا .. وجابوا لي طست << "طشت" = "بادية غسيل" لبن غنم .. انا انشرح خاطري يوم شفت اللبن .. ربما لا اكذب اذا قلت اني احتريه .. كنت اشرب لبن الغنم في الرياض اكثر من الما .. لدرجة اني اصطحبت معي جيكات اللبن في بعض سفراتي وبعض العزايم الخاصة .. واشرب .. واشرب .. واشرب .. ولا نقص من الطست الا شي يسير .. عطيت الغضارة << اللي هي الطست .. لمضيفي اللي على يميني .. قال ..
"اشرب .. "
"شربت الله يغنيكم .. "
"اشرب ما شربت .. "

واشرب .. من غير حيا .. وارده لمضيفي قلت "خلصت الله يغنيكم .." وكنه يبي يبتسم .. شرب وشربوا اخوانه اللي تقهووا معنا .. والظاهر ان شراهتي في لبن الغنم اللي يتعجبون منها اهلي مهيب شي عندهم .. فهمت منه ان ها الغضارة مهيب شي كبير .. يخلصونها بالراحة ..

على كل حال .. انا من شربت اللبن .. وانا اقول اركب موترك لا يلحقنا الظهر ثم وش يفكك من الغدا .. لكنهم اذهن مني ..

" والله ان تغدا .. بيذن الحين .. وغدانا والم .. وتراه غدا البيت .. "


صلينا الظهر .. وجينا للبيت وجلسنا نسولف شوي .. جابوا سفرتهم .. ثم جابوا الغسول .. وما ادراك ما الغسول .. ؟! .. طست مويه يغسل فيه الضيف يديه قبل ما يسمي .. من باب اكرام الضيف .. جابوا الغسول عندي في محلي .. الغدا غدا البيت ما فيها كلام .. يقطعون لي .. ويقربون اللحم الطيب .. وكل هذي علومن معروفة عندنا لكني استغربت اهتمامهم الزايد .. عادة تكون ها العلوم مع كبير السن أو كبير القدر .. وأصلا ها العادات قلت ممارستها بين الشباب .. نجدها بين الجيل الذي قبلنا في بعض افراده .. ونجدها بشكل كبير في الجيل الذي قبله ..

تغدينا ولله الحمد .. وبركت لهم .. جيت أبمشي .. قال رفيقنا ..
" قيّل الين العصر .. خذ لك غطة .. "
ضحكت ..
" غطيطة .. "
" أنا ما اعرف الغطة والغطيطة .. ولا اتعامل بها .."

نسيت اقول ان البدوي كان رايحن للدمام يبي يقدم على وظيفة في التحلية .. الرجال معه شهادة البكلوريوس في المتوسطة اللي جنب بيتهم .. عرضت عليه وعلى احد اخوانه انهم يعطوني ملفاتهم واقدم لهم في الرياض في مصلحة المياه حيث انها معلنة عن وظايف .. قالوا لي خذ الملفات وقدم لنا .. وانا كانها بتشغلك فمكانها معلوم .. يعني الزبالة الله يكرمكم .. قلت لا بالله الا بروح لمهم .. وبقدم لكم عندهم وعند غيرهم .. رحت للمصلحة وطلبوا حضور المتقدم شخصيا .. جلست الملفات في سيارتي عدة اشهر حتى تعتق وتحل البركة فيها فيحصل اخونا البدوي على وظيفة مدير بنك !! .. ثم نزلتها في بيتنا وهي موجودة الى الان .. وكنت بصراحة حريصا تلك الفترة على ان اجد ما يناسبهم واقدم لهم .. لكن ما الله كتب خاصة اني غادرت الرياض الى الحجاز في رحلة عمل << بلا نصب .. استغرقت الاجازة باكملها ..

ابرز سماتهم البساطة والعفوية والتعلق بالله واحسان الظن به .. اقول التعلق بالله واحسان الظن به لان الناس تعلقوا بالرواتب والوظائف وغفلوا عن ان الله هو الرزاق الذي عنده خزائن كل شيء .. والكرم الذي تحكيه هذه القصة .. هم عملة نادرة قلما وجدت في هذا الزمن .. لله درهم ..
ابو عزيز غير متواجد حالياً   رد مع اقتباس
قديم 13-10-2006, 13:27   #2
The uNiQuE
عضو سفمور
 
تاريخ التسجيل: Feb 2006
المشاركات: 126
افتراضي

يا ما حلا الفنجال مع سيحة البال ... في مجلس مافيه نفس(ن) ثقيله
هـــــذا ولــد عـــم وهذا ولد خــــال ... وهذا رفيق مالقينـــا مثيـــــــله
ويالــيت رجـــال يبـــدل برجــــــــال ... وياليت في بدلا الرياجيل حيــله
The uNiQuE غير متواجد حالياً   رد مع اقتباس
قديم 13-10-2006, 13:47   #3
يوسف الشاهين
مشرف سابق
 
تاريخ التسجيل: Jan 2006
الدولة: Jubail Ind. City
المشاركات: 6,091
افتراضي

اييييه.... والله ان ما عندهم سالفة .... الناس تطوروا وصاروا يقدمون همبرقر وبطاطس وطشت ببسي ... وهذول الى الحين طشت لبن...... تعال عندنا البيت يا بو عزيز اعلمك الكرم على اصوله.....

تحياتي......
يوسف الشاهين غير متواجد حالياً   رد مع اقتباس
قديم 13-10-2006, 13:53   #4
فريشمان
عضو ماستر
 
تاريخ التسجيل: Jan 2005
الدولة: في الأرض
المشاركات: 4,341
افتراضي

بسم الله

والله ونعم بالكرم وأهله

أقول بو عزيز ما جبت لنا من اللبن اللي عندهم والتمر تمر الأحساء

طيب وشرايك بالحسا وأهلها

ما شاء الله ناس طيبين تحطهم على الجرح يبرا

الله يهنيهم ويصلحهم

مشكور أيها الأب المعمر

اقتباس:
تعال عندنا البيت يا بو عزيز اعلمك الكرم على اصوله
يالله مشينا

لا تقصر علينا أخوي يويو ومع جدو أبو عزيز

معليش على قطة الوجه لكن لازم أحضر مع الشايب
فريشمان غير متواجد حالياً   رد مع اقتباس
قديم 13-10-2006, 14:00   #5
يوسف الشاهين
مشرف سابق
 
تاريخ التسجيل: Jan 2006
الدولة: Jubail Ind. City
المشاركات: 6,091
افتراضي

اقتباس:
المشاركة الأصلية كتبت بواسطة فريشمان
يالله مشينا

لا تقصر علينا أخوي يويو ومع جدو أبو عزيز

معليش على قطة الوجه لكن لازم أحضر مع الشايب
طبعاًًً طبعاً .... اما يجيني الشايب لحاله وش أسوي فيه.........لازم واحد يجي معاه يشوف أموره
يوسف الشاهين غير متواجد حالياً   رد مع اقتباس
قديم 13-10-2006, 14:19   #6
عصي الدمع
عضو ماستر
 
تاريخ التسجيل: Apr 2005
الدولة: على قمة جبل !
المشاركات: 1,351
افتراضي

ما شاء الله عليك يابو عزيز ... راعي سواليف ما تنمل.

من زمان ما شفت موضوع محلي الإنتاج

الكرم من أبرز صفات العرب الرائعة، ولعلها كانت الوحيدة في زمن من الأزمان


صراحة عجبتني مغامرتك، من يوقف لواحد في الخط هالأيام !!
عصي الدمع غير متواجد حالياً   رد مع اقتباس
قديم 13-10-2006, 14:51   #7
عاصم الغامدي
مدير سابق
 
تاريخ التسجيل: May 2005
الدولة: KFUPM
المشاركات: 8,129
افتراضي

موضوع روعة يابو عزيز



انا واعوذ بالله من انا

العام الماضي وقفت لواحد بالخط ( فجدة )...

شكله كان حركات وبشت وآخر حلاوة...

جهت العمودي انتركونتينينتال عند الكورنيش...

قالي يولدي تكفى المطاااااااااار...


المهم طلع وتعرفت عليه ..


طلع وكيل وزارة التربية والتعليم ...


ورب صدفة خير من ألف ميعاد..
عاصم الغامدي غير متواجد حالياً   رد مع اقتباس
قديم 13-10-2006, 16:28   #8
pete
عضو ماستر
 
تاريخ التسجيل: Feb 2006
الدولة: الدمام
المشاركات: 1,896
افتراضي

ونعم والله هذه الناس اللي تعرف الاصول واهل الطيب اللي مثلك يا بوعزوز يستاهلون وعليك بالعافية بالغدا واللي اني قريته وانا صايم والصورة قلت يا بوعزوز يا تفطرني اليوم هالصورة يا اني اضرب عن الطعام سنة


بس استهديت بالله بعدين وقلت افطر في بيتنا
pete غير متواجد حالياً   رد مع اقتباس
قديم 13-10-2006, 17:18   #9
سفمور بوي
عـــضو
 
تاريخ التسجيل: Jul 2003
الدولة: الشرقية
المشاركات: 1,589
افتراضي

الله اكبر يابوعزيز ... قلبت مواجع وذكريات جميلة قضت عليها نفوس الناس الشينة ...
تحياتي ابو عزيز
سفمور بوي غير متواجد حالياً   رد مع اقتباس
قديم 13-10-2006, 18:35   #10
يوسف الشاهين
مشرف سابق
 
تاريخ التسجيل: Jan 2006
الدولة: Jubail Ind. City
المشاركات: 6,091
افتراضي

اقتباس:
المشاركة الأصلية كتبت بواسطة معدن
انا واعوذ بالله من انا

العام الماضي وقفت لواحد بالخط ( فجدة )...

شكله كان حركات وبشت وآخر حلاوة...

جهت العمودي انتركونتينينتال عند الكورنيش...

قالي يولدي تكفى المطاااااااااار...


المهم طلع وتعرفت عليه ..


طلع وكيل وزارة التربية والتعليم ...


ورب صدفة خير من ألف ميعاد..
وكييييييييييييييييل وزااااااااااااااااااااااارة التربية والتعلييييييييييييييييييييييم يدور أحد يوصله@37@

والله اني ما اكذبك يا معدن بس حاس انه فلعها !!!@62@
يوسف الشاهين غير متواجد حالياً   رد مع اقتباس
قديم 13-10-2006, 19:55   #11
سفمور بوي
عـــضو
 
تاريخ التسجيل: Jul 2003
الدولة: الشرقية
المشاركات: 1,589
افتراضي

ههههههههه ... كلشي جايز يالحبيب ليش لا !
سفمور بوي غير متواجد حالياً   رد مع اقتباس
قديم 14-10-2006, 01:41   #12
عاصم الغامدي
مدير سابق
 
تاريخ التسجيل: May 2005
الدولة: KFUPM
المشاركات: 8,129
افتراضي

حبيبي يويو...

معايا الكرت تحب أعملك سكاننج له...

الرجال وكيل وزارة التربية والتعليم لشؤون المعلمين..
ووقتها سواق الوزارة تأخر عليه...

لاتخاف

أنا إن شاء الله على حذو سيدنا أمير المؤمنين عمر بن الخطاب الذي يقول:

" لست بالخب ولا الخب يخدعني "

مو منك أصلا يا يويو وفي رواية الشرهة مهي بعليك على اللي يقلك القصة
عاصم الغامدي غير متواجد حالياً   رد مع اقتباس
قديم 14-10-2006, 11:26   #13
ابو عزيز
عميد المنتدى
 
تاريخ التسجيل: May 2003
المشاركات: 3,168
افتراضي


اليونيك ..

شرف عظيم انلتناه وعطر احذيتناه بمروركم الكريم ولا يهون من مر وحضر .. لكن لازم ندلعك شوي .. ان الله يستور عليك ..

اليويو ..

هات الوصف .. ولا تصدق فريشمان تراه مهوب جاي .. لكن بجيب معي جوهر يصاليني .. وزبيدة ان كان لها محل فترى ما نستغني .. وبالنسبة لوكيل الوزارة فيقول المثل ياما في السجن مزاليم ..

فريشمان ..

تمرهم على ما اذكر كان زين .. واللبن يخوك لوه اقط ما صبر ها السنين .. وبالنسبة لعزيمة اليويو فيلله مشينا الله لا يعوق بشر .. تدل الجبيل بس .. ؟! ..

عصي الدمع ..

اشكر لك حرصك على الانتاج المحلي والسعودة في هذا المنتدى الشامخ .. اشكر لك مرورك يبو كل شي ..

معدن ..

يخوي على كثر اللي لقطتهم من الشوارع ما عمري تعديت راعي غنم او سواق تريله الا مع ذاك البدوي .. وناس تلقط لها وكيل وزارة .. لا ويرقمه بعد .. الرواية معقولة من كاتب نصدقه .. شف ان كان صديقك وكيل الوزارة له دخل في شؤون المعلمات فتكفى وتكفى تهز الرجاجيل عطه الوه وخله يوظف اختي في الرياض .. انت خابر النسوان في الاقسام النسائية الحكومية مهنا ذمة ولا هنا عمل .. المعاملة محولة لهم من سبوعين ويقولون ما وصلت .. والصادر والوارد يقول مصدرة في نفس اليوم اللي جيتنا فيه .. وراح التقديم عشان فقعسة النسوان الله ياخذ بعضهم .. << والله اللي وجهه وجه .. ..

بيتي ..

والله وانا اخوك الرز ماله كرت عندي في الجامعة .. مدري ليه سبحان الله .. ولا في رمضان .. خاصة مع نزوح رمضان للصيف والحر .. تشكر على المرور ..

سفمور بوي ..

الفلوس تغير النفوس .. مثل ما يعرف معناه الا اللي مشاهدن حال الناس ايام الفقر وقارنها بحالهم حال الغنى .. لدرجة ان احد السلف واظنه ابن تيمية ضرب مثلا لمعنى هذا المثل بحال الصحابة ايام خلافة ابي بكر وعمر ثم في اواخر خلافة عثمان رضي الله عنهم .. وكان تمثيله لشدة خلافهم في اواخر خلافة عثمان .. وعلله بان نفوس البشر اذا اغتنت شامت .. ذلك ان الصحابة اختلفوا في خلافة الخليفين الراشدين ابي بكر وعمر لكن الخلاف لم يصل بهم الاقتتال كما فعلوا بعد عثمان .. ولم يكن كلامه عن المثل الذي سقته انفا << هذي خاطرة مرت ..
ابو عزيز غير متواجد حالياً   رد مع اقتباس
قديم 14-10-2006, 16:47   #14
يوسف الشاهين
مشرف سابق
 
تاريخ التسجيل: Jan 2006
الدولة: Jubail Ind. City
المشاركات: 6,091
افتراضي

اقتباس:
المشاركة الأصلية كتبت بواسطة معدن
مو منك أصلا يا يويو وفي رواية الشرهة مهي بعليك على اللي يقلك القصة
أحلى................. والله تعرف لغات
يوسف الشاهين غير متواجد حالياً   رد مع اقتباس
قديم 15-10-2006, 19:33   #15
pete
عضو ماستر
 
تاريخ التسجيل: Feb 2006
الدولة: الدمام
المشاركات: 1,896
افتراضي

ههههههههههههههههه اليويو تعجبني حركاتك

ولا الاروع تحت التوقيع (((((ترا مو النايف اللي سوا التوقيع)) حلوة الحركة هذه


هههههههههه الله يسعدك
pete غير متواجد حالياً   رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 17:16.


Powered by vBulletin® 2020
Copyright ©2000 - 2020, vBulletin Solutions, Inc
sKFUPM Modern Plug-ins, Developed by ONE


جميع الحقوق محفوظة لموقع طلاب جامعة الملك فهد للبترول والمعادن 2003 - 2011 sKFUPM ©.