زبدة الزبدة ؛ الطريق الى مراتب الشرف

السلام عليكم ورحمة الله وبركاته ؛

واسعد الله صباحكم بكل خير ؛

بناءً على افضال المنتدى الكثيرة علي وقت دراستي فالجامعة حبيت اشارك بموضوع بعد انقطاع طويل بسبب ظروف الدنيا واشغالها المختلفة ؛

هدف الموضوع باختصار :
ملخص لكل ما تعلمته بحياتي الجامعيه ونصائح وطرق باذن الله يكون موضوع شامل يستفيد منه الاوريا الى السينير


عطوني وقت ارتب افكاري عشان اطلع بالموضوع باحسن صوره ؛


واتمنى عدم المشاركه بالردود حتى انتهي من كتاباتي وساعطيكم باذن الله بعدها الفرصه للحوار والنقاش والاستفسارات ؛


لي عودة قريباً

 

١- الهدف

طبعاً وللاسف كثير من طلاب الجامعه بنسبه عاليه ؛ داخلين الجامعه بدون هدف

والبعض الاخر مقضيها لعب وفله وسبهلله ومضيعه لوقته ووقت الجامعه

قبل ما تدخل الجامعه ؛ لابد يكون عندك هدف ؛ ليه دخلت هالجامعه بالذات ؟ وش التخصصات اللي تهمك ؟ للاسف كثير ما يعرف حتى وش التخصص اللي يناسبه !

نقطه مهمه ؛ مرحله الجامعه من اهم مراحل حياتك وهي التي ستحدد مستقبلك ؛ انسى المدرسه والكلام الفاضي وركز بهدف واحد ( عندك خمس سنين تبي تدرس تخصص وتفهمه وتتخرج بمعدل حلو من خلاله تضمن وظيفه تناسبك )

لما تخلي هالهدف قدامك بيصير الموضوع جدي عندك هدف واضح ووقت محدد وهدفك توصل هالهدف بأسهل وانسب طريقه ممكنه

 

٢- الصاحب ساحب

النقطه الثانيه هي من تصاحب وكيف تختار صاحبك بالجامعه ؛

وهنا اقصد بالصاحب هو اللي بيكون ملازم لك طوال فتره دراستك التخصصيه وليس زميل قابلته بكلاس او تعرفت عليه بالجيم

لمعلومياتكم اختيار صاحب او ٢ او ٣ ويا حبذا يكون معاك بالغرفه كروميت من اهم الاشياء بالجامعه لاسباب عديده منها خلق جو تنافسي شريف بينكم يحمس ع الدراسه والتحصيل الدراسي ؛ المشاركه وتبادل المعلومات والنقاشات ؛ عقلين او ثلاثه مجتمعه افضل من عقل واحد فمواجهة الصعوبات الدراسيه لما يصعب عليك فهم شي معين.

تبي تجي تختار صاحبك راعي فله وسحبات ع الدوام وعلى الهوموركات وواحد ما همه دراسته قد ما همه فلته ووناسته هنا بتتاثر وتاخذ من طبايعه وفالنهايه تقلب مثله وتضيع مستقبك

عن نفسي كنا قروب ٤ اشخاص وقت الجد جد ووقت اللعب لعب واقولها انهم بعد توفيق الله ودعاء الوالدين من اهم اسباب نجاحي فالحياه الدراسيه بالجامعه

 

٣- كلام الناس

كثير وكثير طلاب يتاثر بكلام البعض الاخر بشكل سلبي مما ينعكس عليه سلبياً نفسياً ودراسياً .

اشهر مثال ؛ كورسات الفزكس بالفرشمان كانوا يقولون لي لو جبت بالميجر درجه من رقمين ( يعني ١٠ وفوق ) انت احسن واحد فالعالم واحمد ربك

كذا انت داخل اختبار ٢٠ سؤال وهدفك تحل ١٠ !! وتكون وااو

كل اللي بقوله ان كل شخص بالجامعه له تجربه تختلف عن اي شخص اخر ؛ فلا تسمع كل ما قيل وقال وتجي تطبقه ع نفسك

اعرف ان كل كلام سلبي ينقال عن دكتور او كورس او اختبار يمثل فقط صاحبه وصاحب التجربه السيئة ؛ اما انت فشخص مختلف وتجربتك مختلفه ولا تخليها تكون تجربة سيئة اخرى وتصير ضحيه جديده

لو جبت العيد بكورس فانت المقصر و ليس من الدكتور او الكورس نفسه ؛ فلو سمحت لما احد يسالك عن تجربتك الفاشله قوله بكل صراحه انا كنت مقصر وجبت العيد وشكراً

 

٤- دعاء الوالدين

باختصار امك وابوك فوق كل شي ؛ وصدقني لو ماهم راضين عليك ما راح تتوفق لا دراسياً ولا غيره

رضى الوالدين ودعاءهم لك سبب رئيسي لنجاحك بحياتك كلها وليس فقط دراسياً

 

٥- تنظيم الوقت

تنظيم الوقت لو سألتوني عنها ؛ اقولكم باختصار هي (الفرق بين الطالب الناجح والطالب الفاشل) ؛

دائماً خذ لك نسخه من تقويم الجامعه وافتح لك ملف اكسل ؛ رتب حياتك الدراسيه وغير الدراسيه ؛

عندك هومورك يوم الاثنين وكوز يوم الثلوث وميجر الربوع وتسليم بروجكت الثلوث ؛ لازم يكون عندك خطه او بلان متى تبدا متى تخلص باليوم بالاسبوع لو اضطريت حتى بالساعه ؛ ترتب اولوياتك من الاهم الى الاقل اهميه

كذا انت تغير نفسك من انسان عشوائي الى انسان مرتب منظم تعرف تدير امورك

 

٦- الخطة الدراسية

ضع خطتك الدراسيه المبدئية بعد الاوريا وقسم المواد على السمسترات ؛ هدفك تخلص البكالريوس في ٥ سنين

خذ صيفي ؛ خذ صيفي ؛ خذ صيفي !!

لما تنزل مواد بالسمر تريح نفسك من ضغط المواد بالسمستر العادي وتخفف ع نفسك ؛ والصيف شهرين خفيفه سريعه

حط فبالك انت هنا خمس سنين اجعلها هبه للدراسه ولاحق ع الاجازات والسفرات والروحه والجيه ؛ ادري البعض بعيد عن اهله ووده يقضي وقت الاجازه مع اهله وما الومهم

لكن هي خمس سنين ومثل ما قلت قبل تحدد مصير حياتك فيها ؛ وانا اشوف الصيفي مهم

راقب خطتك الدراسيه بعد كل سمستر واذا احتجت تعدل عليها عدل ؛ اعرف وش البريركوست للمواد عشان تعرف تضع لك خطه دراسيه مناسبه وما تجيب العيد وتاخر نفسك سمستر او سنه عشان ما عرفت ان الماده الفلانيه تفتح الماده اللي بعدها

 

٧- تسجيل المواد

يمكن البعض يستهين بتسجيل المواد لكن هالنقطه سلاح ذو حدين !!

عندك خطه مسبقه وتعرف المواد اللي بتسجلها ؛ احياناً تقفل سكاشن وصعبه تفتح وتحتاج تلعب وتغير بالخطه عشان تمشي امورك

طبعاً فيه امور كثيره تهم تسجيل المواد من اهمها :
١- الدكتور
اختيار الدكتور احياناً يكون مهم ويوفر عليك الكثير لكن مبدئياً فالجامعه الدكتور يشكل ٣٠٪‏ وانت عليك ٧٠٪‏

الدكتور الممتاز الفاهم واللي يعرف يشرح ويوصل المعلومه بيريحك وقت المذاكره اكثر من الدكتور اللي من جنبها ؛

ولكن لو انحديت ع دكتور مافيه هالمواصفات ؛ لا تيأس وبدل يكون ع الدكتور ٣٠٪‏ خلها ١٠٪‏ واتعب ع نفسك زياده وبتعدي الامور بسلاسه

لا تاخذ الدكتور السيء سبب لنفسك عشان تأدي أداء سيء بالماده

٢- الوقت
تنظيم الجدول مهم جداً ؛ والدوام الصباحي اللي يبدأ من ٧ هو افضل جدول لك عزيزي الطالب ؛

ليه ؟؟
منزل ٥ مواد مثلاً خل يومك يبدأ من ٧ ؛ كذا انت تخلص مع بريك الغدا وبعدها عندك وقت تريح تاكل تاخذ غفوه وتذاكر بالليل ؛ ويكون عندك غيره يومين تقدر تحط فيها لابات او تضغط نفسك وتخلي اللابات مع الكلاسس وقت الظهر ؛ ويومين او يوم اوف وسط الاسبوع ولا احلى وطبعاً مو شرط تضبط كل سمستر لكنها ضبطت معي بالجونيور والسينير

٣- المبنى
فيه ناس يهمهم الكلاسات بمباني قريبه من بعض عشان ما يتاخر عن كلاس وكذا ؛ نقطه ليست ذات اهميه

٤- جدول الفاينلز
اهم نقطه بالموضوع ؛ قبل يفتح التسجيل شيك وقت الفاينلز شوف وضعها كيف ؛ لا يجي نهايه السمستر تكتشف ان عندك ٣ فاينلات في ٣٦ ساعه وتلطم ع راسك !!

اذا اخترت المواد اللي بتنزلها اول شي شوف جدول فاينلاتها اذا كان ممتاز ومريح ومعقول بعدها شوف اوقات الكلاسات ومنها توكل على الله يا صديقي

 

٨- المتعه

ان من اكثر اسباب الضغطي النفسي الدراسي هو اجبار نفسك على الدراسه مع عدم الاقتناع باهميه المواد.

لنخرج من هذا المأزق ؛ يجب عليك ان تتمتع بالدراسه ولا تضع هدفك الاول الدرجات او القريد و المعدل ؛

من باب الاستفاده واستقبال معلومات جديده هي الطريقه الانسب لتقنع عقلك بالاستمرار وتشجعه وتحفزه على المذاكره


بالمختصر المفيد ؛ اعتبر الدراسه تسليه ومتعه وليست عبء على كاهلك ؛

 

٩- المكافأه

تعامل مع عقلك بسياسه محنكه في سنين دراستك

كافئ نفسك ! اي نعم كافئ نفسك ولو بالشي البسيط؛

انك تكافئ نفسك ؛ عقلك وجسمك ليس بالشي الصعب في الجامعه وهالشي يعتبر حركه تحفيزيه لنفسك للاستمرار باذن الله ؛

امثله ؛
١- كافئ نفسك بمشاهده فلم او تلعب ساعتين بلايستيشن اذا انتهيت من حل واجب دراسي ؛

٢- كافئ نفسك بصكة بلوت اذا انتهيت من مذاكره كوز

٣- كافئ نفسك بيوم او يومين راحه اذا انتهيت من بروجكت

ممكن البعض يراها نقطه تافهة ؛ ولكن صدقني انها لشيء مهم

 

١٠- الدكتور والكلاس ؛

كما ذكرنا مسبقاً ؛ الدكتور يشكل فالغالب٣٠٪‏ من مهمتك الدراسيه والباقي انت وكم ناوي تشد حيلك ؛

وقت الكلاس حاول قد ما تقدر تنتبه وتركز وتستقبل اكبر قدر من المعلومات عشان تريح نفسك لاحقاً

اكتب نوت مع الدكتور ؛ فالكتابه مهمه لتساعدك على الحفظ واسترجاع ما تم دراسته ؛

اترك الجوال عنك ترى السوشال ميديا والالعاب ما راح تطير فهالكم ساعه اللي بتحضر فيها كل يوم ؛ لكل شي فيه وقت اذا كنت مرتب وقتك .

لو اشكل عليك فهم شي وقت الشرح اسال الدكتور بكل اريحيه لكن احذر تصير نشبه وكثير اسئلة وتخرب مزاج وتركيز زملائك.

استخدم الاوفس اورز للاشياء اللي منت فاهمها لا تستحي واستفيد من اوقات مخصصها الدكتور لك ايها الطالب ؛ ولا تسال اسئله غبيه عشان تبين للدكتور انك مهتم وهدفك تضبطه (يعني شوف اني مجتهد) ؛ ترى الدكتور ماهو غبي ويعرف هالشكليات.

 

١١- الهوموركات والكوزات

نبدأ بالهوموركات ؛ هدفها الاساسي تقيس فهمك للسكشن او الشابتر ؛ وتدرب نفسك بنفس الوقت على حل الاسئلة وكل ما اكثرت الممارسه كل ما سهلت عليك الصعوبات ؛

ترى ماهو صح انك تنقل الهومورك من السليوشن مانول ؛ والدكتور عارف ان فيه سليوشن وبالرغم من ذلك يعطيك هوموركات وانت وضميرك ؛

فكيف نتعامل مع الهوموركات ؟؟
- اول شغله لابد تكون محضر للسكشن او الشابتر اللي عليه الهومورك ؛ ومذاكر مذاكره ولو سريعه وفاهم القوانين وميف تستخدمها ؛ تكون حليت اكزامبلز سواء مانت بالسلايدز او بالكتاب

- ثاني شغله اجتمعوا ٢ او ٣ الى ٤ زملاء وحلوا الهومورك مع بعض ؛ هالشي ممتاز من ناحيتين الاولى هي ان كل واحد يحفز الثاني والثانيه تساعدون انفسكم وكل واحد يكمل معلومه ناقصه لزميله.

بعض الدكاتره يتعمد يجيب سؤال كوز من الهومورك وبهالشي يقيس هل انت حليت الهومورك بنفسك او نقلته من زميلك او السليوشن .


الكوزات ؛ يجب معاملتها كمعامله ميجر او فاينل؛
متى ما كان عندك كوز حط خطه مسبقه محكمه كيف ستذاكر له ؟ وكل ما شديت حيلك بالكوزات كل ما ريحت راسك بالمياجر والفاينلات ، و بتكون فاهم اللي درسته قبل

 

١٢- المياجر والفاينلات ؛

انسب طريقه بوجهة نظري ؛ انك تذاكر كل شي عندك ؛
اذا الدكتور يشرح من سلايدات ؛ ذاكر السلايدات ثم مر ع الكتاب ولو سريعاً ؛ الكتاب اشمل واعم من السلايدز

امسك اسئله كل سكشن او شابتر بالكتاب وحلها كلها ؛ احياناً تكون فيه اسئله متشابهة حل واحد منها ؛ ولا تفهم مني اذا الشابتر عليه ١٠٠ سؤال انك لازم تحل ال ١٠٠ كلها ؛ لا لا

ممكن تمر على كل سؤال وتشوف المعطيات والمطلوب وبراسك تقول ان هالسؤال سهل ينحل بكذا وكذا ؛ ولو شفت سؤال فكرته معقده وصعبه هذا اللي المفروض تحله

بعد ما تخلص حدد الاسئله المهمه عشان تمر عليها وقت المراجعه متى ما احتجت لها وحاول تتوقع وش ممكن يكون سؤال ميجر منها ! يعني ممكن تمر ع سؤال فكرته حلوه ويكون شامل لكل محتوى الشابتر وتتوقع ان هذا يجي بالاختبار ؛ وفعلاً ممكن يجيك بنفس الارقام بعد وقتها تضحك بالاختبار لانك عارفه

امسك الاولد اكزامز وحلها بكل جديه ؛

" ع قد ما تحل وتتعب على قد ما تحصل "

في النهايه عندك سلايدز ؛ كتاب ؛ هوموركات ؛ كوزات ؛ اولد اكزامز ،،،، هذي كلها لابد تمر عليها قبل اي ميجر او فاينل

 

١٣- مواد الالكتف والسينير بروجكت

باختصار ؛ دائماً ابحث عن ما يفيدك وليس عن الاسهل ؛

بكره بالانترفيو للوظيفه حط فبالك يجيك سؤال عن هالنقطه وش اخذت مواد الكتف ؟ ووش كان السينير بروجكت اللي اشتغلت عليه ؟


اكيد ودك يكون جوابك مشرف ويرفع الراس ويخليك تتكلم بثقه وانت رافع راسك

 

كذا انا انهيت موضوعي ؛ واتمنى اني قدمت شي مفيد لكم اخوتي ؛



نصيحه اخيره ؛
ذاكر للكوزات مذاكره مياجر + حل الهوموركات بنفسك ، اضمن لك وقت المياجر و الفاينلات تقعد تلعب سوني وتدق بلوت وما تذاكر الا بو ساعتين ثلاث لكل ماده ..


الان خذوا راحتكم لفتح النقاش والحوار بالنسبه للموضوع كاملاً ولنقاطه ؛ واي نصيحه بقدر اقدمها لن ابخل فيها عليكم ؛ وسنعامل اسئلة طلاب الميكانيكال معامله خاصه واي شي فراسكم اسدحوه وان شاء الله نفيدكم ؛

تحياتي وتقديري لكم ؛ وارجو للجميع التوفيق والمجاح في حياته الدراسيه والمهنيه

 

يشرفني مرورك يا غالي ؛ وفعلاً التجربه خير برهان واسال مجرب ولا تسال طبيب

 

عندي فكره موضوع جديد عن اختبار ال ( FE ) ؛ وش رايكم ؟؟ اذا فيه مهتمين بالاختبار مفكر اطرحه