قــصـة كــفــاح و تــمــيز " خــريــج"

السلام عليكم ورحمه الله وبركاته

رمضان مبارك علينا وعليكم ان شاء الله , والله يجعلنا من صوامه وقوامة , ويعتق رقابنا من النار

اسف على التأخير الحاصل في انزال بقية الموضوع , والله يشهد اني احرص منكم على تكملة القصة حتى نهايتها , لكن احيانا تواجهك بعض الاشياء اللي ماتكون حاسب لها حساب وتلخبط الاوضاع عليك شوي , لكن مو مشكلة بنحاول ان شاء الله نكتب لكم اللي نقدر عليه وربنا يسهل

في جزءنا الماضي تكلمنا عن بدايتي في مواد التخصص واهمية البداية القوية فيها وتنظيم الوقت حتى يتسنى للطالب الابداع في الجامعه وجعل امورة اكثر تنظيماً واكثر اريحية .

في ترمنا الماضي ( ترم 062 ) تحدثنا عن قصتي مع زميلي فيصل الله يذكرة بالخير واحداثها , وفي معمعه ترم (062) حان الوقت لأنزال جدول (071) , وكنت وقتها احس بقابليتي الكبيرة بزيادة عدد الساعات اكثر من 16 ساعه , لأني احسست اني قادر بعد توفيق الله على انزال اكثر من 16 ساعه . وبدأت المشاورات والجلسات على اختيار المواد اللي ممكن انزلها في هذا الترم , ولازلت اتذكر واعرف اهمية مواد التخصص , وكيف اسوي جدول يناسب مواد التخصص ويخليني ابدع فيها بالاضافة الى المواد الاخرى , وبعد عدة مشاورات وخصوصا من المقربين مني على عدد الساعات اللي ممكن انزلها في الترم وكنت محتار مابين 17 ساعه و19 ساعه ( الحد الاقصى من الساعات الممكن انزالها في الترم ) وجلست من زميلي في الشقة اناقشة على موضوع عدد الساعات وكان زميلي يشد على يدي ويقول انت قادر على 19 ساعه بترتيبك للأمور.

ومع وقت التسجيل كنت افكر في انزال 19 ساع بترتيب معين وبجدول مرتب , لكن للأسف جدولي بللته وشربت ميوته بسبب ان 3 مواد من اللي كنت افكر في انزالها قفلت وقت التسجيل , وتلخطت كل اوراقي وحسيت اني محطم ومحبط لأن الترتيبات اللي كنت على امل الحصول عليها تبخرت , ولازم ارضى بالامر الواقع واتكيف مع الاجواء وانزل جدول من جديد بخربطة جديدة , وقعدت اطقها من هنا وهناك حتى يتناسب الوقت ومايكون فية تعارض بين المواد في الاوقات , وبعد شد وجذب قدرت انزل 16 ساعه , والادهى والامر ان اغلب المواد اللي كنت بنزلها مع دكتور معين تبخرت ونزلتها كـ عادتي مع دكاترة لاأعرفهم حق المعرفه او اني سمعت عنهم , وكانت هالمشكلة ( عدم معرفه الدكاترة ) مشكلة عادية جدا جدا لأني لي تجارب سابقة مع زميلنا يوسف وان الاصابع ليست سواسية وكل شخص له وجهه نظرة في موضوع الدكاترة . المهم نزلت 16 ساعه وكان الهدف انزال 19 ساعه.

الشي اللي لازم تعرفونة عندنا في الجامعه ان هناك فترتين لأنزال الجدول , الاولى تكون في الترم اللي قلبة والثانية تكون في الاجازة بين الترمين , يعني انه بأستطاعتي اني اغير الجدول في الصيف في فترة التسجيل الثانية اذا حصلت بعض الشعب مفتوحة , جاء الصيف وجت فترة التسجيل الثانية وانا عندي 16 ساعه , وحصلت مادة مفتوحة وتتناسب مع وقتي وعدد ساعاتها 3 ساعات , على طول ماترددت ونزلتها ^_^ , يعني صار الحين عدد الساعات 19 ساعه وهي هدفي في هذا الترم , ويعتبر هالعدد من الساعات تحدي كبير جدا لي في هالترم , وكنت مستعد ومتشوق لهالتحدي , خصوصا ان كثير من الشباب نصحوني وبقووووة عدم المغامرة في عدد هالساعات وتكون نكسة لي ونقطة سوداء في سجلي الجامعي .

توكلت على رب العباد ونزلت المواد التالية :

EE 205 عدد الساعات 3
EE203 عدد الساعات 4
EE 207 عدد الساعات 3
Chem 101 عدد الساعات 4
Engl 102 عدد الساعات 3
Ias 301 عدد الساعات 2

مجموع عدد الساعات 19 ساعه

ننطلق لـ مغامرتنا الحلوة في هالترم

كالعادة في هالترم رح اخذ عينه فقط من بعض المواد واستشهد بها على بقية الترم , وفي هالترم راح اتكلم عن بعض الاحداث اللي حصلت لي في مادتين اللي هي EE 203 اللي تتكلم عن الالكترونيات و Chem اللي هي الكيمياء ( الكريهه ) <<< وجهه نظري من الثانوية العامة .

بدء اول يوم في الدوام الجامعي وانا كلي حماس ونشاط على مايحتوية هالترم من مفاجأت وتجارب لي , وكان الدوام لابأس به خصوصا ان اول اسبوع في الجامعه لايكون هناك معامل ( لابات) للمواد , وكنت مرتاح ومبسوط على الاخير على المواد وعلى عدد الساعات .

بدء ثاني اسبوع لي في هذا الترم وبدأت المعامل وبدء التعب ياخذ نصيبة مني بدء الدوام الطويل والمتعب يفاجأني يوم ورى يوم , للأمانه ماكنت متكيف على اني اداوم دوام طويل نسبيا بالنسبة لطلاب الجبل , كنت اداوم يومي السبت و الاثنين من 8 صباحاً حتى 5 عصراً بدون اي فاصل عدا بريك الغداء اللي من الساعه 12 الى 1 , ويومي الاحد الثلاثاء والاربعاء كان من 8 الى 12 تقريبا.

قبل الخوض في معمعة هالترم سألت الكثير عن مادة الالكترونيات ( EE 203) وسألت اقرب الناس مني في الجامعه واعرف مستواهم العلمي , فأجابوني ان هذه المادة من اصعب مواد المستوى الثاني ان لم تكن من صعب مواد التخصص في الهندسة الكهربائية بشكل عام بسبب صعوبه فهمها او تخيلها , انا طبعا بديت اخاف خصوصا ان اكثر زملائي اللي اعرفهم كان مستواهم العلمي ممتاز حذروني كل الحذر منها واني لازم اشد حيلي فيها .

ايضا لاأنسى بوجود ماده كنت اكرهها كل الكرة وهي مادة الكيمياء (Chem) في هذا الترم , وكنت على محك حقيقي وقوي بكيفية تنسيق جدول دراسي مناسب ويتناسب ايضا مع كرهي من مادة الكيمياء وخوفي من الالكترونيات واعطاء بقية المواد حقها ايضا . . . فعلا كنت على محق قوي جدا جدا جدا فوق ماتتصورون .

اتذكر كانت بداية هذا الترم على بداية قرب رمضان , ودخل علينا شهر الخير في البداية والصوم كان ياخذ حقة مني والتعب في الدوام ياخذ نصيبة ايضا والاختبارات القصيرة (كويز ) تأخذ حيزها , وبدأت احس بضيق كبير وعدم قدرتي على مواجهه كل هالمتاعب في هالترم .

للأمانه كنت في شهر رمضان افرغ نفسي فقط للدوام ووقت ماأرجع للشقة اكون منهك من التعب جراء الدوام الطويل وانتظر وقت المغرب يحل علينا حتى اشحن طاقتي من جديد , وبعد الافطار اتفرغ لمشاهدة التلفاز ( واقوى سحبة على المواد والمذاكرة ) , صراحه حسيت اني في هالترم ومن خلال المحاظرات في اغلب المواد اني لاأعرف اساسيات المادة ابدا بسبب عدم مراجعتي لها.

بدء اول كويز في الالكترونيات وماكنت قادر اذاكرة , او بالاحرى قريتة ومافهمت اي شي ابداااااااااا ورحت الاختبار وانا مُحطم جدا جدا ودخلت الكويز وطبعا ماعرفت وش يبي من السؤال ولافهمت شي ابدا , اخذت 1 من 10 مع ان المفترض اخذ صفر , بس الدكتور عطاني هالواحد عشان يكسب فيني اجر ^_^.

بدأت اختبارات بقية المواد وانا في سباااااااااااات عميق وتعب لايعلم به الا الله وفي تحطم بعد تحطك من كل يوم اداومة في الجامعه , حتى احسست اني ادور على النجاح فقط في هالترم والسبب اني اهملت ونكون اكثر صراحة ايضا , ان عدد 19 ساعه ثقيلة جدا علي بوجود شهر رمضان على البداية , كويز وراء كويز والدرجات في انحدااااار شديد والامال تتحطم وكأني اتذكر نصيحة زملائي انها مجازفة , احسست بضيق كبير رغم اننا لم نختبر اي اختبار شهري حتى الان ...

وبدأت الاختبارات الشهرية وانا على امل كبير بعد توفيق الله ان احصل عل درجات عالية حتى يرج الامل والطموح الي من جديد , بدء اول اختبار شهري لي في هالترم وكان في مادة الكيمياء وبعدها اتت الاختبارات واحدة تلو الاخرى والدرجات لاأنساها ابدا وكانت على النحول التالي :

Chem اخذت 10 من 20 يعني 50% فقط
EE 203 ( الالكترونيات) اخذت فيها 6 من 30 <<< للأسف الشديد
EE 205 اخذت فيها 34 من 100 <<< ولازال للتحطيم بقية
EE 207 اخذت فيها 22 من 40

فعلا كانت صدمة ورى صدمة ورى تحطيم ورى امل مفقود ورى حلم ضائع ورى كل شي مُحطم للآمال , حسيت انه لامجال لي اطلاااااااااقاً لـ تكملة هذا الترم المحبط , احتاج فعلا لجلسة مع نفسي احتاج الى راح بدني من الدوام المتعب والمنهك , احتاج الى وقف الدراسة في شهر الخير لأنه لامجال لي للأبداع فية اطلاقا .

جاء وقت اجازة عيد الفطر وكانت بدايتها على ماأتذكر في 20 رمضان ان لم تخنني الذاكرة , رجعت لأهلي في الرياض على غير عادتي محبط جدا , لاحظت علي الوالدة ( حفظها الله ) اني مو على طبيعتي المعتادة اطلاقا , قالت لي ياوليدي انت مو اللي انا اعرفة , اكيد فية شي مضايقك او شي مكدرخاطرتك , قلت لها يايمة الامر كله يخص الجامعه وانا جبت درجات في اختباراتي الشهرية محطمة جدا وماتوقعت يوم من الايام بيصير فيني كذا , وعلى طول جاء الرد من والدتي الله يطول عمرها وقالت :

بس عشان كذا انت متضايق , الحمد لله والشكر بس , احسب ان فيك شي كايد , لكن بم انه شي في الجامعه , انا اخبرك متى ماحبيت تصحح الامور تصححها بعد توفيق الله واخبرك مو اللي يرمي المنديل بدري , واقولك ياوليدي وسع صدرك في هالاجازة وارجع للجامعه وانت منتشي ومتحمس مثل ماكنت اخبرك

بعدها حسيت شوي بالدعم الكبير من الوالدة اطال الله في عمرها وعشت حياتي في الاجازة ووسعت صدري وقلت الجامعه لها وقتها اذا رجعنا والكلام في الماضي نقص في العقل , ونسيت الموضوع حتى رجعنا للجامعه من جديد وبدأت احاول اصحح اي شي يمكن اصلاحه.

للأمانه كان الوقت غير كافي اطلاقاً لأصلاح كل الاشياء , لكن كان الوقت مفتوح لأصلاح بعض الاشياء , خصوصا انه لايتوفر لدي وقت كافي لأصلاح كل شي مع دوام الـ 19 ساعه المُتعب , اول الاشياء اللي سويتها كلمت مدرس خصوصي الله يذكرة بالخير وكان يدرس الكيمياء وكان للامانه مايفهم كويس لكن كان ذكي جدا جدا جدا جدا جدا في اسئلة الامتحانات ويعرف حق المعرفة كيف اسئلة الاختبارات تجي , اول جلسة معه حسيت انه موب فاهم بقدر ماكان يحفظ الاشياء اللي يقولها لي , اذا سألته قال لي ياأبني هذا ماراح تجيك في الاختبار .

قلت له ياخوي ابي استفيد انا بغض النظر عن الاختبارات , صحيح الاختبارات هدف اساسي , لكن ايضا ابي افهم , ويوم فقدت الامل معه بالفهم قلت بيني وبين نفسي وانا ناقص افهم الكيمياء الغثيثة وناقص قلق , خلاص بحفظ اي شي يقولة لي وبكون حفيظ درجة اولى لعل وعسى احصل على نتيجة طيبة , وفعلا بدأت تظهر النتائج الايجابية في الكويزات وبدأت احس ان هالمدرس نزل علي من السماء مع انه ماعندة محصول علمي كبير بس رجال حااااااااااااااافظ ويعلمك الزبدة فقط , يعني اللي يبي درجة فقط بدون فهم ينفع له <<<<<< مو دعاية لة والله , بس للأمانه هو يحفظ ويعلمك اللي يحفظة في النوت الل يكتبة لك وانت الله لايهينك احففففففففففظ وخلاص ولاعمرك فهمت .

جاء الاختبار الشهري الثاني وانا حافظ ( ومافية شي فاهمة ) كل شي حفظ في حفظ , والمفاجأة السارة كانت حصولي على درجة 18 من 20 وهذي اول درجات التصحيح اللي كنت ابحث عنها حتى تعطيني دفعه كبيرة للأمام , على طول اتصلت على الوالدة واخبرتها وقالت لي بكل فخر انا اعرفك زين شد حيلك والله يوفقك ياوليدي .

الان حطيت كل الجهد في مادة الالكترونيات واجتهدت لها بجهد كبير انا وزميلي احمد وبدأت جلساتنا اليومية اللي تستمر يوميا تقريبا بـحدود 5 ساعات تقريبا لأن اوضاعنا في هالمادة كانت سيئة جدا خصوصا درجاتنا كانت الاقل على مستوى الفصل , وشدينا حيلنا في هالمادة وجاء وقت الاختبار اللي كنا فية على المحك.


يــــــــــــــتـــــــــــــبـــــــــع بسبب عدم قدرتي على انزال كامل الرد في رد واحد بسبب طول النص
​

 

طلعت النتائج وكانت النتائج ممتازة لأحدنا ومحطمة للأخر , كانت جيدة لي واخذت 29 من 30 وكان محطمة لزميلي احمد اللي اخذ 13 من 30 , على طول قرر احمد زميلي حذف الترم ويحق له بكل امانه لأن النتائج كانت سيئة لة جدا .

الوقت بدء ياخذ مني الكثير وجاء اختبار EE 207 اللي ماأعطيتة حقة اطلاقا بسبب خوفي من الالكترونيات ومن الكيمياء , وطلعت النتيجة 14 من 40 <<<< تحطيم X تحطيم

جاء اختبار EE205 والتحطيم فيها مستمر واخذت فيها 54 من 100 , حسيت اني بلحق زميلي احمد في حذف الترم , لأن اغلب المواد كات سئية ودرجاتي فيها لاتتعدى الـ B بالكثير , يعني ان بين خيارين احلاهما مر :

الاول : حذف الترم وبدء بداية جديدة ومعرفه نقاط ضعفي في هالترم وتصحيحها

الثاني : اكمال الترم وتحمل الصدمة في المعدل في نهاية الترم وتحمل النزول في المعدل او النزول الكبير له خصوصا ان عدد 19 ساعه عدد مو قليل اطلاقا

بعد استخارة الله قررت اكمال الترم حتى لو نزل معدلي مو مشكلة , والتحطيم في مواصلة معي رغم درجاتي الممتازة في اختباراتي في الالكترونيات والكيمياء , لكن الاكثرية كانت سئية

بدأت الاختبارات النهائية وكان الجدول حالة حالة نفسيتي , جدول مُتعب جدا واختبارات متتالية ومتواصلة والوقت لايكفي اطلاقا لتغطية كل مادرستة في هذا الترم ابدا.

انا حطيت كل حيلي وجهدي على الالكترونيات والكيمياء لأنهم لوحدهم 8 ساعات ولو ابدعت فيهم ممكن يعدلون شوي من الطيحة القوية المتوقعه لي في هالترم .

انتهى الترم وطلعت النتائج وكانت متوقعه جدا

Chem الكيمياء اللي بذلت فيها جهدي ومع مدرسي ( احفظ وامش ) اخذت A
EE 203 ومع الجهد والاجتهاد اخذت B
Ias اخذت فيها A+
EE 205 اخذت فيها C
EE 207 اخذت فيها C
Engl 102 اخذت فيها C ايضا

معدلي الفصلي كان 2.79 من 4 وكان بالنسبة لي ممتاز جدا على الاوضاع اللي مرت علي في هالترم وكانت محطمة لأن معدلي العام نزل عن اول , لكن عرفت اشياء كثرة كانت تنقصني وعرفت اشياء اكثر واكثر عن نفسيعن قدرتي .

اقدر الخص اللي صار هالترم في نقاط اهمها :

1) الثقة في النفس مطلب كبير وقوي , لكن الاسراف في الثقة ممكن يودي الواحد لأشياء ماحسب حسابها بدا , مثلا انا هالترم كنت واثق من نفسي بشكل كبير , لكن ماحسبت حساب للدوام الطويل ايضا ماحسبت حساب لدخول شهر رمضان المبارك علينا في بداية هالترم ولخبط اوراقي كثيراً , يعني للأمانه الكل قادر على انجاز الاشياء , لكن لابد انه يشوف ويحسب حسابة لكل الظروف اللي ممكن تصير لة في الترم حتى لاتقع الصدمة مثل ماحصلت معي

2) الاجتهاد في بعض المواد الصعبة مطلب ايضا , لكن اهمال بعض المواد السهلة ممكن يخليها تكون اكثر صعوبة من تلك المواد الصعبة , ولنا في تجربتي دليل , فمادة EE 205 كل الكهربائيين يعدونها من المواد الاسهل في التخصص ان لم تكن اسهلها واخذت فيها درجة C بسبب اهمالي لها وعدم قدرتي على اعطائها حقها.

3) قبل انزالك لأي جدول لابد من التأكد من موعد الاختبارات النهائية من البداية حتى لاتقع في حرج الوقت في الاختبارات مثل ماحدث معي, لأني احسست بضيق كبير بسبب عدد الساعات الـ 19 وبوحود اختبارات متتالية علي ( زيادة الطين بلة ) , فعلا كانت تجربة قاسية جدا لي وانهاك بدني وعقلي وكل شي

هذا كل مايحتوية ترمنا هذا , كتبتة دون اي ترتيبات ابدا , وترقبونا في ترمنا القادم ( 072) في تحدي جديد مع الـ 19 ساعه

كل التحايا لكم
​