### معادن أم شلمبرجير محتار جدا جدا جدا ###

صراحة لو انا مكانك باختار معادن بالراحة
حتى لو الراتب بس 10الاف, لسبب بسيط وهو اني اكره فكرة الرقوق
صحيح شلمبرجير بتعطيك مبلغ ضخم بس راح تكون برقوق (اتوقع النت سيء) السكن والاكل اتوقع كويس بس بشكل عام هل مستعد تقعد شهر ونص بدون حياة (دوام 12 يعني من 6 الصبح الى 6 المغرب)
هل فرق الراتب يسوى مع ان راتب معادن اصلا ممتاز وما رح تحس باي نقص او ضغط مالي عليك ابدا

غير هذا الي فاهمه انه خبرة شالمبرجير خبرة رقوق, يعني بتبقى بنفس مجالك في الرقوق

 

روح معادن ولا تفكر

 

بالنسبة لشلمبرجير فميزتها الوحيدة ان راتبها عالي ولكن حط في بالك الاتي
1- كمية الشغل جدا اكثر و مدة الشغل 12 ساعة يوميا لمدة شهر ونص في مناطق نائية تراها متعبة جدا نفسيا وجسديا ( وحط في بالك ترى ان احتمال تقعد اكثر من ال6 اسابيع لو احتاجوك)
2- شغلك عادة جدا مختص في مجال معين وماراح يفيدك وينمي مهاراتك لو بغيت تطلع شركة ثانية او حتى تغير المجال، وعلى الطاري، لو رحت شلمبرجير وبغيت تطلع فمن الصعب تسوي مقابلات خصوصا انك غالب الوقت تكون في المناطق النئية
3- الامان الوظيفي المتدني لشركات السيرفس عامة
4- الراتب صحيح انه اعلى لكن لو تجي تقارنها بقيمة الساعة حتما معادن تتفوق فانت فقط تعمل 40 ساعة في الاسبوع بينما راح تشتغل 84 ساعة لو رحت شلمبرجير
5- الكورسات الي تعطيك اياها الشركة مصيرية، فايتعديها او تنفصل

 

نسيبي في شلمبرجير من 2014 ، وانا قد سويت مقابلة معهم قبل ٣ شهور ورفضت العرض بسبب ان نسيبي يقول ترا وضعك الاجتماعي بيكون صعب جدا ، يعني لو فكرت تتزوج بتسحب على عيالك وهذا غير الضغط ونقص الموظفين ومجالها محدود عكس معادن ، لذلك انا اشوف معادن افضل بمليون مره

 

استخير

 

استخير و رح معادن

بتكون خبرة طيبة مع شركة عريقة و لها خطط كبيرة جدا قادمة بإذن الله

ثانيا التنقل سهل لكن مع شلمبرجير صعب و بيكون مجالك محدود جدا

 

شوف الموضوع ذا ممكن يفيدك
https://www.stkfupm.com/forum/threads/%D8%B3%D9%88%D8%A7%D9%84-%D9%84%D9%84%D9%8A-%D9%82%D8%AF%D8%B1-%D9%8A%D8%AE%D8%B1%D8%AC-%D9%85%D9%86-%D8%B4%D8%B1%D9%83%D8%A7%D8%AA-%D8%A7%D9%84%D8%B1%D9%82%D9%88%D9%82-%D9%88-%D8%A7%D9%84%D8%B3%D9%8A%D8%B1%D9%81%D8%B3.145040/

 

معادن وانت مغمض
من جدك تقارن بين شركة سيرفس وشركة تملك منتج اساسي؟

 

مازود عن رأيي الشباب .. توكل على الله ورح معادن

 

معادن بلا تفكير.!
كأنك تقارن بين الثرا والثريا

 

معادن شركة قادمة بقوة وشركة شبهه حكومية ،

اذا انت براس الخير الباصات موجودة ولا بسيارتك والان فتحو مقر بالجبيل الصناعية

الزيادات السنوية بالشركة حليله من ٣-٧٪؜ حسب اداء الشركة المالي
البونص السنة الماضية ٦ رواتب للي خذو تقييم ممتاز
ومثل ماقلت لك على حسب اداء الشركة البونص
بالنسبة للبيوت ٥٥ راتب يعطونك مو ٥٠ بعد ٣ سنوات خدمة بالشركة
حد اقصى مليون و ٥٠٠ والي ياخذ قرض شخصي يطلع ببيت حلو بالجبيل الصناعية او الدمام او الخبر تروح اي بنك وتنزل القرض على البيت وهم يدعمون الفوائد وتقصده براس ماله
استقرار اكثر
حياة اكثر
تامينهم VIP يشمل الوالدين بدون صك اعالة ومدري وش على طول يامنون لهم
تعطيك خبرة اكثر بحيث تقدر تتنقل بين الشركات وتحصل على عروض حيث انك تعمل في قطاع ال petrochemical او ال Industry ،

السلبيات في معادن
لما تخلص ال PDP وتتعين مهندس ماتترقى الى مهندس اعلى او سينير انجنير الا في شاغر وظيفي وتقدم عليه وتترقى بس الي شاطر وشاد حيله يمشي
مافي كارير باث واضح زي سابك من الشركة بس شغالين عليه
مكانها يعتبر نوعا ماء بعيد شوي مو مره لاكن الطريق ٣ اسياد رايح ومثله جاي بس في بدل remote area 10%
بدل النقل مثلا سابك تعطيك حد اعلى ١٠٠٠ ريال معادن بدون حد اعلى

عالعموم الشركة مرة صارت قوية وفي تطور كبير قاعد يصير بها اهم شي ابعد عن المناطق البعيدة زي طريف ومناجم الذهب والجلاميد او الريموت اريا احرص انك تكون براس الخير او الرياض او الجبيل

معادن استقطبت ناس كثير من سابك وارامكو وصارو الناس يبونها وبقوه بسبب مميزاتها والبونص والامان الوظيفي و غيره

ماراح اقارن شلمبرقير لو ان فيها مميزات ولاكن نصيحة أخ انت مقبل على زواج اختر مكان يريحك في زواجك وقريب من اهلك الي ساعه ساعتين بالكثير عندهم لان راح تعاني معاناة مايعلم بها الا الله خصوصا بعد الاطفال ،

سابك ممكن اقارنها والي يميزيها تاجير البيوت لين يجيك تمليك
قرب البيوت عن العمل ومكان المصانع بالجبيل الصناعية

حاولت ارد رد شامل لعل احد مستقبلا يحتار ويقرا ردي لان احتار كثير والجاء الى هذا المنتدى كثير بعد الله واستفيد كثير وانا اعرف مايمر به الي مقبل على اتخاذ قرار بعضهم يعتبر مصيري بالنسبة له .

وفقكم الله